O'zbek estradasida juda ham ko'plab guruhlar mavjud va ular qatori kundan-kun yangi guruhlar bilan to'lib bormoqda. O'tgan yilning so'nggida tashkil topgan yana bir yangi guruhning nomi "Sarbast" ekanligi ko'pchilikni hayratga soldi. Hayron bo'lishga hech qanday asos yo'q. Guruh tashkil topganida, uni qanday nomlash to'g'risida juda ham ko'p fikrlar bo'lgan. Nimaga ular aynan shu nomni tanlashgan?Guruh nomi zamonaviy va ayni bir pallada milliy mohiyatni aks ettirishi talab etilgan edi. "Sarbast" so'zining asl ma'nosi o'rta asrlar sharq she'riyatida erkin, mustaqil she'riy yo'nalishni anglatgan. Shu jihatdan guruh ijodkorlari ham erkin ijod yo'nalishiga ega bo'lish maqsadida aynan shu nomda o'z ijodlarini amalga oshiriga qaror qilishdi. Bugungi kunda uch yigitdan iborat bo'lgan yangi jamoa uchinchi qo'shig'i ustida ijod qilmoqda. Davron, Firdavs va Doniyor o'z qo'shiqlarida muhabbat mavzusini tabiiyki chetlab o'tishmagan. Ilk taronalari asosan sevgi extiroslari va xotiralariga bag'ishlanadi. Yaqin kelajakda xonandalar "Yodimdasan" qo'shig'iga klip suratga olishni rejalashtirishmoqda. Biz ham o'z navbatida debyutant guruhga erkin ijodiy parvoz va yuqori cho'qqilarni zabt etishlarini tilaymiz.
