Muz.uz sayti muxlislari e'tiboriga navbatdagi intervyu sahifamizning galdagi mehmoni bilan bo'lib o'tgan suhbatimizni taqdim etamiz. Aslida advokat, ammo shu bilan birgalikda o'zbek kino olamida ham bir-qancha rollari bilan xalq nazariga tushib ulgurgan aktyor Otabek Mahkamov biz bilan qiziqarli suhbatda bo'ldilar. Bugun ular bilan dildan suhbat qurdik. San'atga qanday kirib kelishi va hozirda ijodiy jarayonlaridan tortib, qolgan barcha ma'lumotlarni quyida o'zingiz o'qib, guvohi bo'lishingiz mumkin.

-Avvalo san'atga qanday kirib kelganligingiz haqida aytib o'tsangiz?

San'atda hamisha bo'lganman. Yuridik nuqtai-nazardan, ya'ni o'zimning kasbimdan kelib chiqqan holda. Ko'plab san'atkorlarning muammolari orqali taniganman. Ularda qandaydir boshlariga yuridik muammo tushsa, yoki yuridik maslahatlar kerak bo'lib qolsa, hamisha menga murojaat qilishar edi. Xalq meni umuman tanimas edi. Ammo san'atkorlarning barchasi meni yaxshi tanir edi. Barcha san'atkorlar bilan so'rashib, yaxshi muloqotga kirib ketganimda odamlar, bu ham aktyormi deb ikkilanishar edi. Kunlardan bir kun men juda yaxshi ko'rgan, hurmat qilgan xonandamiz Shohruhxon bilan suhbatlashib qoldim. U aytdiki, biz "Bo'rilar-3" filmini sur'atga olyabmiz, mana shu yerda sizning yuridik maslahatingiz kerak dedi. Filmda tergov jarayoni bor. Shu yerda haqiqatga to'g'ri keladigan joylarini ko'rib bersangiz dedi. Men ham ko'plab filmlarda mutaxxasis sifatida ishlaganman, albatta ko'rib beraman dedim. U filmda tergovchining besh daqiqalik roli bo'lgan. Men tergovchining qanday bo'lishini, ya'ni u sovuqqon, savollari mana bunday, hazil qilmaydi deb tushuntirganman. Filmda tergovchi rolini San'at va Madaniyat instituti talabasi o'ynashi kerak bo'lgan. U esa uddalay olmadi. Men esa tushuntirdim. Hohlaganingizni qiling dedim. Men kasbimdan kelib chiqqan holda maslahatimni berdim. Bu yog'i sizga havola dedim. Film rejissyori Zebo Navro'zova meni qoniqmaganimni ko'rib, demak, tomoshabin ham qoniqmaydi degan xulosaga keldi. Shunda ular menga o'zing o'ynab bera olmaysanmi deya taklif bildirdilar. Men esa yo'q men yuristman, advokatman, tarjimonman, menimcha menga to'gri kelmasa kerak degan fikrni bildirdim. Haligi tergovchi rolini o'ynayotgan yigit esa, to'g'ri, tushuntirish boshqa, o'ynab berish boshqa deb rolni ko'rsatib berishimni aytdi. Xa shundaymi deb, juda yaxshi hozir sizga mahorat maktabini ko'rsatib beraman deya rolni ko'rsatib berdim. Syomka jarayonlari tugadi. Filmni badiiy kengashga ko'rsatishgan vaqtda, ular rejissyorga bu tergovchini ya'ni aktyorni qayerdan oldingiz deb so'rashgan. Shunda Zebo Navro'zova bular maqtamoqchimi yoki yomonlamoqchimi mana shuni bilish uchun "nimeydi" deganlar. Shunda badiiy kengashdagilardan biri, menimcha bu yerlik bo'lma kerak, Moskvadan olib kelgansizlar shekili degan. Zebo Navro'zova ham "ha" deb javob berganlar. Kengashdagilar esa, baribir u yerdagi oliy o'quv yurtida o'qigani bilinib turibdi, ammo nima uchun u yerdan olib kelib atigi besh daqiqalik rol berdingiz, menimcha rolini kattalashtirish kerak deya fikr bildirishgan. Demak badiiy kengashga yoqibdi. Shundan so'ng menga rejissyorlar tomonidan juda ko'plab takliflar tusha boshladi. Hozirgi kunga qadar o'ttiz-qirqta filmlarda rollar ijro etdim.

