Ruhshona: Yulduzlik kasaliga chalinganim yo'q

Ruhshona
Radio boshlovchi bo'lmoqchiman...

Muz.uz sayti orqali doimiy tarzda el ardog'ida bo'lgan sevimli ijodkorlarimiz bilan birgalikdagi qiziqarli suhbatlarimizni siz uchun taqdim etib kelmoqdamiz. An'anaga sodiq qolgan holda galdagi mehmonimizni suhbat uchun taklif etganmiz. Bu galgi mehmonimiz esa sizning sevimli ijodkorlaringizdan biri, yosh bo'lsada juda katta tezlik bilan ijodda izlanishlar olib borayotgan, ham xonanda, ham aktrisa, ham teleboshlovchi Ruhshona. Naqd uch yo'nalishni bir maromda olib borayotgan xonandani endilikda to'rtinchi sohada ham ko'rishimiz mumkin ekan. Qaysi sohada deysizmi? Suxbatimiz davomida buni o'zingiz bilib olasiz.

 

-Ijodingizdagi so'nggi yangiliklaringiz?

-Yaqindagina "Yaqining bo'lay" nomli taronamni ijro etib, ushbu taronamga klip ham sur'atga oldik va ommaga taqdim etdik. Muhlislarimiz ushbu taronamni TVM hamda NTT telekanali, hamda MUZ.UZ sayti orqali tomosha qilishlari mumkin. Aynan ushbu taronamni rus tilida ham ijro etdim. Tarona uchun video klipni esa tayyorlamoqdamiz.

 

-Ko'plab duet taronalar ijro etgansiz. Aksariyat duetlaringiz Akfa-media markazi xonandalari hamda boshqa san'atkorlar bilan birgalikda ijro etilgan. Siz duet kuylashni hohlagan xonandalaringiz bormi?

-Men duet kuylashni hohlagan san'atkorlarim ko'p. Shu kunga qadar ko'plab duetlar kuyladim. Hozirda esa bu albatta orzu. Shunday bo'lsada bu orzuni amalga oshirishga harakat qilyabmiz. Rus estrada yulduzlaridan biri Avram Russo bilan duet kuylandi. Nasib qilsa Filip Kirkorov bilan birgalikda duet kuylash niyatim bor. Lekin hozirda duetlarga rad javobini beryabman. Sababi, o'zim endi erkin ijodga qadam qo'yganman. Shu sababli o'z yakkaxon ijodimga kuchli e'tibor qaratyabman. Ammo, hali albatta ko'plab duetlar yaratamiz. Kim bilan ekanligi esa hali noma'lum.

Ruhshona

-Ruhshona ko'plab filmlarda sur'atga tushdingiz. Ko'cha-ko'yda yurganingizda o'ynagan rollaringizdagi qahramon ismi bilan chaqirgan yoki obrazingizni maqtagan, yoxud tanqid qilgan insonlarga duch kelganmisiz ?

-Albatta. Tanqidlar ham bo'lgan. Maqtovlar ham bo'lgan. Kino rejissyor Jahongir Ahmedovning "Hizmat doirasidan tashqarida" filmi ommaga taqdim etilgan. Mana shu filmda Guli ismli qizni talqin etganman. Juda ham sho'x va shaddod qiz bo'ladi. Ko'pincha tanishlar va do'stlarim Guli ismi bilan chaqirib turishadi. Yana yaqindagina "Kutilmagan qo'ng'iroq" nomli filmda ham suratga tushdim. Bu film yaqindagina chiqdi va hali ommaga u qadar yaxshi tanish emas. Filmni tomosha qilishyabdi. Ammo, viloyatlarga hali tarqamagan. Ushbu filmdagi rolimga tanqidlar ham bo'ldi. Chunki bu o'zimizning ilk filmimiz desam adashmayman. Dilmurod Masaidov bilan birgalikda biz o'zgacha mavzuni ochmoqchi edik. Bu filmni ko'rish uchun filmning ichiga kirib ketish kerak. Undagi voqealarni his qilish kerak, tasavvur qilish kerak. Rolimga kelsak, u qadar rolni boplay olmagansiz degan tanqidlar ham bo'ldi. Tanqid bu biz uchun yaxshi. Chunki keyingi rollarimizda xatolarni to'g'irlashga harakat qilamiz.

 

-Mana shu "Kutilmagan qo'ng'iroq" filmidagi obrazingizni "Jassiga o'xshashi yo'q" nomli hind serialidagi Jassi obraziga o'xshab qolgani sizga ham bilinganmi?

