"Fayoz" nomi bilan qizg'in ijod qilib, yaqindagi o'zining "Koinot" nomli tarona va klipini taqdim etgan guruh yigitlardan biri Oybek bugun katta va jiddiy hayotga qadam qo'ydi. Sababi bugun 2012-yil 5-oktabr sanasi Oybek uchun eng quvonarli va esda qolarli kun. Bugun uning oila a'zolari, yaqinlari hamda barcha estrada yulduzlari uning nikoh marosimining aziz mehmoni bo'libgina qolmay, qurilayotgan yangi oilasiga guvoh bo'lishadi. Fursatdan unumli foydalangan holda Oybek va Dildoraxonga saytimiz ijodkorlari nomidan ulkan baxt, baxtdan esa taxt tilab qolamiz. Mustahkam oila yilida qurilgan ushbu muqaddas nikoh to hayot turgunicha o'z mustahkamligini yo'qotmasin.