-Mana shu badiiy kengashdagi inson sizni o'zbek fuqorosi ekanligingizni bildimi?

Shunisini bilmayman. Bu vaziyat bo'yicha hikoya jimlik saqlaydi. Sababi men bilmayman kim so'raganini. Menimcha albatta vaqti kelib bilgandir. Ayniqsa Ozodbek Nazarbekovni klipidan so'ng. Bunisini so'rab ko'rish kerak. Yaxshi savol berdingiz bir qiziqib ko'rish kerak albatta. Shundan so'ng o'ntacha va yigirmatacha filmlarda faqatgina yuridik qahramonlarni ya'ni prokuror, sudya, tergovchi, advokat juda bo'maganda soliq hodimini rollarini ijro qilganman. Kiyilmagan formalarim ham qolmadi. Oxiri tiktirib olsammikin deb o'yladim. Chunki doim formalarni biri katta, yoki kichik kelaverardi. Shundan so'ng menga boshqa bir jiddiy rollarni ishonishni boshlashdi. Misol uchun "Jodugar" filmida u yerda ham advokat rolini o'ynaganman. Biroq bu rol juda katta va juda qiyin rol edi. Ammo men qahramonimni salbiy deb bilmayman. Sababi yuristlar maslahat beradi. Agarda filmni oxirgi kadrlariga ahamiyat bersangiz, u yerda Otabek Musayev menga "Nima uchun sen bag'ritoshsan, insonning hayoti sen uchun bir pul?"- deganida, "Men yuristman. Mantiqan to'g'ri maslahat berish bu meni vazifam. Hohlasang maslahatimga quloq tut, hohlamasang quloq tutma" degandim. Shunda Otabek Musayev menga ikkinchi savolni beradi ya'ni "O'rnimda bo'lganingda nima qilar eding?" deydi. Men esa "Birinchi o'rinda men seni o'rningda hech qachon bo'lmagan bo'lar edim. Chunki birorta qilar ishni qilishdan oldin inson obdon o'ylashi kerak. Filmni oxirida aytadiku "axir men u qizni sevganman" deb, "mana shu seni katta xatoying". Sababi sevishni ham sevishi bor. Mana shunday suhbatlar bor filmda. Shundan keyin "Oqpadar", "Yoningdaman" filmlarida rol ijro etdim. Hamma qahramonlarim salbiy negadir. Bilmadim o'zim hayotda yaxshiman. (kuladi)

-Rollaringizning ko'p qismi salbiy bo'lgani uchun ijobiy qahramonlarni o'ynashni ko'proq hohlasangiz kerak?

Albatta hohlardim. Ssenariysi yaxshi bo'lsa, albatta o'ynardim. Menda ham ijobiy qahramonlarim bor. Shunchaki aksariyat rollarim salbiy qahramon. Chunki bu o'zimni yo'nalishim. O'zimni topib olgan yo'nalishim desa ham bo'ladi. Chunki sarson bo'lmayman. Rejissyorlar ham rol taklif qilishdan oldin mana shu filmda mana shu joyida sizni ko'ryabmiz deyishadi. Bu albatta ijodkorni quvontiradi. Menimcha men yonaman, o'laman, kuyaman rollarini o'ynay olmasam ham kerak. Sababi aktyor rol o'ynamaslik kerak. Aksincha unda yashashi kerak. Shuning uchun men ham shunga harakat qilyabman. Sun'iy bo'lgan joyini tomoshabin juda yaxshi biladi. Mana bu yerida sun'iy chiqibdi, mana bu yerda o'xshata olmabdi va hokazolar. Mana shunday gaplardan asrasin. Men undan ko'ra epizod rol o'ynayman lekin yaxshi filmda va esda qolarli epizodda. Meni elga tanitgan rolim bu, "Yondiradi-kuydiradi" filmidagi mahmadona tadbirkor yigit roli bo'ladi. Mana shu rolim bilasizmi uch yarim daqiqa. Shu filmdagi epizodim meni tanita boshladi. Sababi filmdagi bosh qahramon Ulug'bek Qodirov bilan meni qahramonimni juda katta farqi bor edi. Ulug'bek Qodirovning qahramoni ko'cha bolasi, hech qayerda o'qimagan, meniki esa Londonda o'qib kelgan tadbirkor yigit qahramoni edi. "Majruh" filmida ham qattiq qo'l tergovchi rolini o'ynaganman.