-Shunday fikrlar bo'ldi. Ammo bizda Jassi obrazi odamlarni fikriga o'rnashib qolgan. Ko'zoynak taqgan qiz obrazi bo'lsa tamom, uni Jassiga o'xshatishni boshlashadi. Mayli buni yomon tarafi yo'q men uchun. Rolimni qanday talqin qilganimni esa muhlislarimiz o'zlari baho beradilar.

 

-Hozirda sizni TVM kanali orqali "Bollivud markazida" ko'rsatuvining boshlovchisi sifatida ham ko'ryabmiz. Ham kinoga, ham xonandalikka, ham boshlovchilikka ulgurish qiyin bo'lmayabdimi?

-To'risini aytsam to'rtinchi narsani ham olib ketmoqchiman (kuladi). Azaldan radio boshlovchi bo'lgim kelar edi. Shuning uchun qandaydir o'z tasavvurimda bir ruscha efir olib borib, kofe damlab qo'yib, bir mavzuni ochib, boshlovchilik qilgim keladi. Teleboshlovchilikka keladigan bo'lsak, "Bollivud markazida" ko'rsatuvida boshlovchi bo'lib ish faoliyatimni yurityabman. Qiyin bo'lgan jarayonlar ham bo'lgan. Nutqingizni to'g'irlashingiz kerak, chiroyli gapirishingiz, o'zingizni kamerani oldida erkin his qilishingiz kerak. Endi har bir ishning o'ziga yarasha qiyinchiligi bo'ladi va u albatta o'z samarasini beradi.

Ruhshona

-Demak, muhlislaringiz sizni radio boshlovchi sifatida ham ko'rishlari mumkin shundaymi? Sir bo'lmasa qaysi radio?

-Hozircha qaysi radio bilmadim. Ammo, radio tanlagim kelmayabdi. Sababi, barcha radio stansiyalar juda ham zo'r. Har bir radioning o'ziga yarasha muhlislari bor. Efirlar ham bir-biridan qiziqarli. Buyog'iga vaqt ko'rsatadi. Ko'ramiz hozir shu haqida bosh qotiryabmiz.  

 

-Muz.uz musiqa javonining intervyu sahifasida sizdan oldingi mehmonimiz xonanda Sirojiddin bo'lgan edilar va intervyu berish jarayonida siz haqingizda fikr bildirdilar. Ya'ni "Ruhshonada xonandalikdan ko'ra aktyorlik mahorati ko'proq" deya fikr bildirdilar.

-Albatta hammada har xil fikr bo'ladi. To'g'risini aytsam, ulardan bittasini tanlay olmayman. Bitta narsani tanlaydigan bo'lsam, men albatta san'atni tanlayman. San'atni ichiga esa mana shularni barchasi kiradi. San'atkor hammasini eplay olishi kerak. Sahnada gapirishni, qo'shiq aytishni, kinoda rol o'ynashni va kerak bo'lsa boshlovchilik qilishni ham bilish kerak. San'atkor serqirra ijodkor bo'lishi kerak deb bilaman. Men ham barchasini birdek barobar olib ketishga harakat qilyabman.

 

-Ish jarayonlaringiz davomida sizda barcha syomkalaringiz bir kunga to'g'ri kelib qolgan vaqtlar bo'lganmi? Yoki shunga o'xshash qiziqarli jarayonlar?

-Bilasiz, bizda ishimizni yuritadigan administratorlarimiz bor. Hammasi bir kunga to'g'ri kelgan holat hali bo'lmaganku, ammo bir kuni film olish jarayoni tunga to'g'ri kelgan va shu kuni ertalab studiyaga borib qo'shiq yozishimiz kerak edi. Studiyadan chiqib esa "Bollivud markazida" ko'rsatuvining syomkasiga borish kerak edi. Shu kuni umuman uhlamaganmiz. Bu charchoq, ammo shu ishlar bilan band bo'lib mazza qilasiz. Albatta kabingizni sevsangiz. Lekin biri ikkinchisiga halaqit qiladigan vaziyatlar hali bo'lgani yo'q. Bo'lmasin ham.

 

-Imidjingiz borasida kimlar bilan ishlaysiz? Yoki o'zingizmi?

