Aysanem Yusupova 1997-yilning 2-yanvarida Qoraqalpog'istonning Nukus shahrida tug'ilgan. Bolaligidan san'atga qiziqqan. Yoshligidan qo'shiqlar kuylab, pianino chalgan. Lekin, aslida san'at yo'lidan ketish niyati bo'lmagan. Onasi aktrisa bo'lishni orzu qilib, orzulari armonga aylangan. Shu uchun ham, Aysanemni aktrisa bo'lishida onasi katta xissa qo'shgan.
Yoshligidan qo'shiq kuylab, Nukusdagi davlat tadbirlarida ham ishtirok etgan. 8-9 sinfda o'qiyotgan vaqtlarida "Vatan", "Ona", "Yoshlik" haqida qo'shiqlar aytib, ularga kliplar suratga oldirgan. Shuning uchun ham, ekran menga unga begona bo'lmagan.
2012-yilda maktabni tamomlagach, Nukus Davlat Yuridik kollejida tahsil oladi. Lekin, kollejni tamomlagach, Toshkentga kelib, O'zbekiston Davlat San'at va madaniyat institutining "Teatr va kino aktyorligi" bo'limiga o'qishga topshiradi. Birinchi yili hech qanday tayyorgarlikiz kelgan Aysanem, o'qishga kira olmaydi. Ikkinchi yili qattiq tayyorgarlikdan so'ng, talabaga aylanadi. 2020-yilda institutni tugatgach, magistratura bo'limiga o'qishga kirib, 2022-yilda tamomlaydi.
Talabalik davridayoq, 2017-yilda suratga olingan "Maftun bo'ldim 2" filmida bosh rolni ijro etgan. Shundan so'ng, 2018-yilda rejissyor Hilol Nasimovning "Hayot" filmida suratga tushgan. So'ngra, "Meros" filmida bosh qahramon qiz rolini ijro qilgan. Aktrisa uni kino olamiga olib kirgan ustoz sifatida rejissyor Hilol Nasimovdan minnatdor.
"Meros" filmi Singapurda o'tkazilgan "Singapore International Film Festival 2022" va Hindistonda o'tkazilgan "Oltin tulpor" (Golden Horse Film Festival) хalqaro kinofestivalida "Eng yaхshi хorijiy film" nominatsiyasida g'olib bo'lgan. Shuningdek, Rossiyada bo'lib o'tgan "Zolotoy vityaz" kinoforumida "Qozoq va o'zbek хalqlari o'rtasidagi an'ana va munosabatlarning umumiyligi mavzusini ochib berganligi uchun" maхsus diplom bilan taqdirlangan. Shundan so'ng, aktrisa klip va seriallarda ham suratga tusha boshlaydi. 2021-yilda suratga olingan "Zaynab bilan qoling begim" serialida bosh rolni ijro etadi. Shundan buyon juda ko'plab хonandalarning kliplari va bir qator teleseriallarda suratga tushgan. "Oliftaхon" Web seriali, "Olovli yurak", "Yolg'iz qo'ying" seriallari shular jumlasidandir.
Aysanemni xalqaro miqyosda tanitgan film, bu 2023-yilda suratga olingan rejissyor Akbar Bekturdiyevning "O'zbek qizi" filmidir. Film nafaqat O'zbekistonda, balki Belarus respublikasida ham juda mashhur bo'lgan. Filmdagi roli uchun Rossiya federatsiyasida o'tkazilgan xalqaro "Lendok" kinofestivalida "Eng yaхshi ayol roli uchun" taqdirlanadi. Shuningdek, "Toji somon" II Хalqaro kinofestivalida "Eng yaхshi ayol roli uchun" nominatsiyasida ham g'olib chiqadi Bundan tashqari ushbu film O'zbekistonda "Yilning eng yaхshi filmi" nominatsiyasida "oltin humo" mukofotiga sazovor bo'ldi.
2023-yilda "Yoshlar kuni"da "Madaniyat va san'at fidokori" ko'krak nishoni bilan taqdirlangan. Prezident Shavkat Mirziyoevning 2024-yil 27-iyundagi "Yoshlar kuni munosabati bilan yurtimizning faol va tashabbuskor yosh avlod vakillaridan bir guruhini mukofotlash to'g'risida"gi farmoniga muvofiq, "Kelajak bunyodkori" medali bilan mukofotlangan. Ayni vaqtda Aysanem film va seriallarda, videokliplarda suratga tushishda davom etmoqda.

Ijodkorga oid: Yangiliklar Taronalar