-Filmda Lolaning qahramoniga uylanmoqchi bo'lgan yigit siz edingiz to'g'rimi?

Xa, o'xshamay qolgan kuyov bola ya'ni qizning ota-onasi hohlagan-u, ammo qiz hohlamagan yigit roli edi. Kichik bo'lsada, esda qolarli rol bo'lgan. Ko'pchilik San'at va madaniyat instituti talabalari maslahat olgani yonimga kelishadi. Bizni filmlarga olishmaydi, biz professional aktyormiz, akyorlarni ko'chadan olishyabdi deyishadi. Qanday kinoda o'ynamoqchisiz desam, bilmadik bosh rol bo'lsa bo'ldida deyishadi. Shunda men xa chunarli siz bu ketishda ellik yilda ham birorta filmda chiqa olmaysizlar dedim. Sababi ularga darrov bosh rol kerak. Inson o'z talablarida pastroqdan kelishi kerak. Har bir inson poyma-poy, zinama-zina maqsadlariga erishaveradi. Ammo buning uchun vaqt kerak. Har bir narsani noldan boshlash kerak. Dastavval epizod. Nima ekranda ketmon ko'tarib o'tib ketamanmi deyishadi. Kerak bo'lsa o'tib ketasan. Chunki bu tajriba. Gyotening bir yaxshi gapi bo'lgan: Tajriba bu haqiqatning eng asosiy tamoyili. Men ham ijodga mana shunday kirib kelganman.

-Haqiqiy o'zingizni yuragingizga yaqin bo'lgan kasbingiz qaysi deb bilasiz? Aktyorlik balki bu sizga hobbidir?

