Bahorning birinchi kunini yoshlarimizning sevimli xonandasi Jasur Umirov yangi albomi taqdimoti bilan kutib oldi. 1-mart "Markaziy" mehmonxonasi qoshidagi "Delmar" restoranida oqshomdan yarim tungacha davom etgan shodiyonada Jasurning eng yaqin qadrdonlari jamlanishdi. Oila a'zolari davrasida boshlangan bayram kechasiga birin-ketin ijodiy do'stlar Zafar Qodirov, Doniyor Mirzo, Jasur Isoqov, Narimon Sultonxo'jayev, Olimxo'ja Azimov, Ayzimgul Yakubova, Vohidjon Isoqov va boshqalar qo'shilib, mehmonlarni kutib olishga bel bog'lashdi. Ilk albom taqdimotida Jalil Mavlonov, Umar Shamsiyev, Askar Madamin, Ruxshona, Husan, Behzod Tojiyev, Oyxon Iforzoda, Shahzod Rahimov va boshqa yosh xonandalar o'z qutlovlari va musiqiy chiqishlari bilan ishtirik etishdi. O'zbek shou-biznesida eng ommabop xonanda Bojalar guruhining yakkaxoni Jahongir Poziljonov xursandchilik bayramiga tashrif buyurib, shodiyona sababchisini muborakbod etgan holda, ijodiy zafarlar va ulkan muvaffaqqiyatlar tiladi hamda tanlagan ijodiy yo'nalishidan peshqadam borishini maslahat qildi.
Bu kun Jasur Umirovning yangi albomi bilan bir qatorda "Ohang-Media" studiyasida chiqarilgan konsert video diski ham namoyish etildi. Darvoqe, xonandaning muxlislari endi ushbu konsert dasturini ham tomosha qilish imkoniga egalar.
