Muz.uz sayti muxlislari uchun navbatdagi qiziqarli suhbatimizni taqdim etamiz. Bu safargi eksklyuziv intervyuyimiz siz sevgan taniqli Rajabiylar sulolasi vakili bo'lmish Aziz Rajabiy bilan bo'lib o'tdi. Bugun u biz bilan ijodi borasida o'rtoqlashdi. Keling yaxshisi o'zingiz qiziqarli suhbatimizni o'qib guvohi bo'ling!!!
-Shou-biznes olamida biroz ko'rinmay qoldingiz. Sababi nima va hozirgi kundagi ijodiy yangiliklaringiz?
-Menga bu savolni juda ko'p marotaba berishgan. Sababi ijodimni boshlagan vaqtimdan beri san'atda bir ko'rinib, bir ko'rinmay qoladigan san'atkorlarning toifasiga kiraman. Ammo, menda bir narsa borki, ya'ni bir yo'nalishda ketmayman. Yangisini qidirishga tushaman. Shunda izlash jarayoniga vaqt ketadi. Men ijoddan to'xtamayman. Yangi qo'shiqlar yozilaveradi, ammo ularni efirga bergim kelmaydi. Faqatgina efirga ya'ni muxlislar e'tiboriga yangicha yo'nalishdagi tarona va kliplarimni taqdim etishga qiziqaman. Shuning uchun ham bu izlanishlarim ekranlarda ko'rinmay qolishimga sabab bo'ladi. Ammo, aslo ijoddan to'xtamayman. To'g'ri, bu safar ikki yil deganda ko'rinmadim. Ekranlarda ko'rinmaganim bilan ekrandan tashqari ijodiy izlanishda bo'ldim. San'atkor televideniya orqali ko'rinmay qolsa, bu ijoddan to'xtadi degani emas. Men ham yangi yo'nalishlarni izlash bilan band bo'lib bir muddat ekranlarda ko'rinmadim. Hozirda esa men yangicha yo'nalishdagi ijro, biroz estrada yo'nalishida yangi tarona ijro qildim va uni ommaga taqdim etdik. Menimcha xalqimiz yaxshi qabul qildi deb o'ylayman.
-Endilikda milliylikdan uzoqlashgan holatda taronalar kuylayabsizmi?
-Milliylikdan hech qachon uzoqlashmasak kerak menimcha. Milliylik bu qon-qonimizga singib ketgan. Milliy yo'nalishda ijro qilganmiz, bundan keyin ham ijro qilamiz. Sababi men ota-bobolarimizni qo'shiqlarini doim yaxshi ko'rib tinglayman. Hozirgi kunda esa yoshlarimizga ham mosroq yo'nalishda tarona kuylashni o'yladim. Qarasam hamma shunday yo'nalishda ijod qilyabdi. Men faqatgina hamma qilgani uchun emas balki mana shu estrada yo'nalishini yaxshi ko'rganim uchun ham shu yo'nalishda kuylayman. Estarada yo'nalishida kuylashni ham o'ziga yarasha sirlari bor ekan. Men ko'proq klassik qo'shiqlarni ijro qilganim uchun ham bunday taronalarda ovozimni bemalol qo'yib yuborib qo'shiq kuylayman. Estrada yo'nalishida esa ovozni yopibroq kuylash va yana bir-ikkita siralari mavjud ekan. Bu borada menga Farruh Badalboyev ismli do'stimiz bor, u menga juda katta yordam berdi ijro borasida. Albatta milliylikni yo'qotmagan holatda kuylashga harakat qildim.
-Milliy yo'nalish bilan birga estrada yo'nalishini farqi nimada deb o'ylaysiz? Ikkisini taroziga qo'ysa siz uchun qay biri og'irroq chiqadi?
-"Og'irroq chiqadi" deganingizda "qay biri ko'proq yoqadi" deb aytmoqchiligingizni bilyabman va bunga javobim quyidagicha: menga ko'proq milliy estrada yo'nalishi yoqadi. Chunki bilasizmi, bizni O'zbekistonimiz juda ham katta va estrada yo'nalishi ko'proq Toshkentda shu bilan birgalikda viloyatlarda ham yaxshi qabul qilinadi, ammo bu yo'nalishni ma'lum bir yoshdagi tinglovchilar tinglaydilar. Misol uchun ko'proq yoshlardan to o'ttiz-o'ttiz besh yoshdagilar yaxshi ko'rib tinglaydilar. Ammo milliy estrada yo'nalishini esa yettidan-yetmush yoshgacha bo'lgan tinglovchilar yaxshi ko'radilar. Men bir narsani guvohi bo'ldim. O'zimni yeti oylik farzandimdan kelib chiqib shuni bildimki, milliy taronani eshitgan zahoti qo'llari bilan qarsak chalib, xursand bo'lib ketadi. Boshqa bolalarda ham buni ko'p kuzatganman. Sababi milliylik bu bizni qonimizda bor. Katta farzandlarim esa biroz ulg'ayib estrada yo'nalishiga qiziqishyabdi. Yana shu narsani bildimki, yoshi katta bo'lganidan keyin esa yana milliy yo'nalishdagi taronalarni tinglashga qaytishadi. Bizni maqomlarimiz, milliy yo'nalishlarimiz bu falsafiy yo'nalish. Inson umri davomida shodligu-qayg'uli kunlarni ko'rganidan so'ng, yoshi qirq-elliklarga borib qolganida milliy, maqom taronalarni tushunib yetadi va u taronalarni eshitganida orom oladi. Yoshlarni esa hali g'ayrati jo'sh urib turgan vaqti. Shuning uchun ham sho'x taronalarni sevib tinglashadi. Bu narsaga hech kim qarshilik qilishi kerak emas. Sababi, bu hayot tarzi va zamon talabi. Faqatgina bir narsaga e'tibor qaratishimiz kerak ya'ni milliylikni yo'qotib qo'ymaslik kerak. Estrada deb haligi Yevropa estradasini emas balki o'zimizning o'zbekona estradamizni yaratishimiz kerak. Horijdagilar esa bizni estradamizni ko'rib havas qilishsin. Misol uchun Turkiya, Arabiston hamda Eronlarni oladigan bo'lsak, ularni ham estradasi juda ham rivojlangan. Biz ham ularni taronalarini sevib tinglaymiz. Qaysi xalq taronasi ekanligi shunday bilinib turadi. Turk estrada xonandasi Tarkan ham Yevropada konsert dasturlarini qo'ygan va aytayotgan taronasi Turk estrada yo'nalishida. Bu so'zlarim bilan biz ham shunday o'zbekona estradamizni xalqqa tanitaylik demoqchiman. Juda ham chiroyli estradamiz bor bizni ham. Klassik taronalarimizni esa butun dunyo biladi. O'zbek estradasi ham ana shunday bo'lishini hohlayman. Bizda estrada yo'nalishida ijod qilayotgan san'atkorlarimiz juda ham ko'p. Ayniqsa ijodi menga juda yoqadigan xonanda Ziyodaning ovoz tembiri uni ishlatishi juda ham beqiyos. Ham milliy ham estrada yo'nalishida bemalol qo'shiq kuylayveradi. Xuddi Sevara Nazarxonning yo'nalishiga o'xshab ketadi. Aytmoqchi bo'lganim ana shunday xonandalarimiz ko'paysa, xorijdan o'g'irlab emas balki o'zimizning milliy estrada yo'nalishida kuylaydigan san'atkorlar ko'payishini hohlayman.
-Siz mashhur Rajabiylar sulolasi avlodidansiz. Bolaligingizda boshqa bir sohaga qiziqish bo'lganmi? Yoki avlodimizni davom ettirishimiz kerak degan maqsadda san'atni tanlaganmisiz?
-Bizni oilada shunday bir qonun-qoida bor ya'ni hech kimni majburlamaslik. Masalan meni ikkita akam bor. Ular ham to'g'ri san'at sohasida ammo kattalari rassomlar, undan keyingi akam esa Uspenskiy nomli litseyda dars beradilar. Bizni avlodda ya'ni amakivachchalarimni hammasi boshqa sohadan ketishgan. Biz esa san'at sohasidan ketdik. Har kim o'zi hohlagan sohani tanlagan. Qaysi bir sohaga qobilyati, hohishi, istagi bo'lsa, oilamizdagilar ularni qo'llab-quvvatlashadi. Men ham juda ko'p narsalarga qiziqdim. Sportga qiziqdim. Ammo aylanib, musiqa sohasida o'qib, turli hil cholg'u asboblarini chalishni qolaversa chet el musiqalarini ham o'rgandim. O'qishlarimni bitirganimdan so'ng, o'n yil mobaynida musiqachi bo'lib yurdim. O'zbekiston xalq artisti Hayrulla Lutfullayevni yonlarida besh yil va O'zbekistonda xizmat ko'rsatgan artist Azim Mullaxonovning yonlarida besh yil mobaynida musiqachi bo'ldim. Shundan so'ng, bo'ldi yetadi boshqa musiqachi bo'lmayman, boshqa sohada o'zimni sinab ko'raman deb Iqtisodiyot oliygohining magistraturasiga o'qishga kirib, u yerni ham bitirdim va tadbirkor bo'laman dedim. O'zingizga ma'lum bizni jannatmakon yurtimizni yerlari juda ham boy. Shuning uchun turli mevalarni Rossiya davlatiga eksport qilishni boshladim. Bu ish ham juda yaxshi bo'ldi ammo mana bu qalbda baribir san'atga bo'lgan qiziqish kuchli ekan va xalqimizga chin dildan xizmat qilib san'atkor bo'lish maqsadi tug'ildi. Shundan so'ng 2001-yildan boshlab qo'shiq ijro etishni boshladim. Mana hozir ijodimni boshlaganimga o'n ikki yil bo'libdi. To'g'risini aytsam qo'shiq kuylashni boshlaganimda xonanda bo'lib ketaman deb o'ylamaganman. Shunchaki hobbi sifatida kuylagan edim. Sababi boshqa ishim ham bor edi. Qo'shiq kuylaganimda otam bobongni qo'shiqlarini kuyla deb aytganlarida, men ularni taronalarini ijro etdim. Bu tarona televideniya va radioda biroz muddat aylandi. Shundan so'ng hohlagan vaqtimda qo'shiq kuylayman deganimda, muxlislar o'zidan –o'zi paydo bo'la boshlashdi. Ko'cha-kuyda odamlar taniy boshlashdi. Keyingi taronalarimni kuylashimga sabab xalqni o'zi qo'shiq kuylashimni talab qila boshladi va shundan so'ng sekin-sekin xalqni o'zi meni xonanda qilib qo'ydi. Hozirgi ko'rinmay qolgan ikki yilim mobaynida elimizni hizmatida bo'ldim. Ekranlarda ko'rinib, harakatlarimni boshlaganimni sababi esa ko'cha-kuyda muxlislar "qachon yangisidan eshitamiz" deb yo'llarda svetoforlarda mashinada turganimda shunday savollar bilan murojaat qilaverishdi. Ana shunday gaplarga yaxshi ma'noda to'yganimdan keyin ijodga yana bir bora sho'ng'idim. Oxirgi taronamni yaralishida menga katta yordam bergan Farruh Badalboyevga minnatdorchiligimni bildiraman va yana bir narsani katta xursandchilik bilan aytib o'tmoqchiman ya'ni men juda ham baxtli xonandalar qatoriga kirar ekanman. Chunki ikki yil mobaynida ijod qilmaganimda hozirgi kunda birinchi raqam desam adashmayman, Jasur Badalboyev ismli musiqachi ukamiz bor. Men avvallari ham bu inson bilan ijod qilganman. Ko'p musiqalarimni bastalab bergan va ijodda ko'rinmay qolganimda mana shu Jasurning o'zi menga qo'ng'iroq qilib, Aziz aka keling men sizga bir narsa yozib beray deb taklif qilib chaqirib oldi. Bo'lmasa xonandalar uni ketidan yugurib, musiqa yozib bering deb murojaat qilishadi. Meni esa Jasurning o'zi qo'ng'iroq qilib chaqirdi. Men uchun bu juda katta baxt. Klipmeykerlarga keladigan bo'lsak, Narimon Sultonxo'jayev yaxshi klipmeyker ukamiz bor barchaga ma'lum. Avvalgi kliplarimni barchasini mana shu bola sur'atga olgan. Bilasizmi, u ham menga qo'ng'iroq qiladi: Aziz aka nega yo'q bo'lib ketyabsiz? Tezroq yangi taronalarni olib keling deb xullas o'zari meni chaqirib turishdi. Bu qaysidir jihatdan meni baxtim. Mana shunday ukalarim borligidan juda ham xursandman va albatta eng keraklisi o'zimda hohish bor. Agar hohish bo'lmaganida edi ming sizni chaqirishsa ham hohlamasangiz ijod qilmaysiz. Endi buyog'iga to'xtamaslik kerak. (kuladi) Bilasizmi har doim shunday deyman. (kuladi) Ijod qilish bilan birga oilaviy jarayonlarga duch kelib ijod qilolmay qolishingiz ham mumkin. Avvallari bitta ijod qilsangiz hammaning og'zida bo'lar edingiz. Hozir esa ijod qilib to'xtab qolsangiz, xalq sizni unutib qo'yadi. Muxlislar ana shunday bevafo bo'ladi. Endi buyog'iga to'xtamasdan muxlislar ko'nglini olib ijod qilishga harakat qilaman.