Yo'q. O'ttizinchi rolimdan so'ng bildimki, aktyorlik bu mening ikkinchi kasbim. Agar turmush qurmagan inson menga bu savolni bersa, men unga bir savol beraman ya'ni sizga qaysi qo'lingiz ko'proq yoqadi o'ngimi yoki chapimi deyman, agar u turmush qurgan bo'lsa, qaysi farzandingiz ko'proq yoqadi deyman. Vaholanki, bu savolimga ikkalasi ham degan javobni berishadi. Menda ham xuddi shunday. Ikkala kasbim uchun ham jonimni berishga tayyorman. Sababi, men qaytadan tug'ilib, qaysi kasbni tanlaysiz degan savolga aynan mana shu kasbni ya'ni advokat va aktyorlikni degan bo'lar edim. Aktyorlik bu shunday kasbki, bilasizmi yanvarda menga hech qanday filmga takliflar bo'lgani yo'q. Fevralda esa naqd beshta filmga ketma-ket takliflar tushdi. Aslida insonning o'z kasbini tanlashida ota-onaning o'rni ham juda katta. Men ham yoshligimdan ota-onamga bir nechta tillarni yaxshi o'rganayabman, endi kelajakda tarjimon bo'laman deganman. Agar o'sha davrda onam yo'q, tarjimon bo'lmaysan deganida men atayin albatta tarjimon bo'lar edim. Keyin buni xatosini bilardim vaqt o'tganidan so'ng. Ammo unda kech bo'lar edi. Men tarjimon bo'laman deganimda onam aytdilarki, bemalol faqat bir narsani unutma, agar tarjimon bo'lmoqchi bo'lsang, eng oliy pog'ona sen uchun bu Buxoro, Samarqandga borib turistlarga ekskursiya o'tib, git bo'lasan yoki mehmonxonada ishlaysan dedilar. Chet tili bu sizni boshqa bir o'zingizni maqsadingizga bo'lgan vosita. Inson kasbining haqiqiy mutahhasisi bo'lishi kerak. Qaysi soha mutahhasisi bo'lishidan qat'iy nazar inson o'z kasbini chet tilida ham bilsa, o'zbeklarda yaxshi bir gap bor ya'ni til bilganga bir tanga emas, ming tanga to'lanadi. Shunda onam aytdilarki, marhamat bemalol tarjimon bo'lishing mumkin deganlarida men yo'q bo'lmaydi deb, ma'lum vaqt o'tganidan so'ng, o'qituvchi bo'laman dedim. Shunda onam, juda ham yaxshi. Shu narsani bilib olginki, parta va o'qituvchilik stulidan oshib hech qayerga ketmaysan. Bu ham bir oliy kasb. Men ham o'qituvchi bo'lganman, buving ham dadang ham o'qituvchi bo'lishgan deb aytdilar. Shunda men bunga ham ko'nmadim. Unday bo'lsa men aktyor bo'laman dedim. Oyim yana fikr bildirdilar, ajoyib fikr! Lekin sen jahon kino aktyorlarini tarixini o'qigin, o'zbek va rus aktyorlarini tarjimai-holini o'qigin dedilar. Ularni har oyda filmga taklif qilishar ekanmi deb aytdilar. U vaqtlarda internet bo'lmagan. Shuning uchun kitoblardan qidirib, ko'plab aktyorlarni tarjimai-holini o'qib chiqqanman. Xattoki ba'zi aktyorlarda bitta kinodan so'ng, boshqa filmlarga yillab takliflar bo'lmagan ekan. Vaholangki, ular ham butun umr esda qolarli rollardan birini talqin qilishgan. Shunga o'xshash holatlar jahon kinomatografiyasida juda ko'p bo'lgan ekan. Agar shunga tayyor bo'lsang, haligi nemis tilida yaxshi bir gap bor, "Hamma narsa yoki hech narsa" bo'ladi. Senda birdan hamma narsa bo'lishi mumkin yoki yillab kutib o'tirasan, balki takliflar tushib qolar deb. Shunda men onajon unda mendan nima hohlayabsiz, u kasbni aytsam bunday deysiz, bunisini aytsam unday deysiz dedim. Ana shunda onam, shunday bir universal kasb bo'lishi kerakki, sen bundan avval aytib o'tgan kasblaring uni ichiga kirib ketishi kerak deb javob berdilar. Shundan so'ng kimlar hamisha har qanday insonga kerak bo'ladi deb o'ylab ko'rdim. Albatta advokatlar degan fikr keldi miyyamga va mana shu sohaga intilib, Markaziy Yevropa Universitetida o'qib, magistirlik, doktorlik disertatsiyasini yoqlab, dars bera boshladim. Keyin qarasam yuridik kasbida nazariya boshqa, amaliyot boshqa. Yoki faqat nazariya bo'lar ekan ya'ni olim bo'lishingiz mumkin, yuzga yaqin ilmiy ishlarni yozib uni chop ettirishingiz mumkin. Men esa ko'chada ishlayotgan yurist bilan gaplashib, u qaysi tilda gaplashayotganini bilmay qoldim. Amaliyot umuman boshqa ekan. Shundan so'ng men amaliyotga qarab o'tib ketdim. Ya'ni chet el korxonalarini yuristi bo'lib ishladim. Qarasam umuman boshqa va qiziqarli kasb. So'ng mana shu ikkalasini birlashtirishga harakat qildim. Hozirda O'zbekiston Respublikasi Auditorlar Milliy Asotsiatsiyasida dars beraman. Wesminister va Diplomatiyada ham darslar olib boraman. Men ularga birinchi bo'lib nazariya keyin esa faqat amaliyotni o'taman. Talabalarga bu narsa qiziqarli. O'zimga ham. Sokratni yaxshi bir gapi bo'lgan: O'qitib turib, o'zimiz o'qib olamiz degan. Shunda men yurist kasbini tanlaganimdan so'ng, tarjimonlik ham qildim, ya'ni chet eldan yuridik maslahatga kelgan insonlarga tarjimon kutib o'tirmasdan o'zim suhbatlasha oladigan bo'ldim. Mana tarjimonlikni ham epladim yurist bo'lib turib, dars beraman har payshanba-juma kunlari, mana endi aktyorlik ham yaxshimi-yomonmi bor har qalay. Menimcha men noto'g'ri yo'l tanlamadim.

