Intervyu sahifamizning bu safargi mehmonlari sizning sevimli bo'lib ulgurgan ijodkorlaringiz ya'ni Umid hamda Muhammadali Iskandarovlar. Bugun ular bilan dildan suhbat qurdik. Nafaqat ijodi balki hayoti bilan o'rtoqlashgan aka-uka juda samimiylik bilan savollarimizga javob berishdi.

 

-Hozirgi kunda ijodingizda qanday yangiliklar?

Umid Iskandarov: Kuni kecha men rol ijro etgan ikkita yangi filmning premyerasi bo'lib o'tdi. Ya'ni "Sabr" hamda "Fotima" filmlari ekran yuzini ko'rishni boshladi. Hozirda esa menga uchta taklif bildirishyabdi. Ularni ko'rib chiqayabman. Tohir Saidov taniqli aktyorimiz yangi film ishlayotgan ekanlar. Ibrohim Rasulov ham yangi ish boshlash arafasida ekanlar va yana bir oylarda "Bir soniya" nomli film ham chiqishi kerak. Hozircha mana shunday ijodiy izlanishlar bilan bandman. Shu bilan birgalikda "Men buyuk yurt farzandiman" shiori ostida butun viloyatlarda gastrol safariga bormoqdamiz. Xalq bilan ko'rishib, turli hil targ'ibot ishlarini olib boryabmiz. Ertaga esa Samarqand viloyatiga yo'l olamiz.

 

-Omma e'tiboriga taqdim etilgan yangi filmlarda qanday obrazlarda gavdalandingiz? Ular ham avvalgi rollaringizga o'xshagan obrazmi yoki aksincha?

Umid Iskandarov: Har ikkala filmdagi rolim ham har xil. Avvalgilariga o'xshamaydi. "Sabr" filmidagi rolimning avvalgilari bilan o'xshash tarafi shundaki, film oila mavzusida. Rolim ham shunga mos. "Fotima" filmidagisi esa triller desa ham bo'ladi.

 

-Shu kunga qadar o'ynagan rollaringizdan ko'nglingiz to'ldimi? Har bir obrazingiz bir xil bo'lib qolayotgandek tuyilmaydimi?

Umid Iskandarov: "Fotima" filmidagi obrazimdan ko'nglim to'ldi. "Sabr" filmidagi obrazimni uncha emas demoqchimasman. U ham o'ziga yarasha. Shaxsan o'zimni har ikkisidan ham ko'nglim to'ldi.

 

-O'ynagan qahramonlaringizdan qay biri sizning fe'l-atvoringizga, ichki kechinmalaringizga yaqinroq?

Umid Iskandarov: To'g'risini aytsam hech qaysi ishlagan qahramonimga o'xshamayman. Ammo, biron-bir rolni ijro etayotganingizda o'zingizdan qaysidir bo'laklaringizni tashlab ketasiz. Har bir aktyorni o'zini "fishkasi" bo'ladi. Aktyor qaysidir epizodda o'zining biron-bir jihatini rolda mujassam etib ketadi. Lekin butunlay o'xshash qahramonim yo'q.

 

-Muhammadali siz hozirda bir-qancha vidiokliplar sur'atga olyabsiz.

Muhammadali Iskandarov: Xa men rejissyorlikka qo'l urganman. Bu kasbni avvaldan niyat qilar edim.

 

-Siz filmlarda ham sur'atga tushar edingiz?

Muhammadali Iskandarov: Hozir ham filmlarda o'ynab turibman.

-Unda nega siz ham aktyorlik sohasidan jiddiy ketmaysiz?

Muhammadali Iskandarov: Chunki men rejissyorlikka juda qiziqaman. Bu kasb menga juda yoqadi.

Umid Iskandarov: Muhammadali yangi g'oyalar qilishni yaxshi ko'radi va ularni amalga oshirishni hohlaydi. Mana shu ishdan u zavq olib yashaydi. Shuning uchun ham ukam Muhammadali mana shu kasbni tanlagan.

 

-Muhammadali siz dastavval ijodingizni boshlovchilikdan boshlagansiz to'g'rimi? Mana shu haqida ham gapirib o'tsangiz.

