Bugungi intervyu mehmoni so'nggi paytlarda ekranda juda kamnamo bo'lib qolgan, qolaversa muxlislarini sog'intirgan serqirra ijodkor, ham xonanda, ham aktyor, endilikda rejissyorlik sohasida ham o'zini sinashni oldiga maqsad qilib qo'ygan sevimli ijodkoringiz Samandar. Barcha savollarimizga to'liq va aniq qilib javob berishga harakat qilgan Samandar suxbat davomida javoblari bilan bizni lol qoldirdi.

-Ijodingizda qisqagina tanaffus bo'ldi. Anchayin ekranlarda ko'rinmay qoldingiz va yana ijoddasiz. Ayni kunda nimalar bilan bandsiz? Muxlislar uchun qanday sovg'alar tayyorlab qo'ygansiz? Sababi, ular sizni juda sog'inishgan.  

-Hozirgi kunda, deyarli ikki-uch yil ichida ikkita musiqiy to'plamimni yozdik va bu taronalarimga hozirda birma-bir vidiokliplarni suratga olyabmiz. Asta-sekinlik bilan ushbu video kliplarni efirga uzatishni boshlaymiz. Hozirda virtual olamda ham iloji boricha faol bo'lishga ham harakat qilyabmiz va internet tarmoqlarida o'zimizni ijodimiz to'g'risida ya'ni qo'shiqlarimiz, olingan video kliplarimiz yoki foto albomlarimizni, umuman ijodimizda bo'layotgan yangiliklarimizni berib boryabmiz. Ijodimda bo'lgan tanaffusni tugallanishini mana shu 2013 yilga mo'ljal qilgan edim va buyog'iga nasib etsa yangi yildan ijodimizni yangi nafasdan, yangicha ruh va shukuh bilan boshlab yuborganmiz. Yangi taronalar ijro etganman. Taronalarim ichida ko'plab tillarda ya'ni o'zbek, turk, tojik, rus, italyan hamda ingliz tillarida kuylagan qo'shiqlarim bor.

-Sizni ekranlarda akangiz bilan birgalikda hazilomus minyatyuralarda rol o'ynaganingizni ko'rdik. Umuman muxlislarga "Muhabbat sinovlari" filmi orqali ham yaxshi tanishsiz. Aktyorlik sohasiga bo'lgan mahoratingiz ham bor. San'atda qo'shiqchilik yoki aktyorlik sohasida sizga ko'proq eng yaqini?

Bu savolni menga ko'p berib turishadi. San'at oliygohida o'qiyotganimizda bizga aktyor iloji boricha ko'p qirrali bo'lishi kerak, vaqti kelsa u koskadyor, vaqtida yaxshi raqsga ham tusha olishi, yaxshi qo'shiq ham ayta olishi kerak va har tomonlama iloji boricha ko'p qirrali bo'lishi kerak deb aytishgan. Shu tomoniga ko'proq e'tibor berishga harakat qilyabmiz va qo'shimcha qilib, rejissura sohasida ham tajriba oshirishga harakat qildim. O'zimni o'quvchi rejissyor deb aytaman. Sababi, hali bu sohani o'rganyabman. Yaxshi ijodkor nafaqat tinimsiz ijod qilishdan tashqari, vaqti kelganda tanaffus qilishni ham bilishi kerak ekan ozgina.

-Sog'intirishi kerakmi?

-Sog'intirish emas. Yangi fikrlar, yangi g'oyalar kelishi uchun, qolaversa, har tomonlama ruhan tayyor bo'lish uchun ham kerak deb bilaman. Hozirda iloji boricha yangicha imidj, yangicha ko'rinish bilan chiqishga harakat qilyabman. Nasib etsa, birma-bir, bosqichma-bosqich, asta-sekinlik bilan o'ylayotgan rejalarimizni amalga oshiramiz. Buni oldindan aytib qo'yadigan bo'lsak qizig'i qolmaydi. Men rejalarimni amalda ko'rsatishga harakat qilaman. Sababi, to'ydan oldin nog'ora chalishni yoqtirmayman. (kuladi) Chunki, bir-ikki filmlarim bo'lgan, mana shu filmda men chiqaman ko'rasizlar deganimda, ba'zi bir sabablarga, holatlarga ko'ra u film ekranlarga chiqmagan. Ijodimda ham ba'zi bir tarona va kliplarim o'ylagan rejamdagidek chiqmay qolgan. Shuning uchun yaxshisi avval chiqsin, undan so'ng tomoshabinlar o'zlari baho berishadi. Biz ijodimizni ilk boshlagan yillarimizga qaraganda hozir san'atga qarashimiz boshqacha. Chunki mana yangi 2013-yil ostonasida turibmiz. Xattoki, "Muhabbat sinovlari" filmi 2001-yil olingan bo'lsa, orada o'n bir-o'n ikki yil o'tib, kino sohasi ancha o'sdi. Hozirgi kinolar boshqacha. Hozirgi tomoshabinlar ham boshqacha filmlarni kutadi. Aktyorlar ham o'z roliga boshqacha yondoshishadi.

