Avvalgi yangiliklarimizdan birida Davron Ergashev ijodiga oid "Ro'paramda" taronasi haqida so'zlab o'tgan edik. Ushbu tarona uchun suratga olingan klipni saytimiz orqali tomosha qilishingiz mumkin. Jamshid Xojiniyozovni avvallari biz radio, tv hamda tadbir boshlovchisi sifatida tanir edik. Ushbu klipda esa ijodkor ilk bora Davron Ergashev taklifiga binoan o'zini rejissyorlik sohasida sinab ko'rdi. Ijodkor o'zining ilk ishini kamchiliklari bo'lsa, qattiq tanqid qilmaslikni so'rab o'tdi. Bundan tashqari Jamshid Xojiniyozov ko'plab xonandalarimiz kliplari uchun ssenariylar yozish bilan band. Lola, Mavzuna, Manzura, O'lmas Olloberganov, Ziyoda hamda boshqa ijodkorlarning taronalari uchun ssenariylar ketma-ketligi tez orada klip ko'rinishida sizga taqdim etiladi. Yil so'ngiga qadar aynan Jamshid Xojiniyozov g'oyasi asosida yangi yo'nalishda yangi badiiy film ham suratga olinishi rejadan holi emas. Hozircha bularning ko'plari niyat hamda maqsad. Ular qay holatda amalga oshadi, buni vaqt ko'rsatadi. Kutamiz...