Albina Urazbayeva 1989-yil 12-oktabr kuni Qoraqalpog'iston Respublikasining Nukus shahrida san'atkorlar oilasida tavallud topdi. 1-sinfdan Toshkentdagi Uspenskiy nomidagi musiqa maktabi, so'ng Uspenskiy nomidagi musiqa litseyining kompozitorlik bo'limida tahsil oldi. Hozirda esa O'zbekiston Davlat Konservatoriyasining "Bastakorlik san'ati" fakultetida tahsil olmoqda. Albina 3-4 yoshligidanoq otasi bilan Nukusda simfonik orkestr bilan qo'shiq ijro etardi. Qo'shiqqa qiziqishi, ishtiyoqi juda ham baland edi. 8-sinfda o'qib yurgan vaqtlarida esa Albina mustaqil o'zi kuy bastalar edi. Uning ilk bastalagan qo'shig'i "Seni sevmay" qo'shig'i bo'lgan. Hamda 8-sinfda o'qib yurgan vaqtida "Qismatdosh" qo'shig'ini yozdi va ijro etdi. 2010-yilda rejissyor Ravshan Norboyevning "O'yin ichida o'yin" filmida "Ko'zlarimda yosh" soundtrekini ijro etdi. Bu qo'shiq xit darajaga yetdi. Keyingi xit qo'shiqlari "Yulduzli kecham", "Xeylilla", "Bu sevgi", "Million atir gul" va "Sen ketmagin" qo'shiqlari bo'lgan. Yuqorida qayd etilgan qo'shiqlarning barchasi Albina muallifligidagi qo'shiqlardir. Xonanda hozirgi kungacha 40-50tagacha qo'shiqlarni bastalagan. Aynan o'zbek estrada yulduzlaridan Ziyoda, Iskander va Muzaffar Abduazimovlarga qo'shiq yozib, musiqalar bastalagan. Har yili yosh bastakorlar uyushmasi O'zbekiston Davlat Konservatoriyasida o'tkazadigan konsertlarda Albina faol ishtirok etadi. 2009-yilda "Sharq ayoli" festivalida ishtirok etib fahrli diplom bilan taqdirlandi. 2010-yilda "Yosh bastakorlar" ko'rik-tanlovida eng yaxshi xor akapella uchun fahrli 3-o'rin sohibasi bo'ldi. 2011-yilda esa Navro'z bayramiga bag'ishlangan yosh bastakorlar ko'rik-tanlovida oliy 1-o'rin sohibasi bo'ldi.

Ijrochiga oid: Yangiliklar Taronalar Kliplar Fotosuratlar