-Yakkaxon konsert dasturingizni qachon taqdim etish niyatidasiz?
-Yakkaxon konsert dasturini qo'yish niyatim bor. Hozir aniq vaqtini ayta olmayman. Aytsamu aytgan vaqtimga to'g'ri kelmay qolsa yolg'onchi bo'lib qolaman. Shuning uchun avval aniqlashtirib olaylik va undan so'ng muxlislar hukmiga havola etaman. Konsert dasturini qo'yishdan oldin ham avvalo muxlislarga yaxshi-yaxshi taronalarni taqdim etish kerak. Menga shu savolni berishganida, ha men konsert qo'yaman deyavermayman. Sababi, men konsert dasturimga tomoshabinlarni majburlab olib kelib konsert qo'yishni yomon ko'raman. Avval xit taronalar yozaylik, odamlarni o'zi hohlab konsertingizga tushsin, chiptalar qolmasin, ana shunday natijaga yetib kelganini inson o'zi sezganidan so'ng, shundagina konsert dasturini qo'yishi kerak. Misol uchun o'tgan yili Johongir Otajonovning jonli konsert dasturiga tushdik. Tamoshabinlar juda ham mazza qilib konsertni zo'r qiziqish, ishtiyoq bilan tamosha qilishdi. Johongirni o'zi katta iste'dod egasi. Ulug'bek Rahmatullayevning ham konsert dasturiga bordim. Uning ham xit taronalari ko'p va shu sababli dastur juda chiroyli o'tdi. Xattoki xalq chiptalarni topa olmay qolishdi. Konsert dasturi ana shunday bo'lishi kerak. Ba'zi konsertlarda chiptalarni sota olmay, bozorlarga o'tkazishganini ham guvohi bo'ldik. Bu juda ham xunuk holat. O'zini hurmat qilmagan san'atkor shunday qiladi. Bu qo'pol qilib aytganda pulni ketidan yugurish degani. Xalq o'zi konsert qo'ying deb talab qilsa, ana shunday hollardagina konsert dasturini qo'yish kerak. Ana shunday vaziyatlar yetib kelganidagina konsert qo'yish niyatim bor. Bu niyat. Chin dildan niyat qilish kerak va bir kunmas bir kun ana shu niyatimizga ham yetamiz.
-Qiziqarli suhbatingiz uchun tashakkur. Suhbatimiz so'ngida chiroyli tilaklaringiz bo'lsa marhamat.
-Meni Muz.uz musiqa javoniga tilaklarim barcha saytlar ichida eng ko'zga ko'ringan saytlardan biri bo'lishini tilab qolaman. Buning uchun faqat timimsiz ijod, tinimsiz harakat qilishingizni tilayman. Ijodiy guruhga omad tilayman. Bir-biringiz bilan aka-singil, opa-ukadek bo'lib, hamjixatlikda ishlasangiz, ishingizda ham baraka bo'ladi. Niyatim bizga o'xshagan san'atkorlarni elga tanitib yurishdan tolmanglar, charchamanglar. Rahmat.
Biz ham o'z o'rnida sizga ishda qolaversa shaxsiy hayotingizda faqatgina ulkan parvoz, muvaffaqqiyat va omadlarni tilab qolamiz. Xalqimiz uchun hizmat qilishdan siz ham charchamasligingizni, doimo el nazarida bo'lishingizni tilaymiz.