-Bir nechta kasb egasisiz. Ishlaringizni reja asosida qilasizmi? Biri-ikkinchisiga halaqit berib qolmaydimi?

Bunday holatlar juda ham ko'p bo'ladi va bu yerda strategiya nuqtai-nazardan har qanday masalaning qaysi birini hoziroq hal qilish kerak, qaysi birini bir soatdan so'ng, boshqasini esa ertaga ham hal qilsa bo'ladi. Mana shularni ajratib olish kerak. Misol uchun kechagina NTT telekanalining Navro'z bayramiga meni chaqirishdi. Soat birga kelsangiz bo'ladi deyishdi. Mana shu soat birgacha men ikkita sudda qatnashdim, bitta yuridik maslahatim bo'ldi, bitta kastingdan o'tib keldim. Soat birgacha hamma ishlarimni qilishga harakat qildim. Sababi, bilaman syomka jarayonlari kechgacha davom etadi. Men soat birga yetib bordim ammo bayram dasturi soat ikki yarim, uchlarda boshlandi. Syomka jarayoni boshlanganida esa korxonamdan qo'ng'iroq qilib qolishdi. Kelmasangiz bo'lmaydi, qattiq tekshiruv kelib qoldi deyishdi. Shunda boshlovchi Nasiba Maqsudovaning oldilariga borib, meni suhbatimni tezroq olib olinglar, boshqa bir muammolarim chiqib qoldi dedim va suhbatimizni yozib olishdi. Men esa korxonam tomon yo'l oldim. Ishxonadagi ishlarimni bitiriboq ayni shu kuni eng yaqin do'stimning to'yi edi va men to'yga yo'l oldim. Xa albatta men sal kech qolibroq bordim. Lekin men ulgurib bordim. Mana shu ishlar birgina kunda bo'lib o'tgan ishlar. Bular har doimgidek bo'ladigan holatlar. Tasodifiy chiqib qolgan ishlarni ham to'g'ri taqsimlashga harakat qilaman.

-Mana shu kasblaringizdan tashqari bo'sh bo'lgan vaqtlaringiz ham bo'ladimi yoki…?

Oxirgi besh yil ichida yo'q.

-Ishlaringizdan tashqari hech narsaga vaqtingiz bo'lmas ekanda?

Yo'q albatta bo'lib turadi. Misol uchun do'stlarimiz bilan birgalikda jahon kinolari chiqganida ularning premyeralariga borib turamiz. Tog'larga chiqib turamiz. Men o'zim ham ish yuzasidan chet el safarlariga juda ko'p boraman. Mening dam olishim, madaniy hordiq olishim bu chet eldagi tarixiy yodgorliklarni aylanish. Mana shunday qilib men o'zimga ozuqa va kuch olaman.

-Rejissyorlar tomonidan filmga takliflar tushganida rol tanlaysizmi?

Albatta.

-Ammo aktyor rol tanlamasligi kerakligiga nima deysiz?

Aktyor rol tanlamaydi ammo yurist aktyorlar emas.