-Ko'pincha konsert dasturlarida, to'y-hashamlarda o'zim bo'yanib, o'zim soch turmaklarimni qilishga harakat qilaman. Lekin bizda Doniyor Hakimov ismli bola bor. Mana shu yigit aynan yangi klipimda o'zgacha obraz yaratgan. Sochimdan tortib to makiyajimgacha va hattoki raqqos yigitlarni bo'yantirib, ularga ham obraz yaratishda yordam beradi. Ular bilan konsert dasturlarida ham ishlashga harakat qilaman. Chunki qilgan ishlari menga ma'qul bo'lyabdi.

 

-San'atkor uchun tashqi ko'rinish muhimmi? Nima deb o'ylaysiz?

-San'atkorga hamma narsa birinchi o'rinda kerak bo'ladi deb o'ylayman. Ammo baribir ovoz bu barchasidan ham eng kerakligi. Aslida har bir ayol go'zal. Ayol kishi o'ziga qarab yurishi kerak deb bilaman. Tashqi ko'rinish ham katta ahamiyatga ega, lekin baribir inson o'zi uchun ham o'ziga qarab go'zal bo'lib yurishi kerak. San'atkor har tomonlama ideal bo'lishga harakat qilishi kerak.

Ruhshona

-Ijodingizdagi yutuqlaringizu-kamchiliklaringizni sanab o'ta olasizmi?

-Yutuqlarim juda ham ko'p. Ulardan biri Akfa-media markaziga kirib kelganimni o'zi bir katta yutuq. Ular meni kashf etganligining o'zi bir katta yutuq. Avram Russo bilan duet kuylaganim yutug'im. Shu bilan birgalikda "O'zbegim taronasi" hit-paradida ikkita oltin disk sohibi bo'lganim katta yutuq. Kamolot, Kamalak va Fond-Forum tomonlama berilgan bir qancha diplomlarim ham men uchun juda katta yutuqlarimdan biri. Olgan mana shu diplomlarimni ish joyimizga osib qo'yganmiz. Sababi, ko'rganimda g'ayratim jo'shib, yanada ko'proq ishlagim keladi. Kamchiliklarimga kelsak, ular juda ham ko'p. Balki qaysidir kliplarimda, qo'shiqlarimda yoki yurish-turishimizda kamchiliklar qilgandirman. Bu muhlislarimizga havola. Ular bizni kuzatib aytib turadilar. Biz esa harakat qilamiz mana shu kamchiliklarni to'g'irlashga.

 

-Jonli ijro borasida fikringiz qanday?

-Azaldan o'zimga aytardim, ommabop konsertlar, hit-paradlarni bari jonli ijro bo'lganida juda ham zo'r bo'lar edi. Avvalam bor jonli ijrodan san'atkor hech qachon qochishi kerak emas. Har bir konsertlar jonli ijroda bo'lganida hammasiga borishga harakat qilar edim. Sana'tkorni o'zi uchun ham bu mazza. Muhlislarni oldida jonli kuylab, aytayotgan taronalarini ichidan his qilib kuylab berishni o'zi katta baxt. Shuning uchun jonli ijroni juda ham yaxshi ko'raman. Hozirda Estrada Sirk kolleji talabasiman. U yerda ham konsert dasturimiz boshidan to oxirigacha jonli ijroda o'tkazilyabdi. Unda har bir o'quvchi yetti-sakkiztadan qo'shiq kuylashadi. Mana shu konsert dasturiga hozirda tayyorgarlik ko'rib boryabmiz.

 

-Siz ham jonli ijroda konsert dasturini muhlislaringiz uchun tuhfa etish niyatingiz bormi?

-Albatta niyatim bor. Konsert dasturini qo'yayotgan xonandalarni ko'chada reklama tariqasida osib qo'yilgan plakatlariga ko'zimiz tushadi va u yerda jonli ijro va fonogrammadan foydalaniladi deb yoziladi. Hohlaymanki, reklamalarda faqatgina jonli ijro orqali kuylanadi deyilgan yozuv turishini. Nasib qilsa men ham o'z konsert dasturimni muhlislar hukmiga jonli tarzda taqdim etaman.

 

-Yosh umidli xonandalarimiz uchun o'tkaziladigan "Nihol" mukofoti tanlovida siz ham ishtirok etdingiz? Natijalar qanday?

-Albatta bu yil men ham harakat qilib ko'rdim. Hozirda ushbu tanlovning Respublika bosqichiga o'tdim. Nasib qilsa yana katta bir berlashuv, mardi-maydon bo'ladi. Shuning uchun harakat qilyabman bu yil mana shu mukofotni qo'lga kiritishga.

