Yulduzli intervyu sahifamizning bu safargi mehmoni sizning sevimli aktyoringiz, "Bo'rya" obrazi orqali barchaga yaxshi tanish bo'lgan, qolaversa bir-nechta filmlarning rejissyori Sanjar Shodiyev bugun saytimiz mehmoni. Qiziqarli suhbatimizdan bohabar bo'lishni istasangiz marhamat  uning to'liq matnini siz uchun taqdim etamiz.

-Sanjar aka avvalo san'atga qo'ygan ilk qadamingizga turtki bo'lgan narsa nima?

-San'atga kirib kelishimga sabab bu otam. Ular san'atkorlar. Faqatgina onam bunga qarshi bo'lganlar. Olmani tagiga olma tushadi deb bejizga aytmas ekanlar. Onam dadamga siz san'atkor bo'lgansiz, endi san'atingiz o'zingiz bilan ketaversin deb aytar edilar. Buni qarangki, onamlar hohlamasalar ham oilamizda hamma san'at yo'lidan ketgan. Akam rassom, singlim jurnalist. Mana men ham san'at ichidaman.

-Hozigi kunda yangi film ustida ishlayotgan ekansiz, ya'ni barchamizga ma'lum bo'lgan "Kavkaz asirasi" filmining o'zbekcha talqini. Mana shu filmni sur'atga olishingizga nima sabab bo'ldi? Nima uchun aynan mana shu film?

-Bilasizmi, men mana shu filmni sur'atga olaman deb also o'ylamagan edim. Abdulaziz Zokirov ismli qo'shiqchi yigitimiz bir klip olayabmiz, mana shu klipga kavkaz kerak, shu klipga kavkaz bo'lib tushib bering deb iltimos qilib qoldi. Men ham rozilik bildirib, keling "Kavkaz asirasi" filmidan parcha qo'yamiz deb taklif bildirdim. Shunda klipni sur'atga olayotgan Nozim Tolipov bilan fikrimiz bir joydan chiqib, aktyorlarni tanladik. So'ng, jurnalistlardan biri menga ijodingizda qanday yangiliklar deb savol berganida, men hazillashib "Kavkaz asirasi" filmining yangicha talqinini olyabman deb aytgan edim. Bu  ma'lumot barchaga tarqalib, tinimsiz qo'ng'iroqlar bo'lib, savollar bera boshlashdi. Barchadan yaxshi fikrlar eshita boshladim. O'ylab qarasam Moskva ijodkorlari ham qancha filmlarni yangicha talqinda sur'atga olgan. Misol uchun "Qushday yengil bo'ling", "Kavkaz asirasi"ni ham yangicha talqinda sur'atga olishgan. Shunda men ham mana shu filmni sur'atga olsam qanday bo'lar ekan degan fikrga kelib qoldim, bir-ikki homiylar ham qiziqib qolishdi. Film uchun aktyorlarni tanlash borasida ham oldinda katta kasting turibdi. Nasib qilsa kasting orqali aniqlaymiz.

-Filmingizda Abdulaziz Zokirovning klipidagi aktyorlar jamlanmasi rol ijro etishadimi?

-Albatta ular bilan birgalikda boshqa aktyorlar ham kasting orqali tanlanib olinadi. Maqsadimiz mana shu filmni muvaffaqqiyatli chiqishida. Filmning asl holatidagi joylarini, mashinalarni ham topdim. Film so'zlari ustida ham ishlashga harakat qilyabman.

-Sizni barcha muxlislar aktyor sifatida yaxshi tanishadi. Hozir esa rejissyorlikda o'zingizni sinab ko'ryabsiz. Asl mutahhasisligingiz bu ikkisidan qay biri?