-Samandar, mana o'zingiz ham kino sohasidan yiroqda emassiz. "Muhabbat sinovlari" filmi va yana bir-ikki filmlaringizdan so'ng tomoshabinlar sizni boshqa filmda ko'rishmadi. Nima uchun? Takliflar bo'lyabdimi? Yoki endi buyog'iga o'zingiz film suratga olmoqchimisiz?

-Ha albatta film suratga olish niyatim yo'q emas. Nasib etsa, balki bahor oyidan boshlaymiz yangi loyihalarni. Ammo hozircha ochig'ini aytaman, kinoga takliflar yo'q. Bundan oldingi takliflarni ko'piga rad javobini berdim. Sababi, hayotda men o'zim quvnoq, xushchaqchaq bo'lib yurishni yaxshi ko'raman. Menga beriladigan asarni o'qib chiqqanda, unda tragediya tomonlama Shekspirni asarlaridan farq qilmaydigan bo'lsa, ya'ni qahramon o'ladigan bo'lsa yoxud og'ir saraton kasaliga duchor bo'lsa, iloji boricha bunday ssenariylarni qo'limga ham ushlamaslikka harakat qilaman. Xushchaqchaq, yaxshi insonni obrazi bo'lsa, albatta o'ynayman.

-Demak rol sizga ma'qul kelsa, undan so'ng rozilik berasiz?

- Nyuton aytganidek, harajatsiz harakat nolga teng deganidek, baribir filmga taklif qilinayotganda uni boshqa taraflarini ham o'ylab ko'rasiz. Ba'zi bir paytlarda berilayotgan gonarar biz hohlagandandan ortiq qilib berilsada, ammo asar ozginagina menga yoqmaydigan bo'lsa, qayeridir menga to'g'ri kelmaydigan bo'lsa, men yaxshisi rad javobini beraman. Agar ssenariy menga ma'qul keladigan bo'lsa, filmdagi obrazda o'zimni ko'radigan bo'lsam, unda menga beriladigan na gonarariga, na boshqasiga qaramayman. Eng muhimi men uchun natija. San'atni vazifasi tarbiyadan iborat bo'lganidan keyin, uning tarbiyaviy tomoni yaxshi bo'lishi kerak. Meni shu taraflari bilan qoniqtiradigan bo'lsa, u rolni albatta o'ynayman. Salbiy qahramon rolini o'ynashni yoqtiramanu, lekin qo'rqaman. Chunki, rolni qoyilmaqon qilib o'ynasangiz, xalq sizni yomon ko'rib qoladi. Odamlar meni yomon ko'rib qolishlarini hohlamayman. (kuladi)

-Bu albatta aktyorni mahoratini yuqori ekanligidan darak beradi. Orzuyingizdagi rolni o'ynaganmisiz?

-Yo'q.

-Yangi film olish niyatida ekansiz. Sir bo'lmasa qanday mavzularga yondoshgan holda filmlar olasiz?

Komediya, xushchaqchaq, musiqali, raqslarga, chiroyli o'yin-kulgularga, qiziqarli voqealarga boy bo'lgan komedik janridagi filmlarga murojaat etgan holda film olish niyatim bor.

-Filmingizda bosh rollarda kimlarni ko'rishimiz mumkin? O'zingiz ham rol ijro etasizmi?

Iloji boricha yangi yulduzlarni, yangi qahramonlarni kashf qilishga harakat qilamiz. Balki o'zim ham qayerdadir rol ijro etishim kerak deb lozim deb topsam, o'zim ham rol ijro qilarman.

