Muhabbat yo‘llari chalkash, adoqsiz,
Sarobda adashib, yurarman yolg‘iz,
Izlarim ko‘l bo‘lib ketadi, esiz,
Qora qismat visolingni qizg‘onar,
Seni desam, hasratlarim uyg‘onar.

Tushlaring tushimga kiradi har kez,
Hajring qoshida ojizman, ojiz.
Muhabbat yig‘laydi, yig‘laydi sensiz,
Hasratingdan bor vujudim to‘lg‘onar,
Seni desam, hasratlarim uyg‘onar.

Kel! Kunlarimning ma’nosi o‘zingsan!
Kel! Tunlarimning sabosi o‘zingsan!
Kel! Ko‘zlarimning qarosi o‘zingsan!
Xayolimdan bir zum ketmasang,
Netay, netay, netay!

Ohlarim oy tomon o‘rmalar unsiz,
Oyning yuzi ham to‘lmasdir bejiz,
O‘kingan orzular – oydan olis,
Yulduzlarga armonlarim cho‘lg‘onar,
Seni desam, hasratlarim uyg‘onar.