Haromdan ko'z uzolmasdan qarayapmiz,
Uyalmay, dil gunohini sanayapmiz.
Fursat yetib birodarlar, aytingchi biz,
Nima deymiz Ollohimning huzurida?

Birovlarning luqmasidan totib har kun,
G'iybat degan botqoqlarga botib har kun,
Nomahramning ishratida yotib har kun,
Nima deymiz Ollohimning huzurida?

Noshukurlik qilamiz dard tutganida,
Hadik yo'qdir harom luqma yutganida,
Umr oni poyoniga yetganida,
Nima deymiz Ollohimning huzurida?

Ming barobar qaytar kimki yovlik qilsa,
Achinmaymiz gunohlari bag'ir tilsa.
Jon topshirmoq fursati ham yetib kelsa,
Nima deymiz Ollohimning huzurida?

Ko'ngil ichi yomonlikka to'lib bo'ldi,
Yaxshilikning g'unchalari so'lib bo'ldi.
Bo'g'zim achchiq yoshim ila dardga to'ldi,
Nima deymiz Ollohimning huzurida?

Qalblardan shart shayton uyin yulolmasak,
O'zga do'stga yaxshi niyat tilolmasak,
Musulmonman, deb yaxshilik qilolmasak,
Nima deymiz Ollohimning huzurida?

Chin do'stlarni sotdik rangli pullar uchun,
Yorni aldab ketdik yolg'on hurlar uchun.
Qayda qoldi do'stim, ayting iymon kuchin,
Nima deymiz Ollohimning huzurida?