-Aktyorni yuristi yoki boshqachasi bo'lmaydiku…

Yo'q bo'ladi. Misol uchun men komedik rollarni rad etaman. Chunki meni ishimga ham to'g'ri kelmaydi. Rashid Holiqovning birgina komedik klipida chiqqanimga qaysi sudya, qaysi prokuror ko'rmasin yaxshiku, ammo sizga ko'proq jiddiy rollar yarashadi degan fikrlarni aytishdi. Bu meni fikrimku, ammo aktyor ham o'zining yo'nalishiga qarab rol tanlashi kerak. Aktyorning yo'nalishini esa xalq tanlaydi. Sababi, men bir kuni ko'chada ketayotganimda o'nta inson yo'limda uchradi va ularning aytgan so'zi bir xil edi, ya'ni "Men yulduzman" filmidagi rolingizni yaxshi o'ynabsiz degan so'zlarni aytishdi. Sizga jiddiy rol yarashadi deyishdi. Ba'zilar kelib Rashid Holiqovning klipidagi rolingiz yarashmabdi deyishdi. Demak shunda o'zim uchun bilib oldimki, komediya men uchun emas ekan. Men undan ko'ra qo'limdan kelgan va xalqqa yoqqan ishni qilishim kerak. Xalqqa meni ko'proq yuridik rollarda, jiddiy va salbiy rollarda rol ijro etganim yoqar ekan. Demak mana shu yo'nalishni davom ettirishim kerak. Ammo, yaqinda yangi bir taklif oldim. Umuman boshqacha rol, ya'ni ko'chaning bezori bolasining roli. Men esa rad etmadim. Qani ishlab ko'raylikchi, ko'ramiz. Inson eksperiment qilib ko'rishi kerak. Bir narsani bo'lmaydi, o'xshamaydi deyish juda oson. Undan ko'ra o'zini sinab ko'rishi kerak.

-Demak yaqinda sizni o'zgacha obrazda ko'rishimiz mumkin bo'lar ekanda?

Ko'ramiz. Nasib qilsa boshqacha obrazda o'zimni sinab ko'raman.

-O'zbek kino olamiga bo'lgan munosabatingiz qanday? Filmlarimiz g'oyalari bir-biriga juda o'xshash emasmi?

Bilasizmi, biz yoshligimizda kinosaroylarda atigi ikkita yoki uchta bannerlar turardi holos. Hozir esa e'tibor bersangiz o'n ikkita, o'n uchta turadi. Ya'ni tomoshabinlar tanlash huquqiga ega. Men har narsani, har qanday bo'lgan muammoni yuridik prizmadan ko'raman. Har bir insonni tanlash huquqi bor. U o'zi uchun bilib oladi qaysi kino yaxshi yoki aksinchaligini. Didlar xar hil bo'ladi. Filmlarning g'oyalariga keladigan bo'lsak, gollivud kinolarining ham g'oyalari bir-biriga o'xshash. Bollivudniki ham o'xshash. Biror narsani yomonlash, tanqid qilish juda oson. Film olish juda ham qiyin. O'ziga yarasha mashaqqatlari bor. Men tanqid qilmoqchi emasman. Sababi, o'zim shu qozonda qaynayman. Men ko'rganman uning qiyinchiligini. Men bir narsani aytishim mumkinki, o'zbek kino sanoati yaxshi rivojlanmoqda. Minus va plyuslar bor, bo'lgan va hamisha bo'ladi ham. Filmlarni esa tomoshabinni o'zi tanlab oladi.

-Tanqidga munosabatingiz qanday?

Konstruktiv tanqidga munosabatim juda ham ijobiy. Kimni qanday tanqid qilishiga bog'liq. Shunday bo'lib qoldiki, bir qo'shnim bor. Butun hayoti davomida bir kun ishlamagan. O'ta-onasining bo'ynida haligacha. Bu odamning har kuni qiladigan ishi faqat ichish, ota-onasining qonini ichish. Bir kuni ketayotsam, yo'limdan chiqib qoldi va dedi: Otabek sen anavi Ozodbek Nazarbekovning klipida chiqdingku, menga umuman yoqmadi. Bunday rolda boshqa chiqmagin, hecham menga yoqmadi dedi. Men esa hop hop deb ketaverdimda, haligi gapni miyyamdan darhol chiqarib tashladim. Keraksiz narsalarni miyyadan chiqarib tashlash kerak. Ammo menga yaqinda Farruh Zokirov aytdilarki, haligacha parashyutga boryabsanmi To'ytepaga dedilar. Xa dedim . Ular esa bormagin boshqa deb aytdilar. Nima uchun desam, yaqinda bir joyda o'qidim 1 % ochilmay qolish ehtimoli bor ekan. Agar parashyut ochilmay qolsachi dedilar. A endi bu peshonada. Agar inson ajali yetsa, shu kuni parashyutga bormasa ham bir nima sabab bo'lib o'ladi dedim. Ular yo'q shunday bo'lsa ham, meni hurmat qilsang borma iltimos dedilar. Men ham ularni gaplarini qulog'imga ilib boshqa bormay qo'ydim. Shuning uchun tanqidni kim qilayotganiga va qandayligiga hamisha qarash kerak. Har qanday bo'lgan tanqidni o'zining induvidialligi bor. Men mana shu narsalariga qarayman.