-Men drama kino rejissyorligini ustozim hozirgi Milliy Akademik Dramma Teatrining rejissyori Valijon Umarov qo'l ostilarida besh yil o'qib tugatganman. Asl kasbim rejissyor. Oliygohni tugatgan vaqtda hisobot topshiriladi. Ustozlarim mana shu hisobotda 170 ta spektaklda rol ijro etganimni ko'rishgan. Kursdoshlarimda esa spektakllar soni o'ntachaga ham bormagan. Shunda sen o'zi aktyormisan yoki rejissyormi deb kulib yuborishgan. Kim chaqirsa sahnani yaxshi ko'rib, o'ynab ketaverganman. Shundan so'ng, oliygohni tugatayotgan vaqtimizda ustozimiz Burhon Sharopov tomonidan "Bo'rya" obrazi uchun filmga taklif qilganlar. Ko'chada seni ko'rishganda Bo'rya deb chaqirishadi degan edilar. Men esa o'sha vaqtda meni Bo'rya deb chaqirishlariga ishonmaganman. Ssenariyni o'qib chiqqanman va rol menga yoqqan. Mana shu o'ynagan ilk filmim omadli bo'lib, boshqa filmlarga ham takliflar tusha boshladi. Men o'zi aslida Dramatik, jiddiy aktyor bo'lmoqchi edim. (Kuladi) Hozir ham qanday jiddiy rol o'ynamay, xalq baribir kulib qabul qilyabdi. Men ham jiddiy rol o'ynashni hohlayman. Ro'llarimni jiddiy o'ynayman ham.

-Jiddiy rollarga ham taklif qilishdimi?

-Taklif qilishdi. Syomka jarayonlaridan so'ng u film jiddiy komediya bo'lib ketyabdi. (Kuladi) Men filmda ortiqcha qiliqlar qilib chiqmaganman. Tabiiy gapirishim shunday, balki yuzim kulguli chiqar. Misol uchun aytaylik siz rejissyorsiz va "Tohir-Zuhra" filmini sur'atga olyabsiz. Meni Tohir roliga taklif qilarmidingiz? (Kulgu ko'tarildi) Menda ham Tohirda bo'lgani kabi ikkita ko'z, qosh, bitta quloq, burun va og'iz bor. Shunchaki meni bunday rolda xalq qabul qila olmaydi. Avvalo mana shunisiga ham rahmat.

-Sizni ilk filmingizdanoq komedik aktyor sifatida ochib berishdi. Mana shu o'ynagan komedik rollaringizdan qoniqasizmi?

-Boshida hafa bo'ldim. Sababi ko'chada siz tanimagan odamlar betingizga qarab kulib o'tib ketishi g'alati tuyilgan. Birinchi kiyimimga qarar edim. Biron joyim g'alati turganmikin deb o'ylardim. Boshida ko'nika olmadimda. Ustimdan kulyabdimi deb nechtasi bilan urish ham qildim. Keyinchalik esa, hozirgi kunga kelib nima hazil bo'lsa ham kulib qabul qilaman. Men hazil qilsam ham ko'tarishadi. Ko'ngillariga qattiq olishmaydi. Bu tarafdan yaxshi. Ikkinchi tarafdan esa jiddiy bola emas, bu bola masxaraboz deb qabul qiladigan odamlar ham bor. Komediya shunday bir yo'nalishki, u bir qildek gap. Sal tepaga chiqsangiz bachkanalik deyishadi. Sal pastroqqa tushsangiz hozirgi til bilan aytganda "Yemabdi" deyishadi. San'at olamidagilar komediya yo'nalishi oson emasligini juda yaxshi biladilar. Bitta hazilingiz bilan xalqqa yoqmay qolishingiz mumkin. Ko'pchilik ismimni ham yaxshi bilishmaydi. Asli ismim Sanjar Shodiyev. Keyingi paytda sur'atga olgan filmimdan so'ng Sanjar Shodiyev ekanligim bilindi. Undan oldin esa "Bo'rya" deb chaqirishar edi. Qo'l telafonimga qo'ng'iroqlar bo'lar edi. Go'shakni ko'tarsam, "allo kim bu? Xa men Sanjarman" desam, "iltimos Bo'rya akani chaqirib yuboring" deyishar edi. (Kuladi) O'zimni o'zim ovozimni qalin qilib, assalomu alekum desam, Borya aka yashimisiz deyishar edi. Men shu kunga qadar  oltmish beshta filmda rol ijro etgan bo'lsam, ulardan Anvar, Sanjar, Erkin, Qilich bo'lib ham o'ynadim. Ustozimiz Burhon Sharopov bu safar seni Goga qilib tanitaman deganlarida u ham foyda bermadi. Baribir Bo'rya bo'lib qoldim. Men laqab olgan aktyorlar qatoriga kiraman. Odamlar ham qiziq. Oldimga kelib Bo'rya aka ismingiz nima deyishadi. Sanjar desam, ismingiz Sanjar a Bo'rya aka deyishadi. (Kuladi) Misol uchun Obid Yunusov "O'tkuriy", Tesha Mo'minov "Yo'lchi", Yodgor Sa'diyevni Bek aka deymiz. Men ularga o'zimni teng qo'yib, ular kabi san'atkorman demoqchimasaman. Shunchaki san'atkorlarni orasida men ham laqab olgan san'atkorman demoqchiman. Bu laqabni men o'zimga-o'zim qo'ymaganman. Xalq qo'ygan. Aksariyat shou-biznes olamida oltmish deya olmaymanku ammo qirq-ellik foiz o'z ismidan, ota-onasi qo'ygan ismidan or qilganday bir kattaroq nom qo'yib, Falonchixon, Falonchibek bo'lib chiqishadi. Men esa Sanjar ismim bilan faxrlanaman. Mana shu meni xalqqa tanitgan komediyada ham rol ijro etganimdan xursandman. Bilasizmi men Raj Kapurni juda ham yaxshi ko'raman. U filmlarda yig'lamaydi, kulib turaverdi. Lekin tomoshabin uni ko'rib yig'laydi. Mana shuni o'zi katta narsa. Hayot – magnit qonuni deyishganidek, kulib turgan odamga qarasangiz uni ham dardi bor. Faqatgina jiddiy yuradigan insonlarda dard bo'lar ekanmi? Yo'q unday emas, kulgan inson kulib yengadi barini.

