Jastin Biber sobiq sevgilisining surati Instagramni ishdan chiqardi

JET, 5-mart 2014, 11228

3-mart kuni Instagram servisi 50 daqiqacha ishlamay qoldi. Bunga ko‘pchilik Jastin Biberning postini sabab qilib ko‘rsatmoqda. Bu haqda TechCrunch nashri ma’lumotiga tayanib, TJournal xabar berdi.

Gap shundaki, aynan o'sha vaqtda pop-qo'shiqchi Jastin Biber Instagramda o'zining sobiq sevgilisi Selena Gomezning fotosurati bilan bo'lishgan. Biberning servisdagi muxlislari naq 14 millionta bo'lib, fotosuratga 1,2 millionta "layk" bosilgan va 200 mingdan ziyod fikr bildirilgan.

TechCrunch’ning taxmin qilishicha, Biber muxlislarining keskin faolligi Instagram’ning vaqtinchalik ishdan chiqishiga olib kelgan.

Instagram xodimlari servisning ba’zi foydalanuvchilarda ishlamay qolganini rasman tasdiqlagan bo'lsa-da, uning sababi Selena Gomezning surati ekanini rad etdi. "Kompaniya aybni qo'shiqchilarga to'nkashni istamadi, chog'i", - deb yozadi nashr.