Saytimiz orqali ko'plab estradamiz yulduzlari bilan bo'lib o'tgan qiziqarli suhbatlarni e'tiboringizga havola etib kelmoqdamiz. "Qoshlarimda" va "Ajabo" kabi taronalarini taqdim etgan xonanda Farruh Ahmedov bugun bizning navbatdagi suhbatdoshimiz bo'ladilar.

-Necha yildan beri san'at sohasida ijod qilasiz?

-To'rt yildan beri san'at sohasida ijod qilib kelaman.

-San'at olamiga kirib kelishingizga nima turtki bo'lgan?

-Yoshligimda ustoz san'atkorlarga juda ham havas qilganman. Jumladan: (Marhum) Muhriddin Holiqov, "Yalla" guruhi hamda Tohir Sodiqov ya'ni "Bolalar" guruhi tomonidan kuylangan taronalarni sevib tinglar edim. O'ylaymanki, mana shu insonlar tufayli san'atga bo'lgan qiziqishim paydo bo'la boshlagan.

-Aslida bolaligingizda kim bo'lishni orzu qilgansiz?

-To'g'risini aytsam, bolaligimda uchuvchi bo'lishni orzu qilganman. Sababi, yaqinlarimizdan biri uchuvchi bo'lgan. Ularga havas qilib uchuvchi bo'lishni orzu qilganman. Bolaligimda doim "Bir kuni samolyotda uchganimda seni ham birga olib ketaman",-der edilar. Men esa yosh bola bo'lganim uchun, uning ustiga ishonuvchan bola bo'lganligimdan shu kunni juda ko'p kutganman. (kuladi) Buning imkoni yo'qligini o'sha vaqtlarda tushunmas edim-da. Bora-bora fikrlarim o'zgarib kattaroq bo'lib qolganimda san'atga qiziqishim uyg'ongan.

-Bilamizki ijod qilishingizga hali ko'p vaqt bo'lmagan bo'lsada, o'zingizga yarasha muxlislaringiz bor. Mana shu muxlislaringizga ya'ni xalqqa Farrux Ahmedov deb tanitgan taronangiz?

-Menimcha bu "Muhabbat" nomli taronam bo'lsa kerak. Mana shu taronamdan so'ng xalqqa ozmi-ko'pmi tanila boshladim deb o'ylayman.

-O'zingiz sevib tinglaydigan tarona?

-Marhum ustoz san'atkorimiz juda ham iste'dodli bastakor Tolib Kuliyev ijrosidagi "Buyurmadi baxt" nomli taronani juda ham sevib tinglayman.

-"Qoshlarimga" nomli taronangiz xit bo'ldi va juda ko'plab muxlislar tomonidan ijobiy qabul qilindi. Ushbu ham folkyor, ham estrada musiqasi mujassamlashgan g'oya kimdan chiqdi? 

-Xa albatta. Bu tarona qo'shiqlarim repertuaridagi men uchun eng omadli tarona va klip bo'ldi desam mubolag'a bo'lmaydi. "Qoshlarimda" taronasining g'oyasi bastakor Jasur Javxarnazarov tomonidan yaratilgan.

-O'zbek san'at olamida qaysi san'atkorlarni alohida takidlab o'ta olasiz?

-Avvalo men hali yosh va endigina san'atimni rivojlantirayotgan san'atkorman. Ularni alohida-alohida takidlab o'ta olishga hali yoshlik qilsam kerak. Lekin chetdan qaraganda ham muxlis, ham ijodkor sifatida qo'shiqlarini sevib tinglaydigan ustoz san'atkorlarimizni sanab o'ta olaman. Bular yuqorida takidlab o'tgan xonandalar bilan birgalikda O'zbekiston xalq artisti Ozodbek Nazarbekov, Sevara Nazarxon, "Xo'ja" guruhi. Mana shu ijodkorlarga ham havas qilaman, ham ularni taronalarini juda ham sevib tinglayman. Ilohim ularni yo'lini bersin bizga ham.

-Asosiy yutug'ingiz nimada deb bilasiz?

-Mehnat va omadda deb bilaman.

-Qo'shiqlaringiz repertuarida duetlar ham bormi?

-Yo'q.