-Hozirgi kunda rejissyorlik sohasida o'z ish faoliyatingizni olib boryabsiz. Muxlislaringiz endilikda sizni aktyor sifatida ham ko'radilarmi? Balki o'zingiz sur'atga olgan filmlaringizda rol ijro etarsiz?

-Agar nasib qilsa o'zim olgan filmlarda o'zim rol ijro etmasam film sur'atga olmayman.

-Sabab?

-Men shunga qaror qildim. Raj Kapurdan ham so'rashgan ekan. Nima uchun siz o'zingiz olgan kinolaringizda faqat o'zingiz o'ynaysiz deyishganida, men o'zim rol ijro etmasam film sur'atga olmayman deb javob bergan ekan. Chunki men oxirgi sur'atga olgan "Jigarbandim" va undan oldingi "Qalb ko'zi" filmlarimda aktyorlarni o'ynatdim. O'zim esa rol ijro etganim yo'q. Rejissyor bu kino ortidagi inson. Film yaxshi chiqsa, aktyorlar biz qiynaldik juda, lekin chiqarib berishga harakat qildik deydi. Agar film yomon chiqsa, men adashib tushib qo'ydim, hayotimda juda yomon adashdim deydi. Rejiseyorlik bu shunaqa kasbki, rahmatdan ko'ra lanat ko'proq bo'lib qoladi. Bu kasbni egallash har kimga ham emas. Shuning uchun rejissyor o'qigan bo'lishi kerak. Meni ham ustozim, seni rejissyor qilib o'qitgan edim, sen esa aktyor bo'lib ketting. Qachon filmlar sur'atga olasan? Axir bu kasblarning piri der edilar. Shundan keyin mana to'rtta film sur'atga oldim. Ortiqcha olganim yo'q. Bu meni o'zimni o'qigan kasbim bo'lgani uchun filmlar oldim. Olgan filmlarimda o'zim sur'atga tushaman deganimning sababi, ko'chalarda yurganimda odamlar meni to'xtatib, qachon endi o'zingiz qachon chiqasiz aka, bir sizni ham ko'raylik, chiqmay qo'ydingiz deb aytib qolishadi. Shundan so'ng, bo'ldi endi o'zim chiqaman deb o'zimga-o'zim so'z berdim. Boshqa bir filmlarda ham sur'atga tushmoqchi bo'lganmanku, ammo ko'pini qaytarganman. O'ynamayman deb chiqib ketganman. Sababi, filmda men ketayotgan bo'lar ekanman va o'zimdan-o'zim yiqilib ketishim kerak ekan. Nima u devonani rolimi yoki komediyami? Yoki bo'lmasa, ovqatlanayotganimda ovqat to'kilib ketib, qatiq yuzimga chaplanib ketishi kerak ekan. Men rad qilsam, menga aka komediyani tushunmas ekansiz deyishadi. Xa bu komediyami? Siz kino olib odamni mensimay qo'yibsiz degan gaplarni aytishgan. Axir ular bilmayabdiku nima olishayotganini. Bir tomonimga qarasam bosh rolda san'atkor bo'lmagan bir yigit kinoga tushsam bo'ldi deb to'rt ming dollar berganmi bilmayman. Bir tarafimda esa bir qiz. to'rtta qo'shiq aytgan. Hech kim tanimaganidan filmda rol o'ynasam tanib qolishar deb o'ylayotgan qiz. Bu tarafimga qarasam kechagina klip sur'atga olib yurgan klipmeyker, men ham kino olsam nima bo'lar ekan deb yurgan odam. Men ularni orasida yuribman. Agar sal noto'g'ri gapirib qo'ysangiz, sizni yomonga chiqarib qo'yishyabdi. Menga kerak emas dedim. Gap har kuni filmlarda ko'rinishda emasku. Misol uchun buyuk rejissyorlarni olsak, ularni filmlari ko'p emas, to'rt dona. Lekin ular dunyoning eng qimmat rejissyorlari. Ham boy, ma'naviy boy. Milyarderlar qatorida turadilar. Bilasizmi, Germaniyalik bir rejissyor "Ginnes rekordlari" kitobiga kirgan ekan. O'ttiz sakkizta kinosi bor ekan. Eng qizig'i o'ttiz olti yoshda dunyodan o'tgan ekan. (Kuladi) Bironta kinosini hech kim eslamaydi uni. Gap bizda son uchun emasku.