-Demak muxlislaringiz sizni rejissyor sifatida ko'rishlari ham ajab emas ekanda?

-Xa albatta. Ammo bu yil ko'proq xonandalikka urg'u berganmiz.

-Xonandalik yo'nalishiga qaytadigan bo'lsak, yosh, endigina san'atini boshlagan ijodkorlar talaygina. Ularga bo'lgan munosabatingiz, fikringiz qanday? Umuman olganda nafaqat yosh balki, ijodini ancha yillardan beri davom ettirib kelayotgan xonandalardan kimlarni alohida takidlab o'ta olasiz?

Erkak xonandalarni oladigan bo'lsak, mustahkam haqiqiy o'zini yo'liga ega bo'lgan, o'z yo'nalishi, o'z uslubiga ega bo'lgan Jasur Umirovni ijodi menga juda ham yoqadi. Chunki bu bolada o'ziga xos bo'lgan yo'nalish bor. Qo'shiqlaridagi matnlarida ham, kliplaridagi ijrosida ham hunuk ko'rinib qolishdan qo'rqmaydi. Aktyor ana shunday bo'lishi kerak. Yana misol qilib, Yigitalini ham aytsak bo'ladi. Yigitalini ijro etayotgan rollarini ko'rsangiz, har xil klipda har xil odamni rolini o'ynaydi va aktyorlik sohasida o'qigan ekanligi bilinib turadi. Rollari umuman bir-biriga o'xshamaydi. Manzurani, Rayhonni, Ziyodani ijodlari menga juda ham yoqadi. Munisa Rizayevani ham alohida takidlab o'tgan bo'lar edim. Yo'nalishi, ijrosi, kameraga ishlashi, ayniqsa "Gollivud" taronasiga ishlangan klipda bor qobilyatini ishga solgani, ichidaga energiyasi o'ziga sig'mayotgani ko'rinib turadi. Guruhlarimizdan Sahro guruhi, Sarvar va Komil mana shularni ijodini ham hurmat qilaman. Aktyorlarimizdan Umid Iskandarov hamda Muhammadali Iskandarovlar yaxshi rollar ijro etishyabdi. Nafaqat aktyor sifatida balki, yaxshi g'oya, yaxshi ssenarist sifatida, rejissyor sifatida ham juda yaxshi ijod qilishyabdi. Bu yoshlardagi energiyani ko'rib, men kuch olyabman. Ba'zi vaqtlarda o'ylab ham qolaman. Ijodkorlar ko'payganini ko'rganingizdan keyin, siz ham mehnatni yanada ko'proq qilasiz. Turgan gapki, zo'rdan-zo'r chiqadi baribir. Mehnatingiz ham shunga yarasha bo'ladi. Yoshlarimiz orasida juda qobilyatlilarimiz ko'p. Xonandalik sohasida ham, kino sohasida ham qizg'in ijod qilishyabdi. Yaxshi aktyor va aktrisalarimiz bor. Ayol aktrisalardan Sevara Soliyeva, Zarina Nizomiddinovani takidlab o'ta olaman. Zarinani men muxlisiman desam ham bo'ladi. Uni rollari menga juda ham yoqadi. O'ynagan rollardida samimiylik bor. Birma-bir aytadigan bo'lsak juda ham ko'p yaxshi ijodkorlar. Yoshlarga umumiy qilib olganda beradigan bahoyim "5" baho. Nuqsonlar esa hammada ham bo'ladi. Bunga albatta vaqt kerak bo'ladi. Vaqt o'tgani sayin tajriba ham oshib boradi.

-Tanqidga munosabatingiz?

To'g'ri ma'noda, haqiqatdan rosmana qilingan tanqid bo'lsa, unday tanqidga munosabatim yaxshi. Tanqid yaxshi narsa. Tanqid insonni o'zini o'nglab olishi uchun, ayblarini to'g'irlab olish uchun yoki bo'lmasa, u odamga nisbatan atrofdagilarni fikri qandayligini bilib olish mumkin.

-O'zingizni o'zingiz tanqid qila olasizmi?

Albatta tanqid qilishim mumkin. Biroz dangasaligim bor. Bilasizmi ko'p narsa baribir mablag'ga borib taqaladi. Biz ilk ijod qilayotgan vaqtlarimizda, men ochiq aytaman, uch ming uch yuz dollar harajat qilganman. U vaqtlarda bu pulga uch xonalik uy sotib olsa bo'lar edi. "Sevgi fazosi" nomli taronamgacha mana shuncha miqdorda mablag' ketgan. Bu taronam xit bo'lganidan so'ng, ommalashganidan keyin, deyarli ungacha va undan keyingi ketgan harajatlarni barini qopladi. Aytmoqchimanki, biz birinchi ijod qilayotganimizda televideniyada kliplarni aylantirib ommaga taqdim etish ommalashmagan edi. U vaqtlarda ko'proq radio to'lqinlar orqali taronalar xalqqa tadim etilar edi. Radio orqali muxlislar tinglab, bittada shu tarona ularni qulog'iga o'rnashib olishi kerak. U holda boshqa tugmachani bosib, boshqa kanalga olib tashlashlari mumkin. Shuning uchun taronani har tomonlama mukammal qilib yaratish kerak. Qoshiqlarni, hech qisi yo'q klipi bilan birgalikda ikki yuz ellik marotaba televideniyada aylantirsak, tomoshabin ko'radi va xit bo'ladi deyish, bu juda ham noto'g'ri yondashuv. San'at fidoiylikni talab qiladigan narsa. Yaratilgan taronani doimiy aylantirish, majburiy tomoshabin qulog'iga quyish kerak emas. Meni repertuarimda esa, bitta mana shu "Sevgi fazosi" nomli taronam rosmana xit bo'ldi, deyarli hamma muammolarim yechilib ketdi. Iloji boricha qo'shiqni musiqasiga, ham she'riga  ham ahamiyat berib ijro qilish kerak. Har tomonlama qanchalik yaxshi ahamiyat berilsa, o'ylaymanki, natija ham yaxshi bo'ladi.

-2013-yilda sog'ingan muxlislaringiz uchun konsert dasturi qo'yish niyatingiz bormi?

2013-yilda nasib etsa, yangi yil bayrami arafalarida ya'ni yil oxirida konsert berishim mumkin. Bu albatta rejalarimda bor. Mana shu yil davomida to'liq ishlamoqchiman. Har tomonlama ishlashni reja qilganman. Ko'ramiz nasib etsa, yaxshi filmlar ham bo'lar. Lekin ko'proq estrada xonandalik tomoniga urg'u bergan holda ish faoliyatimni olib boraman. Men o'zi ijodimda milliy qo'shiqlarimizdan boshlaganman. Hozir menga ko'proq dilimga yaqin bo'layotgan yo'nalish bu Jazz yo'nalishi. Hozirda mana shu yo'nalishda qo'shiqlar qilyabman. Jazz yo'nalishi tomonlama ham bir-ikkita ijrolarimni ko'rsatmoqchiman.

-Jonli ijro ham bo'ladimi?

-Xa albatta, konsert bo'lganidan keyin albatta jonli ijroda bo'ladi. 100% jonli ijroda konsert beraman. Menga to'rt mingta yoki besh mingta odam o'tiradigan joy bo'lishi shart emas. Menga ellikta yoki yuz ellikta odam o'tiradigan joy bo'lsin va jonli ijroda eshituvchi ham mazza qilsin. Garchi kichkinagina auditoriya bo'lsa ham, ammo tomoshabin jonli ijrodan baxramand bo'lsin. Men ana shunday konsert berishni hohlayman. Agar konsert qiladigan bo'lsam Ilhom teatrida qilarman. Balki boshqa joyda. Ko'ramiz, bu haqda yana o'ylab ko'ramiz albatta.

-Bo'sh vaqtlaringizda nimalar bilan band bo'lasiz?

-Ko'proq uhlashga harakat qilaman. (kuladi) Yaxshi kinolarni ko'rishga harakat qilaman, kitob o'qiyman. Yoki bo'lmasa, ayolim mendan ko'proq kitob o'qiydi. Men ish bilan ko'chada ekanligimda bilamanki, u uyda kitob o'qiyotgan bo'ladi. Uyga borib keyin u bilan fikr almashaman. Qani nimalar o'qiding deb, ana shunday qilib fikr almashamiz va yana albatta sport bilan shug'ullanaman. "Body fitness" turi bilan shug'ullanaman. San'atkor faqat kiyimda chiroyli bo'lishi kerak emas. Qaddi-qomati ham chiroyli bo'lsa, har qanday kiyim ham, yarashaveradi. Tomoshabinlardan biri ham shogird bo'lib kelganida bizdan ko'p narsalarni o'rganadi. Agar biz tamaki chekadigan bo'lsak, u ham bizdan o'rnak oladi. Agar sport bilan shug'ullansak, demak u ham sport bilan shug'ullanishga harakat qiladi. Ularga yaxshi tomonlama o'rnak bo'lish kerak. Men ham sport bilan shug'ullanishni yoqtiraman. O'zim yoqtirgan sport turlari bu yugurish, voleybol, basketbol.

-Tashqi ko'rinish haqida so'z yuritdik. San'atkor uchun tashqi ko'rinish muhimroqmi yoki uning qobilyati tashqi ko'rinishidanda ustunmi? Siz uchun qaysi biri muhimroq?

Endi bularni bir-biridan ustun qo'yib bo'lmaydi. Albatta uni qiladigan ijod asari har bir narsadan ustun turadi. Mana shu qilgan ijodi har tomonlama chiroyli, go'zal  bo'ladigan bo'lsa, har xil bachkanaliklardan mustasno bo'lsa, uning ijodi, u odamni qanday bo'lishidan qat'iy nazar uni chiroyli qilib ko'rsatadi. Lekin baribir ko'rinishga ham albatta e'tibor berish kerak. Tashqi ko'rinishi ham chiroyli bo'lishi kerak. Yaqinda "Oltin gepard" festivalining yopilish marosimi bo'lganida, gollivud yulduzi Mark Dokaskos tashrif buyurdi. Men bir narsaga qoyil qoldim va ishondim. Haqiqatdan ham fikrlar moddiy kuchga ega ekan. Agar inson chin dildan bir narsani qattiq hohlasa, albatta u ro'yobga oshar ekan. Biz do'stimiz O'lmas Olloberganovni ish joylarida o'tirgan edik. Televizor orqali marosimga Mark Dokaskos kelganini ko'rsatib qoldi. Iya bu gollivud aktyori Mark Dokaskosku, Sulaymon tog'ni oldiga bormagan bo'lsa, tog' Sulaymonni oldiga keldi degan gapda bu. Gollivud yulduzi O'zbekistonga kelib turibdi, nahotki shu odam kelganda borib bir marotaba bo'lsa ham qo'lini olib qo'ya olmayman, bir marotaba bo'lsa ham salomlasholmayman, shu odamni baribir qo'lini olib qo'yishim kerak deb yurakdan hohlab yubordim. So'ng ikki soatdan keyin marosimga siz uchun taklifnoma bor, keling deb aytishdi. Xursand bo'lib bordim. Borsam, O'zbekiston xalq artisti Yodgor Sa'diyev bilan birgalikda suratga tushishayotgan ekan. So'ng ularni ichkariga olib ketishdi. Kirib ketishayotganda Mister Mark deb chaqirdim. Do'stimga uyali aloqamni berib, bizni suratga ol dedim. Men esa shoshganimcha mister Mark bir daqiqa dedimda ko'rishdim va ko'rganimdan xursandman dedim, u ham shunday dedida kirib ketdi. Men bu aktyorni bolalik vaqtlarimdan beri bilaman. Yoshlari ham ellikga yaqinlashib qoldi. Lekin ko'rganimda kastyum-shimlarda xuddi yigitlardek edi. Bu nimadan iborat? U azbaroyi sport bilan muntazam shug'ullangani uchun uning ko'rinishi ana shunday yosh. Biz tengi yigitlarga o'xshaydi. Qarilik alomatlari umuman yo'q. Qotmadan kelgan. Ko'rib qoyil qoldim. Men hozir yaxshi yoga mashg'ulotlarini o'rgatadigan odam qidiryabman (kuladi) . Birinchi o'rinda odam o'zini ruhan tayyorlashi eng muhim narsa ekan. Gulnora opani ham internetlarda yoga mashg'ulotlarini ko'rdim. Plastika juda kuchli. Ularga ham qoyil qoldim. Har tomonlama bekamu ko'st bo'lishga harakat qilayotgan odam deya olaman. Havas qildim. Shu insonga meni ham o'xshagim keldi. Biz ham shug'ullansak, shunday natijalarga erisha olamiz. Men ko'p joyda takidlayman. O'zbek yulduzlaridan bir kishi gollivud yulduzi bo'lsada va usha inson men bo'lsam deyman (kuladi). Bu meni orzuyim. Doim shunga harakat qilaman. Osilsang baland dorga osil deyishadiku, shu maqolga men qo'shilaman. Ko'p xonandalikka qiziqishi bor qizlar bizni oldimizga tashrif buyurishadida, ovozimni eshitib ko'ring deyishadi. Hop siz kimlarni eshitasiz, kimlarga o'xshagingiz keladi  desam, men Rayhonga, Manzuraga o'xshagim keladi deyishadi. Bu yomon emas yaxshi albatta. Lekin Rayhonni ijodiga nazar soladigan bo'lsak, oldin ijodini "Hayo" guruhidan boshlaganda, kiyinishlari Maykl Jeksonga o'xshar edi. O'sha vaqtdan bilganman uni yuqoriga intilishini va qarang hozir qanday darajalarga ko'tarilgan. Tinimsiz mehnat qiladi. Bizdagi xonandalar ham bemalol o'ziga raqib deb Shakirani, Beyonseni bilishi mumkin. Shunday yuqoriga intilsa, natija ham albatta zo'r bo'ladi. Shuning uchun menda ham orzular, niyatlar katta. Orzu qilganimda doim kayfiyatim ko'tariladi, xursand bo'laman va tezroq erishaman orzularimga. Ba'zi vaqtlarda siqilib qolishlar ham bo'ladi. Lekin Sharof Boshbekovni bir asarlari bor, ya'ni "Tushov uzgan tulporlar". Shu asardagi Tesha obrazini bir aytadigan so'zi bor, "bundan ham battar bo'lishi mumkin ediku", deydi. Mana shu so'zni doim eslayman. Haqiqatdan ham shunday ekan. Yaratganga behisob shukur hammasi yaxshi.

-Ijodingizda duet taronalar ham bo'ladimi? Sir bo'lmasa kimlar bilan?

-Xa, Turk xonandalaridan Sevjan Orhanning 2009-2010yillari bo'lib o'tgan shousiga meni taklif etishgan edi. U yerda bir qancha taronalarim bilan qatnashganman. Ayni mana shu xonanada bilan birgalikda duet yozish niyatimiz bor.

-Chiroyli suhbatingiz uchun tashakkur. Suhbatimiz so'ngida saytimiz hamda muxlislaringizga chiroyli tilaklaringiz bo'lsa, marhamat bildirishingiz mumkin.

-Muz.uz saytiga men ijodiy muvaffaqqiyat, bundanda ulkan zafarlar tilab qolaman. Muz.uz saytini shunchaki aytib o'tib ketish mumkin. Ammo bu nom orqasida ishlayotgan, ijod qilayotgan odamlarning mehnati katta. Film yaxshi chiqsa, aktyor yaxshi deyishadida, film yomon chiqsa, rejissyor yomon deyishadi. Xuddi shunga o'xshagan narsada bu ham. Mana shu film orqasidan ko'plab ijodkorlar ter to'kishadi. Aytmoqchimanki, yengil bo'lmagan kasb. Muz.uz saytiga men ijodiy zafarlar tilab qolaman va iloji boricha odamlarni doim hayratga soladigan yangidan-yangi g'oyalar qilishingizga tilakdoshman. Ichingizdagi energiya hech qachon to'xtamasin. Bundanda yonib, yashnab, vulqon bo'lib toshaversin. Sahifalaringiz orasida biz ham doim mehmon sifatida tashrif buyurishlik nasib etsin.

-Rahmat, sizning ham ijodingiz gullab-yashnab, muxlislar olqishlariga sazovor bo'lib yurishingizni tilaymiz. Ijodingizda yangidan-yangi tarona va kliplarni kutib qolamiz. 

P.S.: Ushbu intervyudan ko'chirma olish hamda foydalanish taqiqlanadi. Ruhsatsiz intervyudan o'z manfaati yo'lida foydalanganlar, qonun oldida javob beradilar.