5-aprel sanasidan boshlab, O'zbekiston xalq artisti, el suygan san'atkor bo'lmish Ozodbek Nazarbekov o'zining bir necha kunlik konsert dasturiga start berdi. Shu kundan boshlab aprel oyining 21-sanasiga qadar poytaxtimizning muhtasham Istiqlol san'at saroyida barcha haqiqiy va jonli ijrodagi san'at shinavandalari uchun "Taqdirimsan, baxtimsan" deya nomlangan konsert dasturi taqdim etiladi. Konsertning ilk kuni tafsilotlari bilan o'rtoqlashar ekanmiz, eng avvalo bu yilgi dastur dekoratsiyasi avvalgilaridan tubdan farq qilishini alohida takidlab o'tish joiz. Dekoratsiyaning deyarli katta qismi, hattoki saxna poli ham maxsus monitorlar yordamida jihozlangan bo'lib, san'at saroyining yuqori qavatidan chipta olgan tomoshabinlar uchun o'zgacha ko'rinish va aqiqiy hayratni uyg'otishi aniq. Bundan tashqari Ozodbek Nazarbekov tomonidan bu yilgi kuylanayotgan yangi qo'shiqlar barchaga albatta maqul bo'la oladi. Jumladan ustoz va marhum san'atkorimiz, Muhriddin Holiqovning "Ey go'zal" taronasini saroyga tashrif buyurgan deyarli barcha tomoshabinlar xonandaga jo'r bo'lgan xolda kuylashdi. Bir nechta sho'x taronalar ijrosi esa hattoki ko'plab tomoshabinlarni raqsga tushirib yubordi. Alohida takidlash joizki, Ozodbek Nazarbekov, konsertning birinchi kuni bo'lishiga qaramay, ortiqcha hayajonsiz va yaxshi kayfiyat ila o'z muxlislariga yangidan-yangi ijod namunalarini taqdim etdi. Hullas, ushbu konsert dasturi haqida erta tonggacha gapirish mumkin. Yaxshisi quyida joylashtirilgan foto va videoni tomosha qilib, konsertni qanday o'tganligiga o'zingiz guvohi bo'ling. Eslatib o'tamiz, konsert Panterra Studio hamda IOX Media bilan hamkorlikda tashkillashtirilgan.
Ozodbek Nazarbekov - Konsert 2013 (video)