 

-Tanqidga munosabatingiz qanday?

-Tanqid insonni ozgina bo'lsa ham jaxlini chiqaradi. Tan olmasangiz ham baribir ichingizdan jaxlingiz chiqadi. Lekin tanqidni to'g'ri qabul qilish kerak. Misol uchun internet saytlari orqali men haqimda boshqacha ma'lumot chiqib ketdi. Qayerdan chiqdi bilmadim. Bir klipimiz chiqganidan so'ng, juda zo'r maqola chiqdi. Shu insonni ko'rsam peshonasidan o'pib qo'yar edim (kuladi). Lekin bu gaplarga to'g'ri qaradim. Balki kimgadur yulduzlik kasalligiga uchragandek ko'rinib qolgandirman. Shu kasallikka chalinibdi degan maqola butun internet saytlariga tarqab ketdi. Mendan javob kutishdi. Ammo men javob qaytargim kelmayabdi. Har bir insonni o'ziga yarasha dunyo qarashi bor. Hamma sizni har xil tushunadi. O'z ichki-kechinmalaringizni hammaga ham doston qilavermaysizku. Gohida kayfiyatingiz bo'lmaydi, nimadandir jaxlingiz chiqib turgan bo'ladi. Men doim ko'cha-kuyda og'ir bosiq bo'lib yurishga harakat qilaman. Baribir qiz bola ovozini balandlatib kulib yurishi unga yarashmaydi. Ammo do'stlar orasida, kliplarimda xushchaqchaq bo'lishga harakat qilaman.

 

-Aytaylik siz biron narsadan kayfiyatingiz yo'q holda uyg'ondingiz. Shu kuni esa siz studiyada yangi tarnangizni ijro qilishingiz kerak. Mana shu holatingiz qo'shiq kuylayotganingizda o'z ta'sirini ko'rsatadimi?

-Haqiqatdan ham kayfiyatingiz ta'sir qiladi. Ammo ana shunday hollar bo'lib qolsa, musiqani baland qo'yib sevimli taronamni tinglasam yoki do'stlarimga qo'ng'iroq qilib ular bilan suhbatlashsam kayfiyatim ko'tariladi. Bilasizmi, menimcha ko'pchilikning do'stlari orasdida kayfiyatni ko'taruvchi do'sti bo'ladi. Tabiatan quvnoq inson bo'ladi. Ana shunaqa do'stlarim bilan suhbat qurib barini unutaman.

Ruhshona

-Ijoddan bo'sh bo'lgan vaqtlarda nimalar bilan band bo'lasiz? Bo'sh vaqtingiz bo'ladimi o'zi?

-Bo'sh vaqt bo'lishi juda katta masala. Ammo ishdan bo'sh bo'lganimda raqs to'garagiga boraman. Plastikam hamda kliplarimda harakatlarim jonli chiqishi uchun raqs bilan shug'ullanaman. Rasm chizaman. Rus tilida she'rlar ham yozib turaman. "Yaqining bo'lay" deb nomlangan taronamni rus tilida ijro qilgan variantidagi she'rni o'zim yozganman. Shug'ullanadigan ishlarimni baribir har biri ijod bilan bog'liq. Dam olish kunlari uydagilarga yordam berishga harakat qilaman. Butun vaqtimni ularga bag'ishlayman. Sababi, ijodiy ishlar bilan ularga vaqt ajrata olmayman. Shuning uchun bo'sh qoldim deguncha onam bilan birgalikda dasturxonga yeguliklar tayyorlash hamda uy ishlarini qilishga vaqtimni ajarataman.

 

-Pazandachilik borasida qandaysiz?

-U qadar zo'r emasmanku lekin bir nimalarni tayyorlashni bilaman. (Kuladi)

 

-Osh damlashni bilasizmi?

-Osh damlashni bilmayman. (kuladi) Menimcha yashirish kerak emas. Ammo albatta o'rganaman.

Ruhshona

-Xonandalardan kimlarni alohida takidlab o'tgan bo'lar edingiz?