Muhammadali Iskandarov: Aslida meni san'atga qadam qo'yishim bu avvalo ota kasb. NTT telekanilida yoshlar studyasida Kelajak ovozi ko'rsatuvi ochilgan va ushbu ko'rsatuvga kasting e'lon qilingan edi.  Ushbu tanlovga men ham borganman va tanlovdan o'tib, ikki yil mobaynida boshlovchilik qilganman. Mana shu davr mobaynida shou-biznes olamidan ko'plab tanishlar orttirganman. Ana shunda men aktyorlik, rejissyorlik kasblariga qiziqishni boshlaganman. So'ng oliy o'quv yurtiga o'qishga kirib, rejissyorlik ishlarini ham boshlab yubordim. Hozirda esa videokliplar suratga olyabman. Ya'ni o'zimni charxlash maqsadida. Sababi menda film sur'atga olish imkoniyati mana shu ikki yil ichida juda ko'p bo'ldi. Ammo, men bunga hali tayyor emasman deb o'yladim. Nasib qilsa mana shu yili film suratga olsam kerak deb o'ylayabman.

 

-Bosh rolni akangiz ijro etadilarmi?

Muhammadali Iskandarov: Bosh rolda menga yoqqan aktyorlar chiqadi.(Kuladi)

-Qaysi aktyorlar bilan ishlagan bo'lar edingiz?

Muhammadali Iskandarov: Aktyor sifatida akam Umid Iskandarov menga juda ham yoqadi. Shu bilan birgalikda Adiz Rajabov, Farrux Soipov, Ulug'bek Qodirov mana shu aktyorlar bilan ishlagan bo'lar edim.

 

-Film suratga olish arafasida ekansiz. Qaysi mavzularga yondashgan holda film suratga olishni reja qilgansiz?

Muhammadali Iskandarov: To'g'risini aytsam men ikki yildan beri bir ssenariy ustida ishlab kelyabman. Bu albatta Vatan haqida. Ssenariyning ichida sevgi mavzusi ham bor. Ammo, filmning asosiy g'oyasi albatta Vatan. Mana shunday film sur'atga olish niyatim bor.

 

-Aka-ukalar orasida ijodiy kelishmovchiliklar, tortishuvlar ham bo'lib turadimi?

Muhammadali Iskandarov: Bo'lib turadi. (Kuladi)

Umid Iskandarov: Yangi g'oyalar ustida ishlayotganimizda men o'zimni fikrimni aytaman, ukam esa o'zinikini aytadi. Ijodiy talashishlar bo'lib turadi. Hayotda ya'ni uyda ham nimadir sabab bo'lib urishib qolishimiz mumkin. Ammo, u qadar jangovor urishishlar bo'lmaydi. Shunchaki gap talashishlar bo'ladi holos.

 

-Bir-biringizdan arazlashib qolganingizda arazingiz qancha vaqtgacha davom etadi?

Muhammadali Iskandarov: Yo'q unaqasi bo'lmaydi.

Umid Iskandarov: Uzog'i 5 daqiqa. (Kuladi) Qanday urishib qolishimizdan qat'iy nazar 5 daqiqadan so'ng yana avvalgidek gaplashib ketamiz.

 

-Hozirda san'at olamida ko'chirilgan video klip, film, tarona va shunga o'xshagan gaplar quloqqa chalinadi. Bunga munosabatingiz?

Muhammadali Iskandarov: Bilasizmi, bizda aynan mana shu mavzu juda dolzarb bo'lib turibdi. Ijodda o'g'irlangan degan fikrga men qarshiman. O'g'irlangan deb bittama-bitta, hech qanday joyi ham qolmasdan ya'ni ijod qilmasdan  tayyor narsani ko'chirib olsa, mana bu o'g'irlangan deyiladi. Ammo, ijodkorga qaysidir klip yoki film yoqib qolgan bo'lsa va u o'zini talqinida sur'atga olib, bu hammaga yoqsa, xalq maqtasa bu uning yutug'i, xalqqa yetkazib berganligida. Baribir biron-narsani kimdir o'ylab topadi va uni kimdir boyitadi.

Umid Iskandarov: Xuddi velosipedni o'ylab topgan odamdek. Butun dunyoda velosiped ishlab chiqaradigan fabrikalar bor.

Muhammadali Iskandarov: Xuddi shunday yettita nota bor. Uni har xil chalib ko'rish mumkin. Shuning uchun o'g'irlangan deb gapirish noto'g'ri. Ammo, bugungi kunda men shunday harakat qilyabmanki ya'ni g'oyalarni o'zim o'ylab topishga harakat qilyabman. Bilasizmi, men eng yaxshi videoklip yoki klipmeykerlik degan nomga umuman davogarlik qilayotganim yo'q. Menga yoqmaydi ham. Meni rejissyor bo'lish, filmlar olish niyatim bor, klip olish emas. Videokliplar sur'atga olishim bu meni o'zimni charxlab olish, klipda uch daqiqalik vaqtda qandaydir bir voqea ko'rsatib berish rejissyorlikni boshlayotgan odamga juda katta yaxshi tarafga foydasi tegadi. G'oyalarni o'g'irlash esa men uchun emas. Chunki men unda hech narsani o'rgana olmayman. Sababi, ertaga film olganimda o'zimni dunyoqarashimni xalqqa yetkazib bera olmayman deb o'ylayman. Shuning uchun doim kliplarimda o'zimdan kelib chiqib g'oya qilishga harakat qilaman. Lekin baribir qandaydir elementlar menda ham olinishi mumkin. Unga boshqacha bir bezak berib ko'rsatishim mumkin. Ammo, hali unday holat bo'lganicha yoq'.

