Oydinda ayvonimga chiqqanim balo bo‘ldi,
Qayrilma qoshga kiprik yetgani jazo bo‘ldi.
Ostonamdan bir qadam ketmay yo‘lim poylaydi,
Shu o‘jar yigitni man sevganim balo bo‘ldi.

Mahallada sevgimiz bilmagan kim qoldi, yor,
Otam darvozamizga yana zanjir soldi, yor.

Ochilmagan g‘unchalar devor osha sochilar,
Bargini silay desam, tikanlari sanchilar.
Sevgi dardi bu shirin jonni o‘rtar bunchalar,
Man bunda zor, unda yor toqati ado bo‘ldi.

Mahallada sevgimiz bilmagan kim qoldi, yor,
Otam darvozamizga yana zanjir soldi, yor.

Yorga ayt degan so‘zni kimga aytganding, shamol?
Salom olib kelmading, kutgan edim jon misol.
Dildagi dardim aytib tun-kecha chalsam dutor,
Jonni uzib olgudek bir ajib navo bo‘ldi.

Mahallada sevgimiz bilmagan kim qoldi, yor,
Otam darvozamizga yana zanjir soldi, yor.