-Hamma ijodkorlar o'ziga yarasha ijod qilyabdi. Ammo men "Ummon" guruhini alohida aytib o'tgan bo'lar edim. Yangi tarona va yangi video kliplarni muhlislarga ketma-ket taqdim qilib kelishyabdi. Gastrollar, konsert dasturlarini taqdim etishmoqda. Munisa Rizayevani ham takidlab o'taman. Juda yaxshi ijod qilib kelyabdi. Haqiqiy ijodkor deb aytsa bo'ladi. Juda harakatchang, o'zini ishiga pishiq. Zo'r-zo'r xitlar chiqarmoqda. Umuman olganda takidlab o'tsa bo'ladigan san'atkorlar juda ko'p. Sanab o'tsak vaqtimiz yetmaydi. Har kimni o'ziga yarasha plyus hamda minus taraflari bor.

 

-Ruhshona hayotda qanday fe'l-atvorli inson? Yaxshi va yomon jihatlari.

-O'zimni yaxshi jihatlarim bu - do'stlar orasida kirishib, tez muloqotga kirishib ketaman. Yomon jihatim esa ko'p yig'layman. Juda tez hafa bo'lib qolaman. Tashqi ko'rinishimdan undayga o'xshamayman bilaman. (Kulgu ko'tarildi)  Yeg'latadiganga o'xshayman. Yeg'laydi deb hech o'ylashmaydi. Ammo har bir insonda o'ziga yarasha yurak bor. Yana yomon jihatlarimdan biri bu - juda jaxlim tez. Yaxshi jihatlarimni esa o'zim sanab o'ta olmayman.

 

-Yuqorida bo'sh vaqtingiz kamligi borasida suhbatlashdik. Sizni ko'pchilik biladi ya'ni internet tarmoqlarida juda ham faolsiz. Qanday vaqt ajratasiz? Yoki yo'l-yo'lakay internet tarmog'idan foydalanasizmi?

-Biz juda ham ko'p mashinada yuramiz. U yer, bu yerga boramiz. Men haqiqatdan ham internet tarmog'idan foydalanaman. Ko'p muhlislar tomonidan takliflar tushgan ya'ni "Nimalar qilyabsiz? ijodingizda nima yangiliklar? Iltimos bularni barchasini internet orqali batafsil yoritib turing" deya iltomoslar bo'lgan. Shuning uchun doim qayerda bo'lsam darhol suratlar bilan birgalikda, ma'lumotlarni barchasini internetga joylashtiraman. To'g'risi aytib turishadi vaqtingiz yo'qku, qanday qilib ko'p o'tirasiz internetda deyishadi. Ammo men muhlislarimizga ham javob bermasak bo'lmaydi deb hisoblayman. Shuning uchun qo'l telefonim orqali internet tarmog'iga kirib doimiy tarzda muhlislar hamda do'stlarim bilan bog'lanib turaman.

Ruhshona

-Yangi filmda suratga tushayotgan ekansiz?

-Hali noma'lum. Ssenariyni bugun qo'limizga oldik. Shuning uchun hali uni o'qib chiqishimiz kerak. Bosh qahramonni obrazini ko'rish kerak. Ammo shu kinoda o'ynayman degan umiddaman nasib qilsa. Chunki ssenariy tarixini aytib berishdi. Juda ham qiziqarli. Bu filmni nomi hali aniq emas. Ssenariy bilan yaqindan tanishib so'ng xulosamizni aytamiz.

 

-Siz tomondan rad etilgan filmlar ham bo'lganmi? Misol uchun ssenariyni o'qib chiqdingiz va u sizga ma'qul kelmadi.

-Yo'q hali unday vaziyat bo'lmagan.

 

-O'zingizni qanday obrazda ko'rishni hohlardingiz?

-Har xil obrazda ko'rishni hohlardim. O'zimni hamma harakterda sinab ko'rishni hohlayman. Faqatgina komedik rollarda emas, balki yeg'lab, dardli qahramonni obrazini talqin qilishni, muhlislarimiz ko'rib yuraklari jiz etishini hohlardim.

 

-Salbiy obrazdachi?

-Bilasizmi bir tanish aktrisamiz borlar. Do'stlarimizdan biri. Kimligini aytib o'tmayman. Ijodlari davomida salbiy obrazni talqin qilganlarida, bir muhlislari oldilariga kelib, siz yomon odam ekansiz, men sizni yoqtirmayman deb aytib ketgan ekan. Aktrisamiz esa xursand bo'lib, demak rolni qoyillatib o'ynabman deb aytgandilar. Aslida eng qiyin rol ham bu salbiy roldir. Uni chiqarib berish, harakterini ko'rsatib berish kerak bo'ladi. Insonni yuragiga yetkazib berish, insonda shu obrazga nisbatan nafrat uyg'ota bilish bu juda ham katta masala. Men ham salbiy obrazni o'ynashga harakat qilgan bo'lardimku, lekin bilmadim. Menimcha meni tashqi ko'rinishim salbiy qahramonga tushsa kerak. (Kuladi)

Ruhshona

-Qo'shiqchilik borasida ijodingizda milliy tarona ham kuylaganmisiz?

