Hozirgi kunda o'zbek estrada olamida ijod qilib kelayotgan san'atkorlar soni juda ham ko'p. Bu albatta quvonarli holat. Muz.uz musiqa javoni hodimlari ham aynan mana shunday el ardog'idagi insonlar bilan birin-ketin suhbat o'tkazib, siz aziz muxlislar e'tiboriga ushbu suxbatlarni havola etishda davom etmoqda. Bu safargi mehmonimiz ham sizning ko'nglingizdan joy olib ulgurgani aniq. Nafaqat chiroyli ovoz sohibi balki "Begona bahor", "Jiyda guli" filmlaridagi obrazlari bilan xalq nazariga tushib ulgurgan xonanda va aktyor Anvar Sobirov!

-So'nggi kunlarda qanday ijodiy izlanishlar bilan bandsiz?

-Men avvallariga qaraganda atrofimdagilar ham shunga amin bo'lishyabdiki, ya'ni yangiliklarga juda o'ch bo'lib qolyabman. Oldingi ijodimdan biroz chekingan holatda, bu yilgi qilayotgan ijodimda katta o'zgarish bor. Tan olaman o'tgan uch-to'rt yil davomida xit qo'shiqlar qila olmadim. Bunga sabab meni hayotimdagi shaxsiy muammolarim. Ammo, men o'tgan yildan beri yillik rejalarni ishlab chiqdim. Mana bu oyda mana bu ishni qilaman, bunisida esa uni qilaman deb rejalashtirib, behisob shukurki, ularni 100% bo'lmasada 80%ga erishib kelyabman. Bu katta gap men uchun. Ammo tinimsiz yuguryabman. Bitta o'zimman. Misol uchun menda hech qanday prodyusser, administratorlarim yo'q. Faqatgina sozandachilarim, do'stlarim beminnat yordam berib kelishadi. Hozirgi kunda ko'proq taronalarim ichida radio to'lqinlarda muxlislar hukmiga havola etilayotgan "Axtarim" qo'shig'mga ko'proq urg'u berishga, xalqqa yetkazishga va aniqroq qilib aytganda reklama qilishga e'tibor qaratdim. Undan oldin ham qo'shiqlar yaratganman, ammo sozandalarim, hamkorlarim va klipmeykerlar bilan tanlab, aynan mana shu taronaga klip oldik. Sababi bu taronam avvalgi taronalarimdan tubdan farq qiladi. Shuning uchun bu taronamga klip sur'atga olib, shu kunlarda TVM kanali orqali muxlislarga taqdim etilyabdi. Shaxsan o'zim ijodkor sifatida bu taronamdan juda ko'p narsa kutyabman. Tarona qanchalik men kutgan natijani beradimi yo'qmi buni sanoqli vaqtlar o'tganidan so'ng bilib olishim mumkin. Mana shu tarona va klipim borasida muxlislar bilan internet saytlarida, ya'ni Muz.uz saytida ochiqdan-ochiq mayli tanqidiy bo'lsin so'rovnomalar o'tkazishni reja qilganman. Ularning fikrlari men uchun juda ham muhim ahamiyat kasb etadi. Mana shu yo'lda ketaymi, bu yo'l menga yarashdimi yoki yo'qmi degan savolni o'rtaga tashlamoqchiman. Bu galgi taronamni zamonaviylashtirib yubordim ammo milliylik ham bor. Men haqimda ma'lumotlarga ega bo'lishni istaganlar uchun o'zimni shaxsiy saytim ham bor edi. Uni bu yil boshqatdan yangiladik. Dizaynerlarini boshqatdan qilib, qiziqarli ma'lumotlarni joylashtirdik. Filmlarimdagi o'ynagan rollarimning kadr orti jarayonlari, men haqimdagi to'liq tarjimai-holim ushbu veb-saytimdan o'rin egallagan. Yaqin kunlarda esa "Axtardim" deb nomlangan o'n ikkita saralangan qo'shiqlardan tashkil topgan musiqiy albomimni taqdimot marosimini jurnalistlar, ommaviy axborot hodimlari bilan birga o'tkazish arafasidaman.

-So'nggi paytlarda televideniya orqali juda kam ko'rindingiz.

-Bilasizmi men shu kunga qadar faqatgina "Yoshlar", "NTT" kanali orqali ekranlarda chiqar edim. TVM kanaliga esa kliplarimni berganman, ammo bu kanalga video kliplarim to'g'ri kelmagan. Mana endi ushbu kanalga har tomonlama mos keladigan formatda ijod qilyabman.

-Mutaxxasisligingiz xonandalik to'g'rimi?

-Xa.

-U holda aktyorlik sohasiga qanday qilib kirib kelgansiz? 

-Aktyorlik sohasiga kirib kelishimni ham ozgina o'ziga yarasha tarixi bor. 2004-yil meni videokliplarim ilk efir yuzini ko'rib yurgan vaqtida "Begona bahor" filmining bosh rejissyori Ibrohim Rasulov aynan ushbu film uchun tanlov o'tkazayotgan vaqti bo'lgan. Shunda televizorda mening videoklipim ketayotgan bo'lgan va yordamchisiga mana shu bolani ham bir chaqirib ko'ringlar, ko'zlarida nimanidir sezyabman. Shunchaki chaqirib ko'ringlar, bo'lsa bo'ldi, bo'lmasa yo'q degan ekanlar. Shundan so'ng menga do'stim qo'ng'iroq qilib yuqoridagi gaplarni aytdi. Men esa hech ham rol ijro etmaganmanku, ammo o'zimga ishonaman deb katta gapirib qo'ydim. U holda mana shu vaqtda mana shu joyga kelasan dedi. Borsam ellik-oltmishta Teatr va rassomchilik instituti talabalari, qiziquvchilar bor ekan. Ularni har biriga ssenariylar berilgan ekan. Shu qatorda menga ham ssenariy berishdi. Ssenariyda esa filmda ko'rgan bo'lsangiz bosh qahramon qiz Nargizani zinadan sudrab ko'chaga olib chiqib ketadigan eng og'ir sahnasini ko'rsatib berish kerak edi. Xullas oradan bir hafta o'tganidan so'ng falon joyga kelasizlar kameralar bilan sur'atga olib sinovni o'tkazamiz deyishdi. Bir haftadan so'ng filmdagi xonadonga bordik, tumonat odam edi. hamma birma-bir topshira boshlashdi. Men esa o'ttizinchi bo'lib berilgan vazifani topshirdim. Bilasizmi, men topshirib bo'lganimdan so'ng sinov to'xtatildi. O'zbekiston Xalq artisti, filmda meni dadamni rolini ijro etgan san'atkor Isamat Ergashev men mana shu bolani shu obrazda ko'rdim, bo'ldi fikrimni o'zgartirmayman deb aytdilar. Tanlovda meni ikki marotaba sinovdan o'tkazishdi. Nargizani o'sha yerda ilk bora ko'rib turgan edim. Avvallari ham tanir edim, ammo hayotda uchrashmagan edim. Shunda birinchi sinovda qiz bolani ayaganim uchun u qadar ishonchli chiqmadi. Ikkinchi imkoniyatimda esa Nargiza men u qadar yomon odam emasmanku, ammo bu yerda uyalib qolishni hohlamayman, shuning uchun sizdan uzr so'rayman deb, shunaqanggi sudrabmanki, xatto stop deyishganini ham eshitmay qolibman. (Kuladi) Shundan so'ng meni bir ovozdan mana shu filmga bosh rol ijrochjisi sifatida tanlab olishgan. Ammo men juda cho'chiganman. Sababi ijodimni endi boshlagan vaqtlarim edi, odamlar qo'shig'ini aytib yuraversachi degan gaplaridan cho'chiganaman. Sababi o'sha vaqtda xonandalar filmlarda sur'atga tushib, tanqidlar ostida yurgan vaqtlari edi. Shunda men Ibrohim akaga montaj jarayonlarida ko'ring agar yaxshi chiqmagan bo'lsa, mayli moddiy tomondan ketgan mablag'larni iloji boricha to'lashga harakat qilaman deb aytdim. O'xshamagan bo'lsa ekaranga chiqarmaylik deb iltimos qildim. Bizda yaxshi bir maqol bor "Qosh qo'yaman deb ko'z chiqarib qo'ymaylik" degan maqsadda shunday dedim. Shunda Ibrohim aka siz avvalo menga ishoning, bu birinchi navbatda meni yuzim, bu ish uchun qancha mablag' sarf qilganman, agar meni ko'nglim to'lmaganida edi bu ishga bel bog'lamas edim, agar siz o'zingizni o'ylayotgan bo'lsangiz, men ham o'zimni o'ylayabman degandilar. Aynan bu filmimizning premyerasi bo'ladigan vaqtda  oldima-ketin meni ilk yakkaxon konsertim ham bo'lishi rejalashtirilgan edi. Shu qadar hayajonlangan edimki, sababi ilk konsert va ilk debyut rolim edi. Muxlislar, xalq qanday kutib olar ekan degan savollar qiynar edi. Ammo yaratganga ming bora shukurki ikkisi ham besh baho bo'lmasada to'rt baho bilan o'tdi deb ayta olaman. Shundan so'ng men bir qancha davlat filmlarida ham o'ynadim. Oxirgi o'ynagan filmim bu "Jiyda guli" bo'ladi. Hozir mana shu fursatdan foydalanib barcha Muz.uz musiqa javoni muxlislariga hamda barcha-barcha muxlislarimga aytmoqchimanki ya'ni meni to'y-hashamlarda ko'rganlar juda ham nafrat ko'zi bilan qarashyabdi. Shuning uchun barchangizdan uzr so'ramoqchiman. Men o'zim ham "Jiyda guli" bosh qahramoni Murodni yomon ko'raman. (Kuladi) Hayotdagi Anvar Sobirov bilan Murod obrazini bir-biriga chalkashtirish yaxshi emas. Ammo men xursandman mana shu rolimdan nafratlanganliklari uchun. Chunki bu meni yutug'im. Bilasizmi, shunday vaziyatlar bo'ldiki, o'tib ketayotgan odamlar "beting qursin" deb o'tib ketishyabdi. (Kuladi) Shuning uchun ham to'y-hashamlarga borganda qo'shiq kuylamasimdan oldin hammadan uzr so'rab, bu shunchaki rol ekanligini tushuntirishga harakat qilyabman. Shu vaziyatni ustozlarimga aytsam, ular sen bundan sevinishing kerak, bu seni rolingni yutug'idan dalolat. Agar odamlar be e'tibor bo'lishganida nima qilarding, o'zingni tanishtirib yurganingda ya'ni meni tanidingizmi men falonchi filmda o'ynaganman deb yurganingda nima qilar eding degan fikrlarni aytishdi. Sen mana shunday gaplarni gapirib o'zingni tanishtirganingdan ko'ra, odamlarni o'zi seni tanib roling haqida fikr bildirishgani yaxshi emasmi deb aytgan so'zlarida haqiqatdan ham jon bor. Ammo men xonanda bo'lganligim uchun ozgina noqulaylik yaratyabdi xolos. Agar men faqat aktyor bo'lganimda bu menga "plyus" bo'lar edi. Xonanda bo'lganim uchun, xalq qo'shiqlarimni nafrat bilan eshitsa bo'lmaydiku. (Kuladi)

-Hozir ham yangi filmlarga takliflar tushyabdimi?

-Juda ham ko'p takliflar bo'lyabdi yaratganga shukur. Mana shu o'ynagan filmlarimdan so'ng balki rejissyorlarning nazariga tushgandirman. Kerak bo'lsa komedik filmlarga ham taklif qilishyabdi. Ammo men o'zimni komedik filmlarda umuman ko'ra olmayman. Bunday janrda rol ijro etishni hohlamayman ham. Sababi, men xonanda bo'lganim uchun to'y-hashamlarda odamlar menga kulib qarab, aka bitta latifadan bo'lsin desa, bunday vaziyatlarga chiday olmayman. Chunki men juda jiddiy bo'lishni yaxshi ko'raman. San'at shunday narsaki, unda har kimning o'zini yo'nalishi bo'ladi. Misol uchun men Jahongir Poziljonov ijro etgan komedik rollarini ijro qila olmayman. Kuchim ham, ko'zim ham yetmaydi bunga. Shuning uchun ko'zim yetmagan narsaga qo'l urmayman. Gohida qo'shiqlar kuylaganimda ham ichki tug'yonim aytadi qila olasan yoki aksi deb. Yuragimga quloq tutaman doim. Men filmlarda ko'p rol ijro etishni hohlamayman. Sababi men xonandaman. Aktyorlik xonandaligimni bosib ketishini hohlamayman. Mening rejamda, niyatimda birinchi o'rinda xonandaligim turishi kerak. Muxlislar o'ynagan rollarim haqida fikr bildirib, juda yaxshi o'ynagansiz deb aytgan gaplari zarracha meni ko'ynimni ko'tarmaydi. Lekin kuylagan taronalarimdan birini yaxshi kuylabsiz, zo'r chiqibdi deyishsa ko'nglim tog'dek ko'tariladi.

-Sizga taklif qilishgan rollarga rozilik bildirdingizmi yoki aksinchami?

-Bilasizmi, endi men buyog'iga rol ijro etsam "Jiyda guli" filmidan plankasi juda ham baland bo'lgan filmlarda o'ynayman. Undan darajasi ancha baland bo'lishi kerak, ozgina ham emas. Sababi inson qadamni oldinga qarab bosish kerak. Sababi ‘Begona bahor" filmidan so'ng ikkita-uchta rol ijro etgan bo'lsam, oxirida "Jiyda guli" filmi bilan rollarimni yakunladim. Yaratganga shukurki, bu film menga muvaffaqqiyat olib keldi. Bu muvaffaqqiyatni yo'qotib qo'yishni hohlamayman. Filmlarda eng asosiysi ssenariy va uning g'oyasida. Agar filmning g'oyasi yaxshi bo'lmasa golivuddan aktyor olib kelsangiz ham u film yaxshi chiqmaydi. Filmlarda g'oya aktual mavzudir.

-Rol ijro etgan filmlaringizning sur'atga olish jarayonida biron-bir sizning esingizda qolgan qiziqarli voqealar ham bo'lganmi?

-"Jiyda guli" filmining sur'atga olish jarayonida juda bir qiziqarli voqea bo'lgan. Jiyda guli daraxti tagida bosh qahramon qiz bilan ko'z yosh bilan va'adalashadigan eng og'ir sahnasining syomka jarayonidan ikki kun oldin biz Nargiza bilan arazlashib qolgan edik. Diologni esa yigit va qiz bir-birini ko'ziga qarab aytishi kerak. Men unga qarab aytolmayman, u esa menga qarab aytolmaydi. (Kuladi) Rejissyor esa bizni gaplashmay arazlashib qolganimizdan behabar edi. Bir-birimizga qarab gapiryabmizu, ammo ishonarli chiqmayabdi. Sababi, ko'z baribir aldamaydi. Rejissyorimiz esa sizlarga nima bo'ldi, kechagina yaxshi edinglarku, nega o'ynay olmayabsizlar deb hayron qolayotgan edi. Oxiri esa men yorildim. Biz gaplashmayabmiz dedim. (Kuladi) Butun bir syomka jarayonidagi guruh bizni yarashtirish bilan ovora. Xullas bu og'ir sahnani ikki kuncha ola olmadik. Men ham birinchi bo'lib gapirmayman, uning ham birinchi bo'lib gapirgisi yo'q edi. Ikki kundan keyin esa Nargiza baribir qiz bola, uni hurmat qilaman dedim. Rejissyorimiz ham sen erkak kishisan, u esa ayol deb fikr bildirdilar. Shundan so'ng o'zim borib birinchi bo'lib gapirganman. Yarashib olganimizdan so'ng olingan sahna shunaqa chiroyli chiqqanki, bittagina dublda sur'atga olganmiz. Men birinchi bo'lib gapirganimga Nargizani ham menga nisbatan hurmati oshib ketdi. Ana shunday qiziqarli voqea bo'lgan edi.

-Xonandalikka keladigan bo'lsak, buyog'iga muxlislar sizdan yaxshi milliy estrada yo'nalishidagi taronalarni tinglashga muvaffaq bo'lishar ekanda?

-Albatta.

-Taronalaringiz yaratilishida g'oyalarga keladigan bo'lsak, g'oyalar tanlashda o'zingizning g'oyalaringizga tayanasizmi yoki o'z ishini ustalarigami?

-Barchasini o'zim qilaman deya olmayman. Ham jismonan, ham ruhan bunga meni kuchim ham, vaqtim ham yetmay qoladi. Hozir o'zimni atrofimga yaxshi bastakorlarni, yaxshi shoirlarni yig'ib, bir guruh qilib olganman, ular bilan ishlayman deb. Men o'ylaymanki, menga kuy bastalab, she'r yozib berayotgan insonlar meni hayotim haqida ma'lumotga ega, meni yaxshi biladigan bo'lishi kerak. Qanday taronalarni kuylay olaman buni tasavvur qila olishi kerak. Bulardan men juda hurmat qilgan shoir Sharofiddin Boltaboyev, Hamrohbek Siddiqov va Shuhrat Ahmedov kabi o'z kasbining ustalarini ijodini hurmat qilaman. Bastakorlardan esa oxirgi vaqtda ko'p qo'shiqlarimni ishlagan Jasur Javharnazarov, Jahongir Otaxonov va Maqsud Bekmurodovlarni o'zimga ijodiy hamroh sifatida tanlab olganman. Ularning ijodlari menga juda ham yoqadi. Kliplarga keladigan bo'lsak, Jamshid Hojiniyozovning menga ko'p yordamlari tegdi. Umuman zamonaviy ijodga qaytishimda bu insonning xizmatlari katta. Fursatdan foydalanib ularga o'z minnatdorchiligimni bildiraman.

-Ijodkor sifatida kimlarni alohida ta'kidlab o'tgan bo'lar edingiz?

-O'zbekistonda xizmat ko'rsatgan artist Alisher Fayzning ijodini juda ham hurmat qilaman. Uning nafaqat ijodini balki odamgarchiligini ham hurmat qilaman. Sababi, o'zidan kichikni izzat qiladi, kattani esa hurmat qiladi. Misol uchun boshqa san'atkorlarimiz ham bor. Yaxshi ijod qilishadi, ammo bilasizmi, ozgina ularda "Yulduzlik kasalligi" bor. Kerak bo'lsa ular bizdan keyin ijodini boshlagan. To'g'ri bu hayot. Hozirga kelib bizdan martabasi yuqorilashib ketgan. Ammo avvallari Anvar aka deb gaplashgan bo'lsa, yulduz bo'lganidan so'ng, qalaysan Anvar deydiganlari ham bor. Agar bu darajadan yana ozgina yuqoriga ko'tarilsa bilmadim "hoy" deb chaqirsa ham ajablanmayman. (Kuladi) Avvalambor insonni odobi, xulq-atvori kerak bo'lsa san'atidan ham birinchi o'rinda turadi. Bu albatta meni shaxsiy fikrim.

-Sizga ham "Yulduzlik kasalligi"ga chalinibsan degan fikrlar hech bildirilganmi?

-Juda ko'p aytishgan. Bilasizmi, men ko'cha-kuyda jiddiy yurishga harakat qilaman. Bunday fikrni eshitib qachon qayerda nokamtarlik qilgan ekanman deb eslay olmayman. Agar biron yerga borganimizda biron kimsani ko'rmay so'rashmay qolganimizdagi holatlarni aytishayotgan bo'lishsa, odam ko'p joyda har kimsa bilan birma-bir so'rashishga aslo imkon bo'lmaydi. Mana shunaqanggi kichik narsani ham manmanlikka, kibrga yo'yadilar. Ular o'zlarini bir daqiqaga bo'lsa ham bizni o'rnimizga qo'yib qo'rishsin. Ular ko'pchilik, biz esa bir donamiz. Gohida biron-bir kishi bilan so'rashsak, qo'lingizni qo'yvormaydi, qulog'ingizga dardini aytib ketadi. Mana sizga oddiygina bir kichik misol. Bundaylardan nechta. Axir to'g'ri tushunishlari kerak.

-Muxlislar uchun konsert dasturi berish niyatingiz ham bormi?

-Men 2011-yil Istiqlol san'at saroyida besh kun konsert dasturini berganimdan so'ng, shunda endi har ikki yilda konsert beraman deb fikr qildim. Avvallari har yili may oyining oxiri, iyun oyining boshlarida konsert dasturimni qo'yar edim. Endi bunga o'zgartirish kiritmoqchiman ya'ni kuz oylarida konsert berishni reja qilganman. Konsert dasturimga tayyorgarlikni hozirdan boshlaganman. Yangiliklar haqida yaqinlarim bilan birga bosh qotiryabmiz.

-Nima uchun har yili emas, ikki yilda bir konsert bermoqchisiz?

-Har yili konsert berish sifatga juda halaqit qiladi. Tasavvur qiling bitta konsertda uzog'i bilan yigirma yettita tarona kuylanadigan bo'lsa, har yili yigirma yettita sifatli tarona yozilish kerak bo'ladi. Ammo bir yilda buncha sifatli tarona yozib bo'lmaydi. Axir san'atkor kuylagan taronasini ichida yashashi kerak. Bizda to'y-hashamlarga hizmatlar bor, oilamiz bor. Aytib o'tganlarim bilan birga yigirmatadan oshiq sifatli tarona yaratib bo'lmaydi. Bizdan avvalgi o'tib ketgan mashhur ustozlarimiz bir yilda bitta yoki ikkita sifatli tarona yaratishgan. Men aytmoqchi bo'lganim ikki yilda ham buncha tarona yaratish ya'ni sifatlisini yaratish kamlik qiladi. Shuning uchun ijod qilib konsert dasturiga tanlab-tanlab taronalaringizni qo'yishingiz kerak. Mening shaxsiy fikrim bo'yicha ikki yilda bitta konsert qo'yilishi bu maqsadga muvoffiq bo'ladi deb o'ylayman. Shunda muxlislar ham sog'inishadi. Har yili konsert berishim kerak ekan deb oldiga maqsad qo'yish bu – majburiyat emasku axir.  Agar san'atkor tayyor bo'lsa qo'ysin. Kim san'atkorlarga konsert bermading deb bo'ynidan bo'g'adi? Konsert qo'ysa uni ko'klarga ko'tarishadimi? Agar u haqiqatdan yaxshi bo'lsagina ko'klarga ko'tarilishi mumkin.

-Konsertingizda muxlislar sizdan jonli ijroni kutishayotgan bo'lishsa kerak.

-Bu yilgi konsertim albatta jonli ijroda bo'ladi.

-100% ?

-100% emas.

-Nima uchun?

-Chunki jonli ijroning 70% moliyaviy tarafga borib taqaladi. Sababi, aytaylik biron narsa ellik so'mga bitsa, jonli ijroda bir yuz ellik so'mga bitadi. Buning moddiy tomonini ko'tarish kerak bo'ladi. San'atkor o'zining jonli ijroda kuylashiga tayyor bo'lsayu, moddiy tarafdan tayyor bo'lmasa bo'lmaydi. Buning uchun bizga katta homiy kerak.

-Jonli ijro kuylashning nimasiga pul kerak bo'ladi?

-San'atkor konsert dasturini qo'yishidan ikki oy avval tayyorgarlik ko'radi to'g'rimi? Konsert sozandalarsiz o'tmaydi. Har bir sozanda o'rtacha qilib oladigan bo'lsak, har kelishiga ellik ming so'mdan oladi. Bu bitta sozandaga to'lanayotgan narx. Yigirmata sozandagachi? Keyingisi raqqosalar. Agar konsertda fonagramma orqali kuylansa, raqqosalarga tarona yozilgan diskni tashlab ketasiz tayyorgarlik ko'raveradilar. Jonli ijroda esa ular ham siz bilan mashq qilishlariga to'g'ri keladi. Biron joyini boshqacha kuylasak, raqs san'ati sxemadan chiqib ketadi. Xullas musiqa va ijro bilan barobar raqsga tushishlari va juda katta mehnat kerak bo'ladi. Men ayatyotganlarim professional jonli konsert dasturini aytyabman ya'ni hamma narsa jonli. Musiqa va raqslardan torib ijrogacha.

-San'atdan bo'sh bo'lgan vaqtlaringizda nimlar bilan mashg'ul bo'lasiz?

-Yana san'at bilan mashg'ul bo'laman. (Kuladi) Sababi ijoddan bo'sh qoladigan vaqtim yo'q. Bo'sh qoldim deguncha o'ylayveraman zamondan ortda qolib ketmaslik uchun. Bizni kasbda inson ham ruhan, ham jismonan toliqadi. Shaxsan o'zimda shunday, ko'p o'ylayman, izlanaman, she'riy kitoblar o'qiyman, ko'pchilik bilan bog'lanishim kerak bo'ladi. Xullas rahbar ham, ishchi ham, qoravul ham, buhgalter ham o'zim. Gapirayotgan ham o'zim. (Kuladi)

-Hozirgi kunda filmlarda sur'atga tushish bilan band emassiz shundaymi?

-Xa. Bilasizmi, men buyog'iga har besh yilda bir filmda sur'atga tushaman deb rejalashtirib qo'yganman. Nasib qilsa har besh yilda tomoshabinlar va muxlislar oldida imtihon topshirish niyatidaman. Aslida u qadar ekrandan tushmaslikka, aktyorlikka davogarlik qilmayman va bunga hohishim ham yo'q. Ko'proq xonandalikka e'tibor qarataman.

-Anvar aka hozir sizga bir savol bergim keldi. Hayotingizdagi eng yaxshi kun…?

-Hayotimdagi eng yaxshi kun bu mening birinchi konsertim vaqtida bo'lgan. Men uchun unutilmas bo'lib qolgan. Sababi birinchi konsertim bo'lganligi uchun juda qattiq hayajonlanganman. Bilasizmi, hozir ilk konsertimni videosini ko'rganimda o'zimni ko'rib qo'rqib ketaman. Shunaqanggi ozib ketganman. Konsertning yugur-yugurlari bilan shuningdek qo'rquv bo'lgan va hayajonlanganman muxlislar qanday qabul qilishar ekan deb. Ich-ichimdan sevinish bo'lgan vaqt bu-meni bolaligimda dadam menga velosiped sovg'a qilgan vaqtlarida bo'lgan. Beg'ubor sevinish, quvonish hali-hamon yodimda qolgan. O'sha vaqtdagi sevinchim bilan hozirgi kundagi sevinishlarni taqqoslasam, hattoki somalyot sotib olsam ham bunday sevinmayman. (Kuladi) Yoshingiz katta bo'lgani sayin yosh boladek sevinish yo'qolib boraverar ekan. Bolaligimizda ota-oanamiz hiyobonga olib borsalar shu qadar sevinardimki, hozir esa mashina olsam ham, uy-joy olsam yoki bo'lmasa o'zimni xuddi o'sha davrdagidek sevintirishga harakat qilsam ham bo'lmaydi. Baribir bolaligingizdagi beg'ubor sevinishlar bola bo'lgan vaqtingizda qolib ketar ekan.

-Juda yaxshi suhbatdosh ekansiz. Vaqtingizni ayamay tashrif buyurganingizdan juda xursandmiz. Suhbatimizning so'ngida esa muxlislaringiz hamda saytimizga atalgan chiroyli tilaklaringiz bo'lsa, marhamat bildirib qolishingiz mumkin.

-Men mana shu ijtimoiy tarmoqlarni doim kuzatib boraman. Saytlar orqali yaxshi tavsiyalarni, qolaversa yangiliklarni bilib olishimiz mumkin. Oxirgi uch-to'rt yil mobaynida Muz.uz musiqa javoni bilan hamkorlik qilib juda ko'p muvaffaqqiyatlarga erishdim. Kichik bir misol ya'ni so'nggi klipimni birinchi bo'lib Muz.uz saytida premyera qildim. Kuniga ikki yuz elliktadan odam kirib tamosha qilibdi. Men boshqa saytlarni ham kuzatib boryabman. Ularda esa unchalik natija bo'lmagan. Muz.uz musiqa javonini ko'p kuzatadigan, yaxshi ko'radigan muxlislari ko'p ekan. Fursatdan foydalanib saytingizga yanada ijodiy parvozlar tilayman. Hamkorligimiz abadiy bo'lsin. Kliplarim haqidagi fikrlarni chet eldagi tanishlarim bildirganda, qayerdan olding deb so'rasam, Muz.uz saytidan deb aytishadi. Demak chet elda ham muxlislaringiz bor ekan. Bundan juda ham xursandman. Parvozingiz yuqorilab boraversin.

Sizga ham ijodiy parvozlarni tilab qolamiz. Chiroyli fikrlaringiz va tilaklaringiz uchun tashakkur.