To'lqin Jo'rayevich Tojiyev (13-aprel 1936-yil Toshkent) — O'zbekiston xalq artisti (1988). Toshkent teatr va rassomlik san'ati institutini tugatgan (1959). 1959—96 yillar Hamza teatrida aktyor. Asosiy rollari: Bobchinskiy va Xlestakov (N.Gogol, "revizor"), Edgar, yago (U.Shekspir, "Qirol lir", "Otello"), Mansur va Jomiy (Uyg'un, I.Sulton, "Alisher Navoiy"), Orif (I.Sulton, "Imon"), Abdullatif (M.Shayxzoda, "Mirzo Ulug'bek"), Jontoy (Ch.Aytmatov, "Sarvqomat dilbarim") va boshqalar.
Yago — uning sahnadagi eng murakkab, ayni vaqtda eng muvaffaqiyatli rollaridan biri. U yaratgan obrazlarida har bir qahramonga xos xarakter, uning tashqi ko'rinishi va ichki kechinmalarini ochib berishda aktyor mahoratining barkamolligi ko'zga tashlanadi. Chuqur psixologik talqin, ijtimoiy xarakterning o'tkirligi, yorqin milliy kolorit To'lqin Tojiyev ijodiga xos.
T.Tojiyev kinodagi rollari bilan ham tanilgan: Jurjoniy ("Abu Ali ibn Sino"), Hakim ("Ikkinchi bahor"), Mahmud ("Mahallada duv-duv gap"), Quddus ("Besh og'aynilar"), Omon ("Bu yerdan chegara o'tadi"), Tog'ayev ("Siz kimsiz?"), Qodirov ("Qora baliq izi"), Hhasanov ("Hayot sening qo'lingda") va boshqalar.
To'lqin Tojiyev dublyaj san'ati ustalaridan. Radioda "Tabassum" eshittirishi, "Qarmoq" satirik radiojurnalining boshlovchisi sifatida tanilgan. "Do'stlik" ordeni bilan mukofotlangan.