Oktabr oyiga nazar soladigan bo'lsak, unda bir necha yulduzlarimizning ko'pdan beri kutilgan konsertlari mavjudligini ko'rishimiz mumkin. Bizga yetib kelgan ma'lumotlarga binoan oktabr oyi estafetasini Doston Ubaydullayev ochib berar ekan. 4-5 oktabr kunlari bo'lib o'tadigan "Sog'inib" deya nomlangan ushbu konsertni nafaqat xonandaning o'zi, balki uning ko'plab muxlislari sog'ingan hamda kutishgani aniq.

Undan so'ng esa Munisa Rizayeva o'zining jonli ijrodagi konsert dasturini taqdim etishi kerak. 7-8-9 oktabr kunlari bo'lib o'tishi kutilayotgan "Qalbim navosi" nomli konsert dasturiga hozirda tayyorgarlik ayni avjida.

Undan so'ng esa Serenada Ijod guruhi vakillarining 12-oktabr kungi "Bu bayram" nomli bir kunlik konsert dasturi taqdimoti o'ziga hos yo'nalishga qiziquvchilarni Istiqlol san'at saroyiga chorlashadi.

Yilning eng kutilgan konsert dasturlaridan biri bo'lgan Ulug'bek Rahmatullayevning "Shirin orzu" nomli konsert dasturi ko'pchilik orziqib kutayotgan bo'lishi aniq. 16-17-18 oktabr kunlari bo'lib o'tuvchi bu yilgi yakkaxon konsert dasturida avvalgilari kabi o'ziga hos yangiliklarni sizga taqdim etadi. Darvoqe, O'tgan yilgi konsert dasturi anshlag bo'lganligi sababli bir necha kunga uzaytirilgan edi. Bu yilgi dasturda ham qo'shimcha kunlar bo'lishi mumkin. Buni esa konsertga yaqin aniq bilib olishimiz mumkin.

O'zbekistonda xizmat ko'rsatgan artist Abdurashid Yo'ldoshev ham bu yil barchani Istiqlol san'at saroyiga chorlash niyatida. 29-30 oktabr kunlari "Ox mani vatanim bu" deya nomlangan konsert dasturi milliy estradaga shinavandalarni befarq qoldirmasligi aniq.

Oktabr oyining so'nggi kuni, ya'ni 31-oktabr hamda 1-2 noyabr kunlari esa estradamizning shaddod ijodkori Ziyoda o'zining "Sevadi yorim" deya nomlangan konsert dasturini taqdim etishi rejalashtirilgan.

Xo'sh xurmatli mushtariy, siz qaysi xonanda konsert dasturiga tushishni rejalashtirgansiz?