Umid Iskandarov: Oddiy qilib aytganda "Zolushka" ertagini butun dunyo har xil nomlar bilan xattoki zamonaviy talqinda ham suratga olib, boshqacha nomalar bilan yaratib chiqarishadi. Filmda asosiy g'oyasi esa bu "Zolushka" ertagining g'oyasi yoki Shekspirning asarlari. Butun dunyoda bunday filmlar bor. Bu o'girlikka kirmaydi. Shunchaki bizni mentalitetda qanday ko'rinar ekan deb filmni suratga olib ko'rishadi. Ozginagina syujeti o'xshab qolgan bo'lsa, o'g'irlabdi deyishadi. O'g'irlabdi deganda men Muhammadalining fikriga qo'shilaman ya'ni birma-bir ko'chirib olgan, hattoki men guvohi bo'lganlarim ham bor. Ya'ni dialoglarigacha olib, kadrlari va aktyorlarni ham qidirib o'sha film qahramonlariga o'xshashliligini topib, bir xil qilib sur'atga olgan. Bu o'zimizda ishlangan film. Rejissyorini kim ekanligini aytib uni hafa qilib o'tirmayman. Ana shu filmni ko'rib, eshitib o'tirsam shunchaki o'zbek tiliga tarjima qilib qo'yibdi xolos. Bu filmga ssenariy yozildi deyish ham uyat. Mana bu o'g'rilik deyiladi. Taronalarda ham xuddi shunday. Kimdur studyalarda ovoz yozib, ijod qilib qo'shiq kuylab, butun dunyoga mashxur bo'ladida, kimdir esa uni tayyorgina olib ko'chirib qo'yadi. Bu ham o'g'rilik. Ammo, studiyaga borib, menga mana shu tarona yoqdi, shunga o'xshash nimadir yaratib bering deb, qaysidir elementlarini olsa bu ilhomlanish deyiladi.

 

-Aktyorlar orasida do'stlik bormi sizningcha?

Umid Iskandarov: Xursan bo'lib aytaman bizning aktyorlarimiz oqibatli. Ulug'bek Qodirov, Adiz Rajabov, Farrux Soipov va men doim yeg'ilib turamiz.

-Hayotda do'stsizlar. Ammo, ijodda baribir raqobat bo'lsa kerak?

Umid Iskandarov: Yo'q men ularni o'zimga raqobatchi deb bilmayman.

Muhammadali Iskandarov: Men bir narsani aytishim mumkin. Ya'ni bu O'zbek kinomatagrafiyasi rivojlanayotganidan ham darak beradi. Rejissyorlar filmining mavzusiga mos tushadigan aktyorlarni chaqirishyabdi. Misol uchun avvallari aktyorlar sanoqli bo'lgan. U vaqtlarda o'sha film ularga tushadimi yo'qmi filmga taklif qilaverishar edi. Hozirgi kunda esa Adiz Rajabov o'ynagan filmlari o'ziga mos tushyabdi. Akamni o'ynagan rollari ham o'ziga mos. Demoqchimanki har bir aktyorni o'ziga mos yo'nalishi va talabi bor. Hozirda rollar aktyorga tushsa tushmasada o'ynayveradigan sharoit emas. Aktyorlarning soni ham yetarli darajada ekanligi quvonarli holat.  