-Hozirda ikki haftada filmlar yaralib chiqyabdi. O'zingiz film sur'atga olsangiz qancha vaqt sarflaysiz?

-Men misol uchun "Jigarbandim" filmimni to'rt-besh oyda olganman. Ikki haftalik filmlarga kelsak, ularni o'zingiz ham bilasiz. Filmni tomosha qilsangiz, hamma kadrlar bitta uyda olingan. Bir xonasida boshqa oila, bir xonasida esa boshqa bir oila. Film tomosha qilinadigan narsaku. Kimni ahmoq qilishmoqchi. Kuni-kecha bir jurnalist menga hozirgi filmlar bachkana olinyabdi deydi. Shunda sizga bir savol beraymi dedim. Ana shu siz aytayotgan filmlarni rejissyori kim ekanligini yaxshi bilasiz, aniq bilasiz uni kimligini, lekin nima uchun bir og'iz ularni o'ziga aytmaysizda, kelib bizga tosh otasiz dedim. Bizni qalqon qilib, aytmoqchi bo'lganlaringizni bizga gapirib ularga yetkazib bermoqchisiz deb aytdim. Bilmaysizmi kimligini dedim. Juda bo'lmaganda eng bachkana kinofilmlar top o'ntaligini tuzib chiqing. O'zi kelib chiqadi shunda dedim. Buni bitta siz va men emas balki ko'chadagi insonlarni to'xtatib so'rasangiz ham bo'ladi. Bir kuni qishlog'imdan bir shafyor aytdiki, Sanjar aka Assalomu alekum, anavi palonchi rejissyorni qo'l telefonini raqamini bilmaysizmi dedi. Yo'q nima qilasiz uni desam, xa bizni jiyan kinoda o'ynamoqchi ekan deydi. (Kuladi) Qancha bersak filmga olib chiqadi desa bo'ladimi? (Kuladi) E qoyil dedim. Qishloqdagi tanishlarim bilan o'tirsam, Sanjar bizam bir kinoda o'ynaylik, tog'larni orasida o'lib ketmaylik deyishadi. Shunchalik oson bo'lib qoldimi bizni kasb? Hamma qilsa bo'ladigan kasbmi? Yoki bo'lmasa chiroyli qalin qosh va chiroyli lab kinoning go'zalligi deb o'ylashadimi? Hattoki, chaqaloqlarni olib kelishgan kunlar bo'ldi. Mana shu qizchamiz ham tushsin filmga deb. U chaqaloq tushdi nimayu, tushmadi nima? Axir chaqaloqlar bir yilda yeti xil tusga kirib o'zgaradi. Ana shunday vaqtlarda bizni kasb shunchalik oson bo'lib kettimi deb o'ylab qolaman. Yana menga qo'shiq aytib chiqibsiz, nima endi bu degan savollarni berishdi. Avvalo "Dilkash lahzalar" ko'rsatuvi uchun aytdim. Mana shu narsani bilishmaydi va savollarni beraverishadi. Avvalo savol berishdan oldin o'sha odam haqida to'liq ma'lumotga ega bo'lish kerak. Ko'pchilik umr bo'yi xonandalik qilganlar kinolarda o'ynashyabdi. Ustoz san'atkorlarimiz davralarda boshlovchilik qilishyabdi. Ularniki bilinmaydi, bizniki bilinib qoldimi? Biz o'qish jarayonida vokaldan darslar olganmiz. Men qo'shiqchi sifatida, endi buyog'iga qo'shiq aytaman deb qo'shiq kuylamadim. Avvalo bu hobbi men uchun.

