Davlat berib, minnat qilmas beminnatim,
Qadringizni goho bilib, goh bilmadim,
Volidamdan yodgor qolgan, ey, qimmatim –
Yana bir bor sochim mayda o‘ring, ota!
Baxtimizga doimo sog‘ bo‘ling, ota!

Goho – onam, goho – akam, ham otamsiz,
Olam ichra mehribonim, bir olamsiz,
Bu dunyoda men suyangan bir odamsiz –
Yana bir bor sochim mayda o‘ring, ota!
Baxtimizga doimo sog‘ bo‘ling, ota!

Aytmasam ham sezib turar qalbim har zum,
Siz bor uchun urib turar yarim qalbim,
Yuksalaman har deganda «jigarbandim!» -
Yana bir bor sochim mayda o‘ring, ota!
Mehribonim, baxtimga sog‘ bo‘ling, ota!

Istasangiz, ming o‘g‘ilning o‘rnin bosay,
Bir lahzalik shodligizga jonim osay,
Kechirdingiz hatto, otam, gunoh qilsak –
Yana bir bor sochim mayda o‘ring, ota!
Baxtimizga doimo sog‘ bo‘ling, ota!