-O'zingiz haqingizda mish-mishlar ham eshitganmisiz?

Juda ham ko'p. Ayniqsa oxirgi payt eshitgan mish-mishim bu – men Mirzabek Holmedovning o'g'li ekanman. (Kulgu ko'tarildi) "Mirzo teatri"ning konsertida biz Mirzabek Holmedovning turmush o'rtog'i Feruza opa bilan birga o'tirgan edik. Bu birinchi yil emas. Har yili konsertlarda qatnashaman. Ko'p konsertlarda birinchi qatorda o'tiramiz. Ular taklif qilishadi. Demak men shuncha insonlar bilan qarindosh ekanligimni bilmagan ekanman. Mish-mishlarga qarashim juda ham yomon. Men yuridik nuqtai-nazardan ham talabalarga hamisha aytaman, mish-mishlarga hech qachon ishonmang, faqat hujjatlarga ishoning deb. Qonunga ishonish kerak. Men insonga ishonmayman. Men insonlarga qachon ishonaman? Qachonki, uning so'zlarini tagida imzosi, muhri tursa, ana shunda ishonaman. Meni kasbim mana shunday. Agar men birorta mish-mishni eshitib qolsam va unga qiziqsam, uni albatta tekshirib ko'raman. O'sha insonning o'zidan yoki hujjat nuqtai-nazardan tekshirib ko'raman. Chunki o'zbek shou-biznesiga, jahon shou-biznesiga, Rossiya shou-biznesiga aloqam bor. Rossiya shou-biznesidagi ijodkor Filip Kirkorov haqida o'g'illik bo'libdi va buni hammadan berkitayotgan ekan degan gapni eshitgandim. Men bu gapni eshitib, yo'g'e shunday bo'libdimi deb unga qo'ng'iroq qildim. Uni ancha yillardan beri bilaman. Qo'ng'iroq qilsam haqiqatdan o'g'illik bo'lganini aytdi. Men esa bu gapni uni o'zidan eshitganimdan so'ng bunga ishondim. Yaqindagina o'zbek ijodkorlardan birini o'ldiga chiqarib yuborishdi. Taksilarga o'tirsam, faqat shu gap. Shunda bir shafyor uni o'ldi deyayotganda shafyorning oldida ijodkorning o'ziga qo'ng'iroq qilib gaplashdim. Ovozini eshitgan shafyor bu haqiqat emas, yolg'on ekanligiga amin bo'ldi.

-Suhbatimiz so'ngida MUZ.UZ saytiga, muxlislarga Navro'z tabriklaringiz bo'lsa  marhamat.

Barcha-barchaga bahoriy kayfiyat, sog'lik-salomatlik tilayman va o'zimning hayotiy tajribamdan kelib chiqqan holda uchta asosiy narsani tilab qolardim:

1) O'zlarining sog'lig'i. 2) Yaqinlarini sog'lig'i. 3) Yaqinlari doim yonida bo'lishini tilab qolaman. Saytingizga esa nafaqat O'zbekiston Respublikasining ichida bo'lgan omad, balki xalqaro nuqtai-nazardan kelib chiqqan holda jahonning saytlar uchun qanday mukofotlari bo'lsa, ana shularning barchasiga erishishingizni tilab qolaman.

Sizga ham tilaklaringiz hamroh bo'lishini tilaymiz. Bahor faslining eng go'zal bayramlaridan biri Navro'z ayyomi muborak bo'lsin. Ijodingizda yuqori parvozlarni ijodiy guruhimiz nomidan tilab qolamiz.