-Bundan keyingi sur'atga oladigan filmlaringiz sir bo'lmasa qanday mavzularda bo'ladi. Jiddiy melodramma yoki komediya janridami?

-Men jiddiy komediya olmoqchiman. "Yetti haykal bitta kal" filmiga o'xshagan komediya olaman. Agar e'tibor bersangiz, men sevgi mavzularidan biroz chetga qochaman. Bu degani menda yurak yo'q degani emas. Shunchaki bu mavzu jonga tegdi. "Voy qizimizni bo'yi yetib qoldi, sovchilar kelyabdi, qachon uzatamiz?" Mana shunday kadrlardan charchadi xalq. Men esa yettidan yetmish yoshgacha tomoshabinlar ko'rsa bo'ladigan komedik film ishlashni maqsad qilganman. Bilasizmi, meni yonimga ikki-uchta ayol kelib shunday deyishdi, Sanjarbek bola-chaqalardan ham qutulsangiz baribir ham muammolar tugamas ekan. To o'zingiz go'rga ketmaguningizcha bunday muammolardan qutulmas ekansiz. Biz ham muammolardan dam olish uchun kinoga kelamiz. Bu yerga kelsak filmlarda ham ana shunday muammolar bo'ladi. Biz o'zi ovunish uchun, ikki soat vaqtimizni g'am-tashvishlarni esdan chiqarish uchun kelamiz. Sizdan iltimos filmlaringiz orqali bir kuldiring. Butun ikki soat davomida hamma muammolarni unutaylik. Bir miriqib kulaylik deb qolishdi. Ana shundan keyin men bundan-buyog'iga komedik filmlar ishlayman dedim va mana shu komediya orqali xalqqa nimadir yetkazib berishga harakat qilaman. Hozirda ikkita-uchta komediyalarim bor. Faqatgina ularni nomini ayta olmayman. Agar hozir aytsam, ertagayoq bir butun jamoa shu ishni boshlab yuborishadi. (Kuladi) Shuning uchun hozirda uchta loyihalarimdan biri ya'ni "Kavkaz asirasi" filmini olib xalqimizga taqdim etishni reja qilganman.

-O'zingiz sur'atga olgan filmlaringizdan tashqari boshqa filmlarning premyeralariga ham tushib turasizmi?

-Albatta. Boshqa filmlarni ko'rmasadan turib, qanday qilib ular haqida fikr bildirish mumkin?

-Hozirgi kundagi filmlar tomoshabinlarga nima beryabdi deb o'ylaysiz?