-Kuylash niyatingizchi...?

-Yo'q. Hozircha yakkaxon ijodim ustida ko'proq ishlash niyatidaman.

-Mana oilalisiz. Farzandingiz ham bor. Agar farzandingiz san'atga qiziqib, kasbingizni davom ettiraman desa rozi bo'larmidingiz?

-Albatta rozi bo'laman. Qarshilik bildirmagan bo'lar edim. Sababi, bola nimaga qiziqsa shu qiziqishi tomon ketishi kerak deb bilaman. Men esa qarshilik qilmasdan aksincha, qo'llab-quvvatlayman.

-Kino olamiga munosabatingiz? Estrada xonandalarining kinofilmlarda sur'atga tushishiga munosabatingiz?

-Xonandalarning hozirgi kunda kinolarda suratga tushishi oddiy hol bo'lib qolgan. Munosabatim ijobiy. Omadlarini bersin.

-Farrux Ahmedovni ham filmlarga taklif qilishsa?.

-Yo'q demas edim.

-Muhabbatga munosabatingiz?

-Muhabbat bo'lsa san'atingiz ham chiroyli bo'ladi. Muhabbatdan armoni bo'lgan odam qo'shiqlarini yuragidan kuylaydi.

-So'zlaringizga qaraganda sizda ham armonli muhabbat bo'lganmi deyman?

-Bo'lgan 6-sinfda. (kuladi)

-Fe'lingizga biroz to'xtalib o'tsak. Farrux Ahmedov hayotda aslida qanday inson?

-Hayotda juda ham xushchaqchaq insonman. Ammo tez hafa bo'laman.

-Fe'lingizdagi hurmat qiladigan jihatlaringiz?

-Meni qadrlay oladigan insonni, men ikki xissa qadrlayman. Shu jihatim o'zimga yoqadi.

-Buning aksi ya'ni yoqtirmaydigan jihatingiz ham bormi?

-Albatta bor. Ishonuvchanligim o'zimga also yoqmaydi. Shundayligimdan dushmanni ham do'st deb o'ylayman.

-Sizni shokka tushirgan holat bo'lganmi hayotda?

-(o'ylanib) 2011-yilning aprel oyida Toshkent xalqa yo'lida bir nohushroq voqea bo'lgan edi. Xuddi shu yerda men avtomobil boshqarib ketayotganimda juda ham qattiq charchash oqibatida uyqisirab, natijada mashinam ag'darilib ketgan. Ammo xudoning inoyati bilan hech narsa qilmagan. Yaqinlarim avtomobilimni holatini ko'rib omon qolganimga xayratlanishgan. Mana shu holat nafaqat meni balki oila a'zolarimni ham shok holatiga tushirgan.

-O'zingizdagi qaysi kamchiliklarim ustida ishlashim kerak deb o'ylaysiz?

-To'laroq ekanligim. (kuldi) Bilasizmi, ozish uchun anchadan beri kurashaman. Ammo hech uddasidan chiqa olmayabman. U darajada to'la bo'lmasamda, ammo birozgina ortiqcha vaznimni yo'qotishim kerak deb o'ylayman. Hozir esa jangdaman. (kuladi)

-Avvalo albatta niyatingizga yeting. Ammo bizningcha vazningiz joyida. Suhbatimiz so'ngida esa chiroyli tilaklaringizni bildirishingiz mumkin.

-Avvalo bizning ijodimizga befarq bo'lmagan, kamtarona ijodimizni qo'llab-quvvatlayotgan muxlislarimizga o'z tashakkurimni bildiraman. Ular uchun tinmay ijod qilib yaxshi kuy va qo'shiqlarimizni taqdim etishga harakat qilamiz. Sizlarni ham omadingizni bersin. Saytingizga nafaqat O'zbekiston balki, dunyo miqyosida qiziqish uyg'onishini chin dildan tilab qolaman.

Biz ham xonanda Farrux Ahmedovga o'z navbatida qiziqarli suhbati uchun va har bir savolimizga aniq va to'liq javob bergani uchun  tashakkurimizni bildirib qolamiz. Xonanda ijodiga ulkan muvvaffaqiyat va ulkan zafarlar tilaymiz.