Assalomu alaykum hurmatli MUZ.UZ sayti muhlislari. Siz uchun bugun intervyu bo'limimizni tashkil qildik va bizning ilk intervyuyimiz mehmoni “Nihol” mukofoti sovrindori, betakror xonanda, o'ziga xos ovoz sohibasi hamda aytishlaricha o'jar san'atkor bo'lmish Ziyoda.

- Demak ilk savol quyidagidan iborat. Yoshlarimizning sevimli xonandasi bo'lmish Ziyoda qanday ijodiy yangiliklar bilan band?

- Albatta hozirda yangidan-yangi taronalar yaratish bilan bandman. Sho'xgina bo'lgan bir necha taronani yaqin kunlarda kliplari bilan birgalikda muhlislar hukmiga taqdim etmoqchiman.

- Ziyoda, so'nggi paytlarda biz sizni ko'plab soundtrek va filmlarda ko'rmoqdamiz. Bu holat sizni qo'shiqchilikdan uzoqlashtirishidan qo'rqmaysizmi?

- Aksincha, kinoda o'ynash yoshligimdagi orzularimdan biri edi. Shu sababli ham rol o'ynashga o'zim juda ham qiziqaman. Lekin asosiy e'tiborimni qo'shiqchilikga qaratganman.

- Aynan filmlar haqida gap ketgan ekan, hozirda sizni filmda rol ijro etishingiz bo'yicha qarshiliklar yoki e'tirozlar vujudga kelmaydimi?

- Ba'zi hollarda uchrab turadi. Lekin hammasini to'g'ri qabul qilishga hamda o'z kamchiliklarim ustida ishlashga doimo harakat qilaman.

- Ko'pchilikning aytishicha siz o'jar san'atkor sifatida gavdalanar ekansiz. Lekin suxbat davomida buni aksiga guvox bo'lmoqdaman.

- Ha, o'zimga yarasha o'jarligim bor. Lekin juda ham o'jar emasman. Hayotda o'g'ir, bosiq insonman.

- Keling bir oz o'tgan vaqtga qaytsak. Yani bolaligingizga.

- Menimcha bolaligimda juda ham sho'x qiz bo'lganman. Do'stlarim faqat o'g'il bolalardan iborat bo'lardi. San'atga kirib kelishim esa “Tantana” guruhidan boshlangan. Aynan ushbu guruhda san'atning sir asrorlarini bolaligimdan o'rgana boshlaganman. Menimcha eng beg'ubor damlarim desam ham bo'ladi. Jon deb o'sha paytga qaytgan bo'lardim.

- Ilk bora va hozirgi saxnaga chiqqan obrazingiz orasida juda katta farq bor. Buni qanday ta'riflay olasiz?

- Albatta ilk saxnaga chiqqan paytimdan hozirga qadar juda ko'p bora o'z ustimda ish olib bordim. Bundan tashqari muhlislarga ham birhillik yoqmasa kerak. Shu sababli ham doimiy ijodiy izlanishlar olib boraman.

- Kuylayotgan taronalaringizda ham buni sezsa bo'ladi. So'nggi paytlarda jiddiy yo'nalishdagi taronalaringiz ko'paygan.

- Yosh ulg'ayib borgan sari shunga yarasha jiddiy taronalarni ko'roq kuylarkan.

- Bilamizki siz bir necha ustoz san'atkorlarimiz taronalarini kuylab o'tgansiz. Kelajakda yana shunday ustoz san'atkorlarimiz taronalarini kuylash niyatingiz bormi?

- Faxriddin Umarov ijrosidagi taronalarni sevib tinglaganim uchunmi bilmadim, aynan ushbu ustoz san'atkorimiz repertuaridan o'rin egallagan bir taronani yaqinda kuylash niyatim bor.

- Duetlar borasida ham sizni ko'p bora ijodingizga guvox bo'lganmiz. Yaqin orada yana yangi duetlar guvoxi bo'lamizmi?

- To'g'risi takliflar bo'lmoqda va bundan xursandman. Yangi duetlar bo'yicha musiqa va so'zlarni ko'rib chiqmoqdamiz. Ko'ngilga maqulini balki yaqin kunlarda tanlasam ajab emas.

- Duetlarning ko'pligi, o'zingizning ijodiy yo'nalishingizdan uzoqlashtirib yubormaydimi?

- Menimcha yo'q. Umuman olganda duetlarni ham meyorida kuylashga harakat qilaman.

- Hozirgi yo'nalishingizdan tashqari yana qaysi yo'nalishda kuylagan yohud kuylab ko'rgan bo'lar edingiz?

- Yaqin kunlarda ijodimda yangicha bir tarona taqdim etish niyatidaman. Ushbu tarona rok yo'nalishida bo'ladi. O'zimga ham to'g'risi qiziq tuyulmoqda. Shu sababli ham o'zimni bu yo'nalishda sinab ko'rmoqchiman.

- Sizningcha muhabbat tushunchasi bu…?

- Muhabbat bu bir-biriga mexrli, oqibatli bo'lish, bir-biriga to'laqonli ishonish menimcha. Lekin o'zim hali sevgi-muhabbatga hali yetib bormaganman.

- Bo'sh vaqtingizda nimalar bilan shug'ullanasiz?

- San'atkorda bo'sh vaqt doimo kam bo'lgan. Lekin bo'sh vaqtim bo'ldi deguncha oilam davrasida bo'lishga harakat qilaman. Bundan tashqari raqsga tushishni juda ham yaxshi ko'rganim uchun raqsga ham tushib turaman.

- Bu qiziqishlaringizdan birimi yoki shunchaki vaqt o'tkazish?

- Qiziqishim desam ham bo'ladi. Bundan tashqari akvariumda baliq boqishni va unga qarashni ham qiziqib bajaraman.

- O'zingizni 20 yildan keyin qanday tasavvur qilasiz?

- Hozirgi shaddod qizdan anchagina og'ir va bosiq. Ijod borasida esa jiddiy va sevimli taronalar kuychisi sifatida.

- Qisqagina suxbatimiz so'ngida muhlislarga tilaklaringiz.

- Avvalo muhlislarga tilaklarim, doimo yuzligidan tabassum arimasin. Barchaga baxt doimo hamroh bo'lsin.