Umid Iskandarov: Aktyorlarimiz bir-biriga o'xshab ishlamaydi hech qachon. Har birini o'z yo'nalishi bor. Aktyorni qachon baholash mumkin. Ya'ni aktyorni o'ynagan rolini boshqa odam bilan almashtirib bo'lmasa, bu uning yutug'i hisoblanadi. Misol uchun "Telba" filmidagi Ulug'bek Qodirovning o'ynagan qahramoni obraziga boshqa bir aktyorni qo'yib bo'lmaydi. Misol shu rolga meni yoki Adizni, Farruxni qo'yib qo'ysangiz yarashmay qolamiz. Ulug'bek esa filmda o'zining qolipiga tushgan. Film olayotgan rejissyorlar hozirda ssenariyni yozayotgan vaqtida kimnidir qahramon o'rniga qo'yib, ana shu aktyorni ko'ribgina ssenariy yozishmoqda. Raqobatga keladigan bo'lsak, raqobat yo'q emas, bor. Shunday rollar borki, universal rollar. Yaxshi, mahoratli aktyorlarimizdan har biri bu rolga tushadi. Ammo, hozirda rejissyorlar aktyorning yo'nalishiga qarab filmga taklif qilishyabdi. Aktyorlar oqibatli deb bemalol ayta olaman. Ko'p ko'rishib, suhbatlashib turamiz. Ammo, bilasizmi xonandalarda umuman teskarisi. (Kuladi) Ular kulishib ko'rishib orqasidan gapirishadi. Bizda esa yoshi ulug', tajribasi katta bo'lgan aktyorlarimiz ham bizni itarmay, biz bilan yaxshi munosabatda bo'lib, maslahatlar ham berishadi. Biz yosh aktyorlar kattalarni bir-biriga bo'lgan oqibatini ko'rib, xuddi ular kabi bo'lishga intilamiz.

-Rejissyorlar sizga rol taklif qilganida portnyor aktrisalarni siz o'zingiz tanlaysizmi yoki rejissyor tanlagan aktrisa bilan suratga tushaverasizmi?

Umid Iskandarov: Bilasizmi, hohlardimki portnyorim professional aktrisa bo'lishini. U bo'lsin bu bo'lsin deb tanlamaymiz. Ba'zi bir rejissyorlarimiz aytishadiki, kimni ko'ryabsan portnyoringni rolida deb so'rashadi. Biz bilan maslahatlashishadi. Albatta aktrisalarni tanlash bu birinchi navbatda rejissyorga bog'liq. Lekin men professional aktrisa bo'lishini hohlardim. Men hurmat qiladigan aktrisalarimiz bor. Aynan ular bilan ishlagim keladi. Ammo, hozirda aktrisa bo'lmagan qizlarimiz ham filmda suratga tushishyabdi. Unday qizlarni rollari ham og'ir bo'lmaydi. Hamma og'irlik qahramon yigit obrazida. Shuning uchun ham roli osonroq bo'lgan obrazlarga oddiy qizlarni ham chaqirishyabdi. Baribir rol u qadar qiyin bo'lmasada, ko'z bilan ushbu rolni ifodalab berishi kerak.

Muhammadali Iskandarov: Yangi chehralar kashf qilinishi kerak. Bu taraflama men xursandman. Ammo, baribir aktyor, aktrisalarni tanlov orqali filmlarga taklif qilishsa maqsadga muvoffiq  bo'lar edi.

Bu narsa yo'qolishiga esa qarshiman.

Umid Iskandarov: Kasting degan narsalar yo'qolib ketyabdi?

 

-U holda bunday chala aktrisalar qanday qilib filmlarda bosh rollarni o'ynashyabdi?

Umid Iskandarov: Endi men bilmayman qanday qilib chiqishyabdi. Tanish-bilishchilikmi bu bilmadik. Tashqi ko'rinishi butunlay filmga mos tushishi mumkin. Ammo, ssenariydagi qaysidir joyini yaxshi ijro qilib beradida, qaysidir joyini ijro qila olmaydi. Shunda men sezib qolaman. Siz o'qimagansiz shundaymi  deb so'rab ko'raman. Lekin o'qigan o'qimagan degan gapga keladigan bo'lsak, diplomi yo'q buyuk-buyuk aktyorlarimiz ham bor. Misol uchun ustoz san'atkorlarimizdan G'ani A'zamov va Shukur Burhonovlarni diplomlari bo'lmagan. Ammo, ular o'zlarini ustida juda ko'p mehnat qilgan insonlardir. Bunday holatlar hozir ham bo'lishi mumkin. Yana bir narsani misol qilib oladigan bo'lsak, avvallari rejissyorlar tipaj qidirganlar. Ko'chada, bekatda ko'rib qolgan odamlarini olib kelib, uni ustida ko'p ishlashgan. Hozirda esa rejissyorlarimiz dangasa bo'lib qolishgan. Aktyorlarni syomka maydoniga qo'yib yuborishadida, o'zlari monitorga qarab o'tirishadi. O'ziga ham farqi yo'q ularni. Faqatgina ekrandagi kadr chiroyli bo'lsa bo'ldi. Ammo, bu hamma rejissyorlarga tegishli gap emas. Shunday rejissyorlarimiz borki, ular tushuntirib, tushunmaganingizni o'rgatishga harakat qiladi. Bu taraflari odamni quvontiradi. To'g'ri o'qimagan aktyor yoki aktrisa bo'lsa ham, unga tushuntirsangiz u tushunadