So'nggi paytlarda deyarli barcha taronalari xit darajasiga ko'tarilayotgan, estrada olamida o'zining munosib o'rniga ega bo'lgan xonanda, "Nihol" mukofoti sovrindori Ulug'bek Rahmatullayev shu kunlarda o'zining yakkaxon konsert dasturiga qizg'in tayyorgarlik ishlari bilan band. Biz esa konsert oldidan xonanda bilan qiziqarli suhbatda bo'ldik va ushbu qiziqarli intervyuyimizni siz bilan birga baham ko'rishni joiz deb topdik.

-Avvalo xush kelibsiz! Tez orada konsert dasturingiz. Tayyorgarliklar, hayajonlar qay darajada?

-Avvalo taklifingiz uchun rahmat. Bilasizmi konsert dasturimdan oldin hayajon u qadar kuchli emasku, ammo charchash kuchli. Sababi konsert berish oson emas. Yugur-yugurlar juda ham ko'p. Qolaversa, men o'zim bir narsani hech qachon birovga topshirib qo'yib, ko'nglimni to'q qilib, oxirida hammasini qabul qilib olish hislatim yo'q. Har bir narsani ustida o'zim bo'lishim kerak. O'z ko'zim bilan ishlarimni kuzatib bormasam ko'nglim joyiga tushmaydi. Chunki har bir bo'layotgan ssenariy, sahna dekoratsiyasi yoki bo'lmasam, oddiygina misol, ko'chalarga osilayotgan bannerdan tortib, radio rolik, reklamalargacha o'zim ustida bosh-qosh bo'laman. Albatta bularning barchasi Panterra studio bilan birgalashib qilinmoqda. Hayajonga keladigan bo'lsak, hayajon ham bor o'ziga yarasha. Ammo hozir hayajonga qaraganda charchash ko'p bo'lsa, konsert kuni charchashga qaraganda hayajon kuchli bo'ladi. Konsert dasturi o'tib bo'lgandan so'ng esa, zal to'lib tursa, muxlislar olqishi bilan bu ikki narsa o'z-o'zidan chiqib ketadi.

-Konsertda muxlislaringiz uchun syurprizlar bo'ladimi?

-Judayam ko'p syurprizlar bor. Birinchi o'rinda 6 ta yangi qo'shiq ijro etaman. Menimcha bu eng katta syurpriz bo'lsa kerak. Undan tashqari duet taronalar ham ko'p. Yangiliklar bor. O'zbekiston xalq artistlari bilan kuylagan duetlarim ham bor. Bunga muxlislarimning o'zlari konsert dasturimda guvohi bo'ladilar. Bundan tashqari meni repertuarimda anchadan beri, ya'ni agar o'n yillik ijodimni oladigan bo'lsak, men hali hech kuylamagan yo'nalishda, kuylay olmagan mavzuda, hali unga botina olmagan yoki bo'lmasa ko'nglimga yoqadigan mavzudagi qo'shiqlarim yo'q edi. Shunday mavzudagi taronamni topdim. U ham bo'lsa "Ona" haqidagi qo'shiq, axiri meni repertuarimda bor. Xudo hohlasa 26-27 oktabr kunlari konsert dasturimda ushbu taronamni premyerasi bo'lib o'tadi.

-Konsertdagi imidjingiz borasida kim ishlamoqda.

-O'zim. Shu paytga qadar bir shiorim bor. Aksariyat hollarda xonandalar sahnaga chiqqan vaqtlarida har xil toshlar, yaltir-yultur kiyimlar bilan chiqishadi. Men bu narsani cheklab o'taman. Sababi, bu meni tabiatimga to'g'ri kelmaydi. Shuning uchun shu vaqtgacha sahnaga kiyib chiqadigan kiyimlarim yoki bo'lmasa bu safargi konsertimga to'la-to'kis o'zimni didimga yoqqan, sahnada qulay bo'la oladigan va hali meni unday uslubda ko'rishmagan, oddiygina kostyum-shimlarda, klassikaga qaratilgan uslubda namoyon bo'laman.

-Konsertingizda jonli ijro ham bo'ladimi?

-Albatta bo'ladi.

-Nechta taronani jonli tarzda kuylaysiz?

-Bu endi kayfiyatga bog'liq. Misol: o'tgan safargi konsertimda "Ota", "Bevafo" taronalarimni jonli ijro etganman. Kayfiyatga qarab. Balki konsertni yarmi jonli tarzda bo'lar. Bu meni toliqishimga, charchashimga bog'liq. Bir yomon narsani aytishim mumkin. Konsert oldidan tovush bo'g'imlarim qattiq kasallanib qolganligi bu meni konsert uchun tug'dirayotgan eng katta muammoyim. Buni hozir oldi olinmasa tovush ham yo'qolib qolishi mumkin. Juda ham qo'rqinchli ehtimoli bor. Shuning uchun eng kerakligi men o'ylaymanki, qo'shiqlarimni muxlislarimga taqdim etish va ular bilan diydor uchrashish.

-Hozirda muxlislar tomonidan jonli ijroga talab kuchli. Vaqti soati kelib Ulug'bek Rahmatullayevdan 100 foiz jonli ijroda konsert dasturini kutsak bo'ladimi?

-Albatta. Bu menimcha har bir san'atkor orzusi bo'lsa kerak. 100 foiz jonli ijroda konsert berish uchun harakat, kuch, iroda kerak. Konsert jarayonida hayajon o'rnini ma'suliyat egallaydi. Biz ham shu hayajonni yengib o'ta olsak, xudo hohlasa 100 foiz jonli ijroda konsert berish niyatim bor. Ammo bu konsertimda albatta muxlislarim bilan birga biron-bir qo'shiqlarimni jonli aytish niyatim bor. Masalan: "Jooonim san mani joooonim?." va davomini muxlislarim davom ettirib ketishadi. Va yana bir alohida ahamiyatga ega, noan'anaviy yangilik, bu-konsertimda boshlovchi bo'lmaydi. Bo'lsa ham u konsertimga "shoumen" sifatida taklif etiladi. Hozirgi kunda yoshlarimizni e'tiborida bo'lgan, ham boshlovchilik san'atini ustasi, shu bilan birga "shoumen"likka davogar bo'la oladigan bir ijodkor bor. Uni nomi hozircha sir. Juda ham katta syurprizimiz bor, ya'ni buni video holatida muxlislarimiz ko'rishlari mumkin bo'ladi.

-Hozirgi kundagi O'zbek estradasiga munosabatingiz? Sizningcha O'zbek san'atiga nima yetishmaydi?

-Ustoz yetishmaydi.

-Ustoz ko'rmagan san'atkorlar ko'p to'g'rimi?

-Albatta. Shaxsan o'zim ham ijodimni boshida o'zimga nisbatan ishonch, o'zimga nisbatan kuch, shijoat, g'ayrat, yonib ijod qilishga bo'lgan tuyg'u bor ediku, ammo ustoz ko'rmasdan ijod qilish noto'g'ri ekanligini vaqt davomida tushundim va o'sha vaqtda o'tgan uch-to'rt yillarimga achinaman. Lekin undan so'ng bilib, ustoz ko'rib, Farruh Badalboyev ustozimni topib, u inson menga bergan saboqlari oqibatida bugungi kunda qoqilishim mumkin bo'lib, ammo ustozim bergan o'gitlari sabab qoqilmay kelayotgan, ijodda qanday to'g'ri yo'l tutish kerakligini o'rganganligim bu menga katta yutuq bo'ldi. Yangi chiqayotgan san'atkor bo'ladimi, yoki qobilyatli bo'ladimi baribir ustoz ko'rish kerak. Ustoz ko'rgan uzoqqa boradi degan maqol bor. Ustoz degani bu sizga qandaydir talant yoki iste'dod qo'shib qo'ymaydi. U o'zingiz bilmayotgan iste'dodingizni, qobilyatingizni qay darajada ekanligini tushuntirib beradi. Ya'ni xonada qayerda nima joylashganligini ko'rsatib beradi.

-Bugungi kunda tinglovchi yengil-yelpi qo'shiqlarga o'ch bo'lib qolishganday, bu borada tanlovlarni sayozlashib ketishiga xonandalarni o'zi sababchi emasmikin?

-Bilasizmi, ikki xil ijod qilish bor. Muxlisni o'zingizni darajangizga chiqartirib ijod qilish bor yoki muxlisni darajasiga tushib ijod qilish bor. Qo'lidan kelsa shu ikkisini ham ushlab turgan holda ijod qilish ham bor. Siz aytayotgan haligi yengil-yelpi qo'shiqlaringizni agar shunday deb atash mumkin bo'lsa, uni ham muxlislari juda ko'p. Shunday taronalarga talab ko'p bo'lsa demak, o'z-o'zidan ma'lumki u yengil-yelpi emas. Har bir insonni eshitmaslik uchun o'zini xaqqi va huquqi bor. Misol uchun: radioda yengil-yelpi tarona qo'yilayotgan bo'lsa, uni o'chirib qo'yishi mumkin. Taronalarni yengil-yelpi deyish noto'g'riroq-ku, ammo taronaga nisbatan biroz ma'suliyatli bo'lib, ustoz ko'rib, matniga, musiqasiga e'tiborli bo'lgan holda vokal bilan jiddiy shug'ullansa, yengil-yelpi degan tushunchalar o'z-o'zidan yo'qolgan bo'lar edi. Lekin men baribir biron-bir qo'shiqni dunyoga kelguncha bo'lgan mehnatini, mayli u qanchalik zo'r qo'shiq kuylamasin, ammo u qo'shiqni yurak bilan kuylaydi. Shuning uchun unday taronalarni u qadar qoralab bo'lmaydi. Ammo professionallikka intilgan holda ijod qilish bu maqsadga muvofiq. Men hozirgi kunda yengil-yelpi qo'shiqlar ko'payib ketti degan fikrga unchalik qo'shilmayman.

-Bu savolni berganimni sababi taronalar tez eskiryapti?

-Endi taronalarni tez eskirib qolishi bu ijodkorni proffessionallik bilan yondoshmagan xatolari hisobiga shunday bo'ladi. Oddiy misol: aranjirovkaning ovozi kundan-kunga o'zgarib ketyapti. Bu soha bo'yicha internetda yangi takliflar bor. Ularni oxirgisini iloji boricha qilmasa, tarona tez eskirib qolyapti. Sababi shu deb o'ylayman.

-Ko'p muxlislaringiz xorij kuylaridan ko'chirilgan holatda qo'shiq kuylashingizga qarshiliklar bildirishmoqda. Ammo aynan shu taronalaringiz xit bo'lgani barchaga ma'lum. Lekin nima uchun ketma-ket xorij kuylarini ko'chirib kuyladingiz? Yoki o'zbek bastakorlaridan ko'nglingiz to'lmayaptimi?

-Birinchidan, o'g'irlab aytyapti degan gaplar qulog'imga chalinadi. Qo'shiqni o'g'irlab bo'lmaydi. O'g'irlik shunday narsaki, biron narsani olasiz va uni uyingizga qo'yib qo'yasiz. Uni hech kim ko'rmaydi. Birovga taqdim etgan narsangizni esa o'g'irlik deb atab bo'lmaydi. Agar buni o'g'irlik deydigan bo'lsak, hozirda butun O'zbekistonda to'ylarda kuylayotgan hamma xonandalarni o'g'riga chiqarib qo'yish kerak. Afsuski, siz hozir o'ylayapsizki, to'ylarda navbatchi xonandalar faqat o'zini taronasini ijro etadimi? Yo'q. Birinchidan, butun O'zbekistonning qo'shig'ini kuylaydi. Ikkinchidan, to'yning egasi kelib biron-bir chet el xonandalari ijro etgan taronasini so'rab, ijro qilib bering desa, uni ko'nglini xursand qilish uchun aytib berish bu ham o'g'irlikmi? Yo'q unday emas. Men shaxsan hozir xit bo'lgan qo'shiqni olib kuylayotganim yo'q. Bundan uch yil, besh yil, o'n yil oldin kuylangan, ammo hech kim eshitmagan, afsuski shunaqa chiroyli qo'shiq qolib ketgan taronalarga ikkinchi parvoz ulashish maqsadida va o'zimga juda ma'qul kelganligi bois, qolaversa maqtanish emas, men kuylaganimdan so'ng o'sha ijodkorlar haqida bila boshlashdi. Qo'pol qilib aytganda u inson menga pul to'lashi kerak uni reklama qilganligim uchun. Odamlar aytishadi siz unga pul to'lashingiz kerak deb. Yo'q aksincha bo'lishi kerak. Agar meni qo'shig'imni kimdir Rossiyada kuylab mashhur qilsa, men usha insonni oyog'iga borib ta'zim qilaman. Agar siz aytgandek muxlislar tanqidiy fikrlar berishayotgan bo'lsalar demak ular mening muxlislarim emas.

-Tanqidga munosabatingiz qanday?

-Juda yaxshi. Bilasizmi, bizni shou-biznesda yuztalab qo'shiqlar qaytadan kuylanadi. Lekin afsuski ularni hammasi xit bo'lavermaydi. Agar oddiygina shu "Layloyimsan" qo'shig'ini kuylaganimda u mashhur bo'lmaganda edi hozir siz meni mana shu yerga chaqirmasdingiz ham. Ya'ni meni qo'shig'im xit bo'layotganligi ba'zi-birovlarni muxlislarini g'ashiga kelyapti. Negadir oxirgi paytda to'y yoki kechalarga taklif qilinayotganim shu qo'shiqlarim orqali. Demakki, bu xalqqa yoqyapti. Shuning uchun bunday gap-so'zlarga ahamiyat bermayman. Eng kerakligi men bu qo'shiqlarimni mazza qilib, yurakdan kuyladim. Ikkinchi parvozni ulashishga o'z hissamni qo'shdim. Bir narsani hech qachon esdan chiqarib qo'yish kerak emas. Xudodan ham ko'p narsa bog'liq. Men ko'p qo'shiqlarni bilaman. Olib qayta kuylashadi lekin hech kim e'tibor bermaydi. Inson qalbini tozaroq qilsa, albatta u kutgan natija ijobiy bo'ladi.

-Eshitishimizga qaraganda Moskvada ham muxlislaringiz bor ekan?

-Albatta, ikki millionga yaqin muxlislarim bor. Yilni boshida Novosibirsk shahrida rusiy zabon muxlislarimizga atab konsert qo'yib keldik. Bilasizmi, rus tilida kuylagan qo'shiqlarimni internet orqali shu qadar ko'p ko'rishganki, xattoki o'zbek tilidagi qo'shiqlarim bu yerda shunchalik ko'rilmagan. Men bundan juda ham xursandman. Eng qizig'i shundaki, men kuylagan "Bemor" nomli taronamga endi Eron xalqi meni matnimni tarjima qilgan holda, xuddi menikiday klip sur'atga olib chiqarishgan.

-Chetdan turib ochiqdan-ochiq o'zingizni tanqid qila olasizmi?

-Albatta kamchiliklar ko'p. Har bir narsaga e'tiborliman. Hamma narsaga e'tibor beraverish ham sog'lig'ingizga ziyon. Shunday yaralganman. Bu balki kamchilik, balki yutuqdir. Yana rostini shartta aytib yuboradigan kamchiliklarim ham bor. Nohaqsizlik yuz beradigan bo'lsa ichimga yutib keta olmayman. Endi o'zim haqimda aytib o'tirsam noto'g'riroq bo'ladi. Yaxshisi muxlislarim va meni yaxshi biladigan insonlar aytishsin.

-Mashhurlik sizga nima olib keldi? Uni ortidan nimalarga erishdingiz?

-Mashhurlik avvalo yuzimni yorug' qildi. Bir vaqtlar menga unchalik ishonmagan insonlarni oldida "demak bu bola san'atga jiddiy qaragan ekan" degan fikrlarni olib keldi. Hurmat, obro', kimgadir yordam bera olish imkoniyatini olib keldi. Azaliy yoshligimdan orzu qilgan kunlarimni olib keldi. Ota-onamni xursand qildi. Judayam ko'p narsalarni olib keldi. Ammo mashhurlikning yuki og'ir.

-Mashhurlikdan cho'chigan vaqtlaringiz bo'lganmi?

-Qo'shiqlarimni muxlislarga taqdim etgan paytlarimda, atrofimdagilar tomonidan "qo'shiqlaring xit bo'lyapti, ketma-ket beshta taronangni hammasi xalqqa yoqdi" degan gaplar boshlansa, men cho'chishni boshlayman. Chunki mashhurlikka ko'tarilgan sari inson o'zini bilmagan holatda yo'qotib qo'yishi mumkin. Yulduzlik kasaliga chalinib qolishi mumkin. O'nta odam yoningizda turib, "sen zo'rsan, sen zo'rsan" deb tursa, o'zidan-o'zi inson o'zini yo'qotib qo'yishi mumkin. Lekin bunga qarshi meni o'zimni qo'llaydigan usullarim bor. Buni aytmayman. Ammo ulardan birini aytishim mumkin. Agar o'zimga nisbatan men o'zgaryapman, balki mensimay qolmayapkanmikinman degan tushuncha tug'ilib qolsa, bir-ikki ishlar qilaman. Oddiy misol: metroga tushaman va oddiy odamlardek, oddiy odam bo'lib yuraveraman. Bu ham menga juda katta yordam beradi. Ya'ni men ham oddiy odam ekanligimni esimdan chiqarmaslik uchun shu yo'lni tutaman. Bilasizmi, mashhurlik ko'p narsalarni olib kelishi bilan birga, ko'p narsalarni ham olib ketti. Oddiy misol: jamoat joylarida bemalol o'tira olmaymiz. Boshqa san'atkorlarga qaraganda men bemalolroq yura olaman nazarimda. Sababi, jamoat joylarida o'zimni erkin tuta olaman. Boshqa san'atkorlar esa unchalik yura olishmaydi. Shu bilan birgalikda mashhurlikni yana bir olib ketgan narsasi bu-oilamga ko'p vaqt ajrata olmayman.

-Ko'plab xonandalar bilan duetlar kuylagansiz? Xar bir duetingiz taniqli san'atkorlar bilan. Duet takliflari tushganda avvalo duetdoshingizni qaysi jihatlariga ko'ra rozi bo'lasiz? Mashhurligi muhimmi yoki taronani qay darajada ekanligimi??

-Men hech qachon mashhurlikka e'tibor bermayman. Iroda Iraliyeva bilan kuylagan "Mini yubka-2" taronasini kuylashimizdan avval men bu xonanda haqida umuman hech qanday ma'lumotga ega emas edim. Bir vaqtlar menga katta yordam bergan insonni iltimosiga ko'ra va Iroda Iraliyevaning kuylash mahorati hamda g'oya menga juda ham yoqganligi uchun ushbu duetni kuylashga rozilik berganman. Hech kim nima uchun mashhur bo'lmagan inson bilan duet kuylading demadi. Sababi, bu tarona xit bo'ldi. Iroda Iraliyevaga ham mashhurlik olib keldi. Bilasizmi, rad javobini bergan duetlarim ham bo'ldi. Sababi, menga duet taklif qilayotganda aslida o'sha duet o'zi uchun kerakku, ammo bu narsa menga kerakdek ko'rsatayotgan holatlari bo'lgani uchun rad javobini joyida berib yuborganman va juda afsuslanishgan. Agar ortiqcha gaplar o'sha paytda bo'lmaganda edi hozir ularga bu juda ham foyda bo'lgan bo'lar edi deb o'ylayman.

-Omadga ishonasizmi?

-Omadga mehnat qilib erishishga ishonaman.

-Hayotda inson o'z oldiga qo'ygan maqsadlariga yetishishda mehnat va omadning darajasi qanday, siz mehnatkashlar doirasiga kirasizmi yoki omadi kelganlar??

-Omadga ham mehnat evaziga erishish mumkin. Axir bu narsa g'alatiku, hayotga kimdur omadli, kimdur esa omadsiz bo'lib kelib qoladi. Bu noto'g'ri narsa. Shunchaki kimdirning mehnatini vaqti sal uzunroq, kimdirniki sal qisqaroq bo'ladi. Bugungi kunga erishishim bu meni omadli ekanligimdan emas. Men dab-durustdan bitta qo'shig'im bilan yulduz bo'lib ketgan xonandalar qatoriga o'zimni qo'shmayman. Men o'zimni yillar davomida mehnat qilib, sabr-toqat bilan shu kunga yetib kelayotgan inson deb bilaman. Alloxga ming bora shukurlar aytaman bir zumdayoq tanilmaganimga. Sababi, bunday xonandalarni ko'pini ko'rganman bir zumda yonib, bir zumda o'chib qolganlarni. Hammasiga asta-sekinlik bilan erishsa bo'ladi. Bugunga kelib erishgan yutuqlarimga Allox bergan sabr-toqat, yaqinlarimni menga bo'lgan ishonchi, ota-onamni bergan duosi hamda ustozlarimni menga bergan saboqlari orqali erishdim. Shuning uchun meni omad evaziga chiqib qolgan xonandalar qatoriga qo'shib qo'yishlarini men hohlamayman.

-Ko'p xonandalar kinofilmlarda sur'atga tushishgan. Sizni ham bir-ikki filmlarda ko'rganmiz. Ammo nima uchun kino olamida kamnamosiz? Yoki takliflar yo'qmi?

-Menga juda ham ko'p takliflar tushgan va hozir ham juda ko'plab filmlardan takliflar bo'lyapti. Afsuski men judayam ko'pchiligini rad etdim. Sababi, ular berishayotgan takliflardan o'zimni qahramonimni ko'rmayman. Menga sport ustasi yoki bo'lmasa, yomon obrazdagi qahramon rolini taklif qilishadi. Afsuski bunday rollarda o'ynagim kelmaydi. Men unday insonmasman. Negadir menga shunday rol berishadi. Men esa salbiy rol o'ynashni umuman hohlamayman. Salbiy bo'lsa ham haq tarafi bor bo'lgan inson bo'lsa rozi bo'lardim. Ammo yaqinda "Aql va yurak" deb nomlangan bir filmda rol ijro etdim. U ham bo'lsa ssenariy yoqganligi bois rozi bo'ldim. Bu filmda men aktrisa Zarina Nizomiddinova bilan birgalikda, Alisher Uzoqovni aqli rolini, Zarina Nizomiddinova esa Munisa Rizayevaning yuragi rolini ijro etdik. Dunyo yaralibdiki, har doim yurak bilan aql bir-biri bilan chambarchas bog'liq bo'lib kelgan. Masalan, aqlga qarab ish qilasizmi yoki yurakga qarabmi degan savollarni berishadi. Bilasizmi, aqlga tayangan holatda yurakka qarab ish qilinadi. Shunday holatlar borki, aqling yetmaydi. Shunday vaziyatda tavakkal yuragingizga ishonasiz. Lekin birinchi o'rinda albatta aql. Men o'ynagan filmda ham ssenariy juda yoqdi. Qiziqarli. O'ynagan rolim unchalik ko'p emas yigirma daqiqalik. Ammo eng asosiysi rol juda ham menga ma'qul bo'ldi va yaxshi maosh ham to'lashdi. Men bundan juda ham xursandman. Bundan tashqari meni yana bir orzuyim ushbu filmga soundtrek ham ijro etdim.

-San'atdan tashqari bo'sh vaqtlaringizda nimalar bilan band bo'lasiz?

-Kino ko'raman. Sport bilan shug'ullanaman. Ammo ko'proq kinofilmlar ko'rishga juda ham qiziqaman. Bitta o'tirishda to'rtta-beshtalab kinolarni ko'rishga kuchim yetadi.

-Eng yaxshi o'zbek filmi sizningcha?

-Zulfiqor Musoqovning "Vatan" nomli kinokartinasi juda ham yoqadi. Bu filmni haqiqiy o'zbek filmi deb ayta olaman. Boshqa filmlarni ham yaxshi taraflari ko'p. Ammo meni saviyamga mana shu film juda tushgan. Aslida menga jiddiy, bir ko'rganda tushunib bo'lmaydigan filmlar yoqadi. Boshqa filmlarni bu bilan yomon demoqchimasman. Ularni ham muxlislari juda ko'p. Masalan Alisher Uzoqov o'ynagan filmlarni ham juda yaxshi ko'raman va muxlisiman. Ammo alohida va qund bilan ko'radigan filmlarim boshqa.