-Menga ham olgan filmlaringiz bilan nima bera oldingiz deb savol berishadi. Teatr va kino ahmoqlarni o'tkazib qo'yib, tarbiyalaydigan maskan emas. Aqlli insonlar o'tirib madaniy hordiq chiqaradigan maskan. Tomoshabinni har biri o'zi uchun nimadir oladi. Har bir inson o'ziga kerakli narsalarni oladi. Har bir tomoshabin filmni bir xil qabul qilib olmaydi. Fikrlar esa har xil bo'ladi. Agar filmlarimizni sayozi bo'lmaganida tomoshabin yaxshi filmlarni qadriga yetmas edi. Alisher Navoiyning bir gapi bor, "Farosatni befarosatdan o'rgan". Nimaga endi befarosatdan deb savol berilsa, sababi sen befarost qilgan ishni qilmasang, farosatli bo'lib ketasan deyishadi.

-Intervyularingiz jarayonida siz jurnalistlarga bir savol bilan yuzlanasiz ya'ni "Mega yulduz" va "Nega yulduz" nima? Mana shu savolni bugun o'zingizga bermoqchiman. Ularni farqi nimada?

-"Mega yulduz" va "Nega yulduz" bor. "Mega yulduz" o'z-o'zidan ma'lumki taniqli yulduz. "Nega yulduz" esa qayerdan yulduz bo'lib qoldi? (Kuladi) Nega yulduz bu degani. Har kuni televideniyada, radio to'lqinlarda tinmay taronalari aylantiriladi. Bu televideniya va radiolarga pulini to'lasangiz aylantirib beraveradi. Sur'atlarga tushishadi. Xullas u o'zi uchun yulduz. Premyeralarda ham ko'ramiz, konsertlarda ham ayiqcha va gul berib yig'lab quchoqlagan inson u ashaddiy muxlis emas yoki xolasi, yoki ammasi. Haqiqiy muxlisi yo'qku uni. Nima keragi bor soxtalikni? (Kuladi) Mana shundaylarga qarab o'ylab qolaman. Yulduz bo'lish oson, ammo yulduzlikni ushlab turish qiyin.

-Siz ijodini hurmat qilgan, havas qiladigan rejissyorlaringiz bormi? Kimlarni ayta olasiz?

-Albatta. Men Ibrohim Rashidovni juda hurmat qilaman. Qolaversa, Said Muxtorov, ustozim Burhon Sharopov hamda teatrdagi ustozim Valijon Umarovni ayta olaman. Yaxshi rejissyorlarimiz juda ko'p. Yoshlarimiz orasida Jahongir Ahmedov, Sherzod Shohalilovlarni ayta olaman. O'zbek rejissyorlarimizdan juda ham ko'p yaxshi ijod qilib kelayotganlardan. Endi bilasizmi, har bir narsa siz kutganday chiqmaydi. Bir film olaman mana bunday bo'ladi deb o'ylaysizu, ammo kutganingizdek bo'lmasligi mumkin. Misol uchun aytaylik yaxshi rejissyorlarimizdan Bahrom Yoqubov, Rustam Sa'diyevlar olgan filmlar juda yaxshi, ammo hamma filmlari ham muvaffaqqiyat qozonmaganku. Bu ham omadga bog'liq.

-Buning sababi nimada? Aktyorlar jamlanmasini yaxshi tanlay bilishdami?

-Endi masalliqlar yaxshi bo'lgani bilan oshni pishira olmasangiz, u osh bo'lmaydida.

-Sizni filmlaringizda yangi chehralarni ham ko'rishimiz mumkinmi? Yoki doimiy ko'p filmlarda o'ynayotgan aktyor hamda aktrisalarni ko'ramizmi?

-Bilasizmi, menga shunday savol berishgan ya'ni "Yetti haykal bitta kal" filmingizda aktyor o'ynatmabsiza Sanjar aka deb savol berishganda hayratda qoldim. Aktyor o'ynatsam tanimabsizlarda dedim. Misha Komenskiy, Ubaydullo Omon, Murod Rajabov, Muhammadiso Abdulhayirov, Malika Ibrohimova, Said Muxtorov, Zuhra Soliyeva va boshqalar ishtirok etishgan. Menimcha juda ko'p aktyorlar bilan film sur'atga olganman. Men shunchaki ko'chadagi odam bilan film sur'atga olmaganman. "Jigarbandim" filmida ham ko'pgina yaxshi aktyorlar bilan ishladim. Aytmasam ham bilasiz o'zingiz ularni kimligini. Birinchi sur'atga olgan "Ortiqcha omad" filmimda esa to'g'risini aytsam pulim bo'lmagan. Shuning uchun bosh rolni o'zim o'ynaganman va shu filmim omadli kelib, "Ijodiy parvoz" kinofestivalida birinchi o'rinni olgan. Sahnaga meni ismimni aytib chaqirishganida boshlovchi, filmdagi qahramonni o'zi film rejissyorimi deya kulib yuborgan edi. Birinchi filmim bo'lgani uchun homiylar pul berishga cho'chishgan. Shu sababli mablag' menda kam bo'lgan.

-Ko'pgina el xizmatidagi ijodkorlar oilasiga vaqt ajrata olmaydi. Sizda qanday? Oilangizga qancha vaqt ajratasiz?

-Qizalog'im olti yoshga kirgan. Hazil qilib, dada bugun biznikiga kelasizmi deydi. (Kuladi) Umrimni ko'p qismi mashinada o'tib ketadi. Hattoki shunday vaziyatlar bo'ladiki, ertalab Qashqadaryodaman, kunduzi Toshkentda, kechqurun esa Vodiyda bo'laman. Bir haftalab mashinalarda yurgan vaqtimiz ham bo'ladi. Men uhlasam yonimdagi odam mashinani boshqaradi, u uhlasa men. Ba'zida odamlarga hazil qilib, akalar artist ham odamdek gap deyman. (Kuladi) Ular ham odamlarga o'xshaydi. Odamlarga o'xshab uhlagisi keladi deyman. Ba'zi bir hollarda esa men biror narsadan siqilib qolgan vaqtimda, hattoki onam ham ishonmaydilar. Artistsanda deydilar. Shunda onajon meni o'zingiz dunyoga keltirgansiz, siz ishonmasangiz boshqalarni gapirmasa ham bo'lar ekanda deb qo'yaman. To'ylarga ham aytaylik to'rt oy oldin gaplashib, boramiz deb aytib qo'yamiz. Biz kabi sog'ligiga kafolat beradigan insonlar bo'lmasa kerak. Kelishdikmi borishimiz shart. Biz turli hil bahonalar qila olmaymiz. Xullas vaqtlarimiz juda ziq. Xalq xizmatida yuramiz. Shunday vaqtlarda "Dilkash lahzalar" da aytgan birinchi qo'shig'imizni she'ri yodimga tushadi.

Ertayu-kech to'y-hashamda,

Yiroqda yursam o'shanda.

Yo'llarimda zor-intizorim,

Uyda kutar ayolim.

Farzandlarim ko'ray deyman,

Ular tomon boray deyman.

Bir erkalab quchay deyman.

Mana shu misralar doim yodimga tushadi. Ammo harakat qilaman oilamga ham iloji boricha vaqt ajratishga.

-Bo'sh vaqtlaringiz bo'lganda oshxonaga ham yaqinlashib turasizmi?

-Bilasizmi, men bitta kartoshkani o'zidan yetti xil ovqat tayyorlayman. (Kuladi) Albatta bu hazil. Taom tayyorlash borasida u qadar yaxshi emasman. Bir-ikkita taomlarni bilaman xolos.

-Sanjar aka qiziqarli suhbatingiz uchun tashakkur. Suhbatimiz so'ngida chiroyli tilaklaringiz bo'lsa marhamat.

-Inson dunyoda hamma narsani yo'qotishi mumkin. Davlatini, pulini, baxtini lekin umidini yo'qotmaydi. Umidini yo'qotgan insonda hech narsa qolmaydi. Umid hamisha insonni tirik va maqsadlari sari olg'a olib boradi.

"Niyat qilib suqilgan tayoq,

Bir kun berar mevayu-yaproq"

Ilohim mana shu umidingiz so'nmasin. Doim olg'a qadam tashlayvering. Shundagina hamma narsaga erishaverasiz. Hayollar surishdan, oyoqlar yurishdan, yuraklar urishdan, lablar kulishdan hech qachon to'xtamasin.

Mana shunday chiroyli tilaklar sizning ham hamroxingiz bo'lishini tilab qolamiz. Sizdan yangidan-yangi filmlarni kutib qolamiz. Ijoddiy muvaffaqqiyat sizni also tark etmasin…