-Juda milliy emasku, ammo klassik yo'nalishdagi ustoz san'atkorlarning qo'shiqlarini, misol uchun "Ko'chalar", "Sayr etaylik" qo'shiqlarini kuylaganman. "Voh-voh to'ram" deb nomlanngan eski folklyor taronani yangicha talqinda kuylashga harakat qilganmiz. Bastakor va shoir Shahnoz tomonidan yozilgan milliy emasku, ammo milliylik ruhiyatini berib turadigan "Asta-asta" deb nomlangan qo'shiqni ijro etdim. Milliy qo'shiqlarimiz yo'q emas bor.

 

-Muxlislaringiz uchun qachon konsert dasturingizni taqdim etasiz?

-Nasib qilsa keyingi yilga konsert dasturimni berishni niyat qilganman. Chunki talablar tushdi. Men juda xursand bo'ldim. O'zim qo'rqamanku, ammo muhlislardan talab tushgani uchun ham konsert qo'yishni reja qilyabman. Baribir o'ylaysizda. Zal to'lmay qolsachi, eplay olmasamchi degan savollar miyyamga kelib qoladi. Ammo hozirdanoq tayyorgarlik ishlarini boshlab yuborganmiz. Konsertni dekaratsiyasidan tortib, dizaynigacha o'ylayabmiz.

Ruhshona

-Yuqorida aytib o'tganingizdek, plakatlaringiz tagida jonli ijro degan yozuvni ko'ramizmi?

-Bilasizmi bizda ya'ni estrada xonandalarida ko'pincha raqsga tushib konsert dasturini taqdim etishadi. Sababi taronalarini ma'lum qismi raqsbp bo'ladi. Endi ham raqsga tushib, ham jonli ijroda qo'shiq kuylash juda ham qiyin. Sababi nafas yo'lingiz tiqilib qolsa, tovush noto'g'ri chiqib qoladi. Keyin falsh ijro etildi degan gaplar tarqala boshlaydi. Shuning uchun raqsbop taronalarda fonogrammadan foydalanib, turib aytiladigan sokin taronalarni jonli ijroda kuylayman.

Ruhshona

-Qiziqarli suhbatingiz uchun tashakkur. Suhbatimiz so'ngida esa muz.uz musiqa javoniga hamda muxlislaringizga chiroyli tilaklaringiz bo'lsa marhamat.

-Muz.uz saytiga birinchi o'rinda har bir yozgan yangiliklaringiz insonlarni kayfiyatini ko'tarishda yodam berishini tilayman. Yuzingizdan hech qachon tabassum arimasin. Har o'tar kuningiz mazmunli o'tsin. Oldingizga qo'ygan maqsadingizga doim yetib yurishingizni tilayman. Doim birinchilar qatorida bo'lib, muhlislaringiz kundan-kunga ortib boraversin.

 

Mazmunli suhbatingiz uchun Ruhshona sizga ham tashakkur. Ijodiy parvozingiz doim yuqori cho'qqilarda bo'lishini tilab qolamiz.

P.S.: Ushbu intervyudan MUZ.UZ sayti ruxsatisiz foydalanish mumkin emas. Barcha ma'lumotlar mualliflik xuquqi bilan himoyalangan.


Kalit teglar: Ruhshona

 
Xurmatli foydalanuvchi, saytimizdan ro'yhatdan o'tishingizni yoki o'z loginingiz yordamida avtorizatsiya qilishingizni tavsiya qilamiz.
 (голосов: 1)

Izohlar

  1. #1 Mehmon muxrik 8 mart 2013 19:26 |

    chidasa buladi

    Izohga javob berish
  1. #2 Mehmon akbar1997 9 mart 2013 18:07 |

    radio boshlovchilarga qiyin bularkan de

    Izohga javob berish

Izoh qoldirish


Kod:
Включите эту картинку для отображения кода безопасности
kod ko`rinmagan holda yangilang

kodni kiriting:

O'Z REKLAMANGIZNI SHU YERDA JOYLASHTIRING