-Do'st bilan dushmanni ajratishga qiynalasizmi?

-Hozirgi kunda ancha o'rganib qoldim. Tajribam oshdi. Vaqtlar, yillar, soatlar o'tgani sayin tajriba ham ortib boraverar ekan. Negadir san'atkorlarda bir gap bor. Mashhurroq bo'lib qolgandan so'ng, kim menga do'st ekan, kim pulimga do'st ekan, hammasini bilib oldim deb, do'st haqida qo'shiqlar kuylab, o'zini aldangan insondek ko'rsatib qo'yishadi. Shou-biznes olamidagi xonandalarni intervyularida shu gaplar qulog'imga chalinib qoladi va g'ashimga tegadi. Men nolimayman. Alloxga shukur do'stlarim bor. Meni qo'llab-quvvatlab turadigan yaqin do'stlarim juda ham ko'p. Bir-ikki do'stman deb qo'yib, gapiga javob bera olmaydiganlarni deb, men do'stdan aldandim deb aytish noto'g'ri bo'lsa kerak. Bu boshqa do'stlarimni g'ashini keltirishi mumkin. Sababi boshqa do'stlarim bor. Ular meni tashlab ketishmadi. Do'stlarim juda ham ko'p. Men ularga rahmat deyman. Doim meni qo'llab-quvvatlashadi. Yoshingiz katta bo'la boshlagandan so'ng, bu borada tajriba ham ortib boraverar ekan. Bizni kasbimiz turli hil insonlar bilan o'zaro munosabat qurishga bog'liq bo'lganligi bois, har xil insonlarni to'y-hashamlariga ko'p borganimiz sabab psixolog bo'lib ketganmiz. Kimga qanday muomala qilish kerakligini bilib olar ekansiz. Juda ham ko'p miqdorda spirtli ichimlik ichgan insonni ham qanday qilib, urishmasdan, janjal qilmasdan chiqib ketish yo'lini ham bilib olar ekansiz xattoki.

-Hayotda armoningiz bormi?

-Bilasizmi, men hali yoshman. Bor yo'g'i o'n sakkizga chiqdim. (kuladi) Armonim bor desam noto'g'ri bo'lsa kerak. Avvalo hech kimni armoni bo'lmasin. U darajada armonim bor deya olmayman-ku, ammo armoni bor insonlarni ko'pchiliklarini bilaman. Ular bilan muloqotda bo'lganman. Bir-necha yillar mobaynida farzandi bo'lmagan, so'ng allox ularga ham farzand ato etgan insonlar haqida qo'shiq ham kuyladim. Agar imkonim bo'lganida edi, ko'krak saraton bezi kasali, umuman olganda onkologik kasalliklar bilan bog'liq bo'lgan bemorlarga qaysidir ma'noda dori-darmon bo'lsin yoki bir dalda bo'libmi ozgina bo'lsada yordamim tegsa menimcha shu armonim yo'qolgan bo'lar edi. Alloxga shukur o'zimni armonim yo'q. Oilam tinch. Ota-onam sog'. Turmush o'rtog'im yaxshi. Farzandim bor. Muxlislarimiz bor. Bitta san'atkor uchun kerak bo'ladigan hamma narsam bor.

-Tilaklaringiz?

Muz.uz musiqa javoniga tilaklarim juda ham katta. Avvalambor suhbat uchun rahmat. Taklifingiz uchun rahmat. Saytingiz hodimlari bilan juda yaqin, do'stona munosabatdaman. Qo'shiqlarimizni muxlislarimizga tez yetkazib berayotganingiz uchun tashakkur. Qolaversa, konsertimni reklamasiga yordam berayotganingiz uchun rahmat. Doim o'zingizni o'rningizga ega bo'ling. Hech kimga o'xshamaslikka harakat qilgan holda, san'atkorlarni doim yaxshi kunida xizmatda bo'ling. Muxlislarimizni esa konsertimga taklif etib qolaman. Konsert dasturida uchrashguncha.

P.S.: Ushbu intervyudan ko'chirma olish, foydalanish taqiqlanadi. Barcha huquqlar MUZ.UZ saytiga tegishli hamda O'zMAA va O'zIMA tomonidan himoyaga olingandir.