Bu galgi intervyu mehmoni san'atga qadam qo'yganiga ko'p bo'lmagan bo'lsada, lekin qisqa fursat ichida o'ziga yarasha muxlislar orttirib ulgurgan, ko'pgina tanlovlar g'olibasi xonanda Dilso'z! Ijodiy guruhimiz bilan birgalikda "New-Star media" prodyusserlik markaziga tashrif buyurdik va Dilso'z bilan birgalikda qiziqarli suhbatda bo'ldik. Go'zal tabassumi ila bizni kutib olgan Dilso'z barcha savollarimizga to'liq javob berishga harakat qildi.

-San'atga qo'ygan ilk qadamingiz?

-San'atga qiziqishim yoshligimdan uyg'ongan. Musiqa maktabida, so'ng san'at kollejida tahsil olganman. Hozirda esa Navoiy Davlat Pedagogika oliygohini musiqiy ta'lim yo'nalishini tamomladim. San'atga o'zimdan-o'zim emas, o'qib, qiziqishlarim tufayli kirib kelganman. San'atda to'laqonli ijodimni boshlaganimga bir yarim yil bo'ldi. "New-Star media" markaziga kelganimdan so'ng san'atga to'la qadam bosdim deb o'ylayman. Ushbu markazga kelib, omadim kelib tanlovdan o'tdim.

-Tanlovda ijro etgan taronangiz?

-To'g'risini aytsam nima ijro qilishni ham bilmaganman. Sababi, raqobat juda ham kuchli edi. Qo'rquv bosgan. Tanlovdan o'taman deb o'ylamagan edim. Shuning uchun nima bo'lsa bo'ldi deb Lola Yo'dosheva ijrosida "O hayot" taronasini kuylaganman. Shu xonandani taronalarini juda yaxshi ko'rganligim bois uni taronasini ijro etganman va shu bilan birgalikda xorij taronalaridan birini ham ijro etganman. Vaqt o'tib tanlovdan o'tganligim haqida xabar berishgan.

-Bolaligingizda boshqa kasbni orzu qilganmisiz?

-Bolaligimda huquqshunos, ya'ni advokat yoki prokuror bo'lishni niyat qilganman. San'atga qiziqishim bo'lsada, ammo san'atkor bo'laman deb o'ylamaganman. Toshkent Davlat Yuridik oliygohiga xujjatlarimni topshiraman deb, qo'shimcha darslarga ham qatnaganman.

-Huquqshunoslik sohasidan san'at sohasini tanlab ketishingizga nima turtki bo'ldi?

-Bilmadim, inson o'zini bir sohada ko'rar ekan. San'atga bo'lgan qiziqishim ilgarilab ketdi. TV ekranlarda chiqayotgan san'atkorlarni ko'rganimda juda havasim kelar edi. Ko'rik tanlovlarda g'olib bo'lgan xonandalarni ko'rib havas qilganman. Shunda ham san'atkor bo'laman deb emas musiqa o'qituvchisi bo'laman deb Pedogogika oliygohiga o'qishga kirganman. Taqdir taqazosi bilan tanlovda o'tib san'atkor bo'ldim.

-San'atkor bo'lmaganingizda balki huquqshunos bo'larmidingiz

-Yoki yurist yoki o'qituvchi bo'lar edim.

-San'atni tanlashingizda yaqinlaringizdan qarshiliklar bo'ldimi?

-U qadar qarshiliklar bo'lmaganu, birozgina qarshiliklar bo'lgan. Shuning uchun o'qituvchi bo'laman deganman. Bir necha ko'rik-tanlovlarda g'oliblikni qo'lga kiritganimda, yaqinlarim yaxshi so'zlar eshitishganida asta-sekin rozi bo'la boshlashgan. Keyin esa bora-bora bunga ko'nikishdi. Hozir qarshiliklar yo'q.

-San'at sohasidagi qo'lga kiritgan ilk yutug'ingiz?

-Ilk yutug'im bu "Kelajak ovozi-2008" ko'rik tanlovida g'oliblikni qo'lga kiritganman. 2009-yilda esa, Fond-Forumning "Ta'lim granti"ni yutib olganman. Musiqiy yo'nalish bo'lganligi sababli qo'shiq kuylab berganman. Kuylagan taronam ularga ma'qul kelib, shu grandni menga loyiq deb topishgan deb o'ylayman. Bundan tashqari "Nihol mukofoti" ko'rik tanlovining tuman va shahar bosqichidan o'tib, Respublika bosqichidan o'ta olmaganman. O'tgan yili ham topshirib ko'rdim lekin o'tmadim. Bu yil yana harakat qilib ko'rish niyatidaman.

-Nima deb o'ylaysiz, qaysi bir soha vakili bo'lishidan qat'iy nazar insonga ma'lumot kerakmi yoki qobilyat bo'lsa kifoyami?

-Ikkisi ham kerak deb o'ylayman. Lekin shunday insonlar borki, o'qimagan bo'lsa ham haqiqatdan hudo tomonidan tug'ma qobilyat ato etilgan. Ba'zilar borki, qo'lida diplomi bo'lsa ham qobilyati yetishmaydi.

-Shu borada bir savol tug'iladi. Inson o'zi talantli bo'lib tug'iladimi yoki talant inson hayoti davomida shakllana boradimi?

-Menimcha birinchi o'rinda tug'ma taland bo'lishi kerak. Lekin mehnat orqali ham erishsa bo'ladi. San'atda shunday gap bor, bir foiz taland bo'lsa, qo'qson to'qqiz foiz mehnat bo'lishi kerak. Ozgina bolsa ham qobilyati bo'lsa, mehnat qilib, ijodini shakillantirib ko'p yutuqlarga erishishi mumkin.

-Ilk bora sahnaga chiqgandagi hayajonlaringiz

-Ilk bora sahnaga 6-sinfda chiqganman. Albatta unda juda ham yosh edim. Hayajonim juda kuchli edi. Katta sahnaga ilk bora O'zbegim taronasi radiosining 11 yillik bayrami munosabati bilan o'tkazilgan katta gala konsertda chiqgan edim. Juda ham hayajonim kuchli bo'lgan. O'zbek estrada yulduzlari bilan bir sahnada kuylaganimdan ham g'ururlanganman, ham hayajon bosgan.

-Dilso'z sahnaga kirib kelib nima topdiyu, nimalarni yo'qotdi?

-(kuladi) Yo'qotganim yo'q. Menimcha ko'proq topdim. Yaxshi insonlar bilan tanishdim. Ustozim O'zbekistonda xizmat ko'rsatgan artist Sardor Rahimxon bilan tanish emasdik. Hozir esa ular meni ustozim ekanliklaridan juda xursandaman. Katta-katta san'atkorlar bilan tanishdim. Ular meni ustozlarim. Bundan juda faxrlanaman.

-Ustozlaringiz haqida gapirib o'tsangiz

-Ko'p ustozlarim bor. Shu darajaga yetishishimda ularning hizmatlari katta. Birinchi o'rinda Sardor Rahimxon ustozimning hissalari katta. O'zlari san'at sohasida bo'lishlariga qaramasdan menga juda katta vaqtlarini ajratadilar. Ularga rahmat aytaman. Bundan tashqari Feruza Ochilova ustozimdan maqom sir-asrorlarini o'rganib kelaman. Munojat Yo'lchiyeva, Yulduz Turdiyeva. Ulardan ham ko'p narsalarni o'rganganman. Ustozlarim ko'p juda ham. Ularni barchasiga minnatdorchilik bildiraman.

-Hozirgi kundagi ijodingizga kelsak, ijodingizda boshqacha uslublarda, boshqacha imidjlarda ijod qilish niyatingiz bormi?

-Bilmadim bu haqda o'ylab ko'rmadim. Ammo kliplarimni bir-biriga o'xshab qolmasligiga harakat qilaman. Imidjimga kelsak, bir-biriga o'xshamagan imidjlar yaratishga harakat qilaman. Yaqinda yangi klip olishni rejalashtirganmiz. Shu klipimiz uchun yangi imidj ustida ishlamoqdamiz.

-Tarona va kliplaringizga g'oyalarni qayerdan olasiz?

-Ko'pincha rejissiyorlar bilan maslahatlashgan holda ularni fikrlarini yuz foiz bajaramiz. Sababi, ular o'z kasbining ustalari. Ularga ishonamiz.

-Hozirda ko'p xonandalar she'r yozishadi, kuy bastalashadi. Sizda ham shunday qobilyatlar bormi?

-Yoshligimda shunday qobilyatim bor edi. She'rlar yozib turar edim. Hozir qofiyalik biron narsa yozib berishim mumkin. Lekin u shoirlarnikiday bo'lmaydi.

- Hozirda qaysi shoir va bastakorlar bilan ishlamoqdasiz?

-Ko'p shoirlar bilan ishladik. Jumladan, Ra'no Yarasheva, Eldor Qayumov, Botir Ergashev, Nodir Azimov. Bastakorlardan Iqbol Muhammad, Bobur Umarov bilan ishlab kelamoqdamiz.

-Ijodingiz boshlanganidan to shu bugunga qadar nafaqat ijod balki hayotingizda yaxshi taraflama o'zgarishlar ro'y berdimi?

-Albatta. Oldin juda ham tortinchoq edim. Hozir esa ko'pchilikning ichiga qo'shilib ancha kirishimli insonga aylandim. Ko'pchilikni ko'rib fikrlash doiram kengaydi. Fe'l-atvorimda yaxshi taraflama o'zgarishlar ro'y berdi deb o'ylayman.

-Ijro etgan duetlaringiz haqida

-O'zbekiston xalq artisti Ozodbek Nazarbekov, Sherzodbek va Ziyoda bilan birgalikda duet ijro etganmiz. Bu insonlar bilan birga qo'shiq kuylaganimdan boshim ko'kga yetgan.

-Duet takliflari tushganida duetdoshingizni qaysi jihatlariga ko'ra rozi bo'lasiz? Mashhurligi muhimmi yoki she'r va musiqa g'oyasimi?

-Mashhurlik birinchi o'rinda turmaydi. Birinchi o'rinda duetdoshimni ovoziga, qobilyatiga qarayman. Yaxshi qo'shiq ijro eta oladigan inson bo'lsa, g'oyasi chiroyli bo'lsa albatta rozi bo'laman. Barchani esida qoladiga duet bo'lishini hohlayman. Undan tashqari men tanlamayman, ular meni tanlashlari mumkin. Sababi, hali yoshman.

-Duet takliflari tushyaptimi

-Takliflar tushdi. Lekin rad qildik. Chunki duetlar ko'payib ketdi. Kuylagan duetlarimni hali chiqmaganlari bor. Oldin ularni chiqarishimiz kerak. Undan so'ng albatta yana duetlar kuylash niyatim bor.

-Asosiy yutug'im nimada deb bilasiz? Sizni qanday insonlar qatoriga qo'shish mumkin? Tinmay mehnat qiladiganlar yoki omadi chopganlar

-Inson uchun menimcha har ikkisi ham kerak. Bu yo'lda ancha mehnat ham qildik. Bir joyda o'tirmasdan o'z ustimda mehnat qilmoqdaman. Anchayin ko'p to'siqlardan o'tdim. Bariga mehnat orqali erishdim deb o'ylayman. Lekin omad ham kerak. Ba'zilar juda ko'p mehnat qilsa ham ko'tarila olmaydi. Men esa shu darajalarga erishishimda omadim ham chopdi deb ayta olaman.

-Tanqidga munosabatingiz?

-Tanqidga munosabatim yaxshi albatta. O'rinli tanqid bo'lsa o'sha xatoni qaytarmaslikka harakat qilaman. Agar noo'rin tanqid bo'lsa jaxlim chiqadi.

-O'zingizni chetdan muxlis sifatida tanqid qila olasizmi?

-Ko'p tanqidlar bildirgan bo'lar edim. (kuladi) O'zimni kamchiliklarimni bilaman. Masalan: sahnada yaxshi ishlay olmayman. Tomoshabinlarni o'z harakatlarim bilan qiziqtira olmayman. Hozir shu sahna xarakatlari ustida ham ishlayapman. Sababi, kelgan tomoshabinlarni qiziqtira olish kerak, kayfiyatini ko'tara olish kerak. Ovozimda, jonli ijroda ko'proq ishlashim kerak. Fonogrammaga o'rganib qolishni hohlamayman. Shuning uchun tinmasdan vokal darslaridan saboq olib, o'zimni ustimda juda ham ko'p ishlashim kerak.

-Kino olamiga qanday qaraysiz? Xonandalar filmlarda sur'atga tushishi urf bo'lgan. Siz ham kinoda rol o'ynashni hohlarmidingiz?

-Kino sohasiga juda ham qiziqaman. Filmlarni tamosha qilishni yaxshi ko'raman. Aktrisalik qobilyatim yuz foiz bor deya olmayman-ku, lekin qobilyatim biroz bor. Agar ishlasam bu taraflama ham chiqishim mumkin.

-Kino rejissiyorlardan takliflar tushdimi?

-Takliflar bo'ldi. Ammo rozi bo'lmadik. Sababi, ssenariy bizga to'g'ri kelmadi va menga hali vaqtli deb o'ylayman. Birinchi ijodda o'z o'rnimni topib, keyinchalik yaxshi bir ssenariyli film bo'lsa balki Davlat filmlarimi? (kuladi) Bilmadim taklif tushadimi yo'qmi Lekin orzu qilaman. Agar taklif qilishsa jon deb rol o'ynagan bo'lar edim. Faqat bir narsa menga yoqmaydi. Filmlarda ko'r-ko'rona rol o'ynash. Mashhurlik olib kelishi uchun shunchaki filmda sur'atga tushmaslik kerak deb hisoblardim.

-San'at sohasida o'zingiz haqingizda eshitgan eng nohush mish-mish?

-Ko'pincha meni xonanda Ziyodaga taqlid qiladi deyishadi. Ziyodaga raqib bo'lmoqchi, uni ko'rolmaydi degan gaplarni eshitganman. (kuladi) Men Ziyodaga taqlid qilmayman. Meni birorta san'atkorga g'arazligim yo'q. Aksincha shunday yaxshi san'atkorlarga havas qilaman. Taronalarini eshitaman. Ijodini kuzataman. Lekin taqlid qilmayman. Xonanda Ziyodaga hurmatim juda baland. Ijodini haqiqatdan ham yaxshi ko'raman. U bilan munosabatim ham yaxshi. Dugonamiz. Boshqa yomon mish-mishlar bo'lgani yo'q.

-O'zingizni qanday fe'l-atvorli inson deb bilasiz?

-Ishonuvchanman. Ammo har bir narsaga, ya'ni jiddiy hayotiy narsalarda hadeb ham ishonib ketavermayman. Ko'pchilik hayotda aldanib qoladi. Menga qandaydir takliflar bildirishsa, albatta yaqinlarimdan maslahat so'rayman. Ana undan keyin biror qarorga kelishim mumkin.

-Fe'lingizdagi hurmat qilgan jihatingiz?

-O'zimda hurmat qiladigan tarafim bu yon-atrofdagilarni eshita bilishim. Yaqinlarimni har bir so'zlarini eshitishga haraklat qilaman. Dardingizni kimgadur aytsangiz eshitmasligi, parvo qilmasligi mumkin. Men esa do'stlarimni har bir gapirgan gap-so'zlarini oxirigacha tinglashga harakat qilaman. Maslahatlarimni ham ayamayman.

-Xuddi shuning aksi, ya'ni felingizda o'zingizga yoqmaydigan taraflaringiz ham bormi?

-Dangasaligim (kuladi). Ko'p emas, ozginagina dangasaligim bor deb o'ylayman. Agar dangasa bo'lmaganimda ko'p narsalarga erishishim mumkin edi. Keyin-keyin deb ancha-muncha narsalarni qo'ldan boy berganman. Shu tarafim yoqmaydi.

-Do'stlikka ishonasizmi? Yaqin do'stlaringiz bormi?

-Albatta. Yaqin do'stlarim bor. Yoshligimdan birga o'sgan dugonalarim bor. Biz yoshlikdan beshta qiz dugona bo'lganmiz. Haligacha birgamiz. Ularni juda ham yaxshi ko'raman. Barcha sirlarimni ularga aytaman. Yaxshi-yomon kunlarda doim birgamiz. Xursandman shunday do'stlarim borligidan.

-Hayotingizda muhabbatning o'rni qay darajada?

-Muhabbat bor joyda doimo yaxshilik bo'ladi. Muhabbatga juda yaxshi qarayman. Muhabbatga ishonaman. Har doim insonlar bir-biriga bo'lgan muhabbatini yashirmasligini, Vatanga, oilaga, do'stlariga, sevgan yorlariga bo'lgan muhabbatlarini ayamasliklarini hohlardim.

-Agar tanlash kerak bo'lganida san'at yoki oila. Qay birini tanlagan bo'lar edingiz?

-Hech ikkilanmay oilani tanlayman.

-San'atdan voz kechgan holdami?

-Albatta. Oila birinchi o'rinda

-Ozmi ko'pmi o'zingizga yarasha muhlislar orttirdingiz? Mashhurlikdan cho'chigan vaqtlaringiz bo'lganmi?

-Har bir san'atkor mashhur bo'lishni hohlaydi. Muxlislarim ko'p bo'lishini hohlayman. Ammo juda ham mashhur bo'lib ketishdan qo'rqaman. Ko'pincha o'rtada bo'lganim yaxshi deb o'ylayman. Juda ham mashhur bo'lish qiyin. San'atini ko'tarilgan choqqisida ushlab qolish ham qiyin. Bir ko'tarilib keyin tushib ketishi ham hech gap emas. Juda ham mashhur bo'lish katta mas'uliyat talab qiladi. Shunday insonlar ham bo'lganki mashhurligidan yon-atrofdagilarni tanimay ham qolishadi. Shu narsadan qo'rqaman. Yulduzlik kasalligi deyishadi buni.

-Sizda hali bu kasallik alomatlari sezilmayaptimi?

-Bilmadim. Bu narsani atrofdagilar sezishi kerak. O'zimda bunday o'zgarish sezganim yo'q. Boshida qanday bo'lsam hali ham shundayman. Bilasizmi, do'stlarimga, "agar menda qandaydir o'zgarish sezilsa darhol yuzimga aytinglar"- deb aytib qo'yganman. Chunki inson o'zi sezmaydi. Yon-atrofdagilari buni payqashi mumkin.

-Hayotingizda sizga nisbatan qilingan xatolarga qanday qaraysiz? Kechirimli insonlar qatoriga kirita olasizmi o'zingizni?

-Hayotda har bir inson xato qiladi. Ammo kechirib bo'lmas xatolar ham bo'r. Kechirish qiyin bo'ladi. Shu insonga nisbatan ishonchingiz yo'qoladi. Ammo kechirish kerak deb hisoblayman.

-Xushomadga munosabatingiz?

-Ko'pincha shunday holatlar bo'ladiki, mashhurlikka erishganingizdan so'ng barcha sizga xushomadgo'y bo'lib qoladi. Ko'p yaxshi gaplar aytishadi, maqtashadi. Menda shunday holatlar bo'lgan. Oldin bunday munosabatda bo'lmagan insonlar keyinchalik shunday chiroyli munosabatda bo'lishganida rosti hayron bo'lganman. Huddi soxta munosabatda bo'layotgandek go'yo. Shunday voqealardan biroz jaxlim chiqadi.

-Hozirda jonli ijroga talab kuchli. Balki kelajakda sizdan 100% jonli ijroda konsert taqdim etarsiz?

-Albatta konsert qo'yish niyatim bor. Faqat hozir emas. Hali ozgina vaqt bor. Hali mehnat qilishim kerak. Muhlislarim ko'payib, talablar tushgandan so'ng albatta konsert qo'yaman. Haqiqatdan hozirgi kunda jonli ijroga talab kuchli. Yaqindagina "Mardi-maydon" nomli ko'rik-tanlovida "Begim" qo'shig'im bilan ishtirok etdim. Bu tanlovda faqat jonli ijroda qo'shiq kuylanadi. Qo'limdan kelganicha jonli ijroda kuylab berdim. Hayojonlar bo'ldi. Jonli ijro baribir katta mas'uliyat talab etadi. Men o'ylaymanki, jonli ijro 100% bo'lmaydi. Ustozlarim ham buni ko'p bora ta'kidlashgan. Ming zo'r bo'lsang ham odamlar orasida 50% ovozing chiqadi deyishadi. 100% chiqarish uchun albatta juda ham ko'p ishlash kerak. Sahnalarda ko'proq jonli aytish kerak. Xudo hohlasa 100% jonli ijroda konsert berish niyatim borku, lekin bu narsani amalga oshira olamanmi buni bilmadim. Lekin konsertim 50% albatta jonli ijroda bo'ladi. Sababi, konsert davomida charchab qolishi, raqslar bilan birgalikda nafas yetishmay qolishi mumkin.

-Shou-biznes olamida idealingiz bormi?

-O'bekiston xalq artisti Nasiba Abdullayeva. Shu insonni juda ham hurmat qilaman. Qo'shiqlarini ko'p tinglayman. Nafaqat ijodini balki inson sifatida ham juda qadrlayman. Haqiqatdan ham san'atkor shunday bo'lishi kerak deb o'ylayman. Juda ham madaniyatli ayol. Bundan tashqari Munojat Yo'lchiyeva, Gulsanam Mamazoitova, Yulduz Turdiyevalarga juda ham havas bilan qarayman.

-Baxt sizningcha nima?

-Baxt bu inson hayoti davomida erishgan yutuqlari. So'g'ligi, oilasi, yaqinlari borligi baxt. Yashab turgani, Shu jannatmakon O'zbekistonda tug'ilib o'sgani bu juda-juda katta bir baxt. Men ozimni baxtli deb hisoblayman.

-Suhbatimiz so'ngida tilaklaringiz bo'lsa bildirishingiz mumkin

-Avvalombor sizlar bilan ko'rishib turganimdan juda ham xursandman. Kelganingizdan boshim ko'kga yetdi. Yaqindagina kirib kelgan Ro'zayi-Ramazon oyi barcha musulmon ahliga muborak bo'lsin. Shunday ulug' kunlarga yetkazganiga ming shukurlar aytaman. Barcha-barchaga baxt, omadlar tilab qolaman. Sog'lik-salomatlik hech birlarini tark etmasin. Muz.uz saytiga omad tilayman. Bundanda yuqori cho'qqilarga erishishini tilab qolaman.

O'z navbatida biz ham Dilso'zga ijodiy guruhimiz nomidan xuddi shunday chiroyli tilaklarni bildirib qolamiz. Qimmatli vaqtini ayamay biz bilan qiziqarli suhbatda bo'lgani uchun tashakkur bildiramiz. Ijodiga ulkan zafarlar, muvvaffaqqiyatlar tilaymiz.

(P.S.: Ushbu suxbatdan ko'chirma olish yohud foydalanish mumkin emas. Barcha huquqlar mualliflik huquqlari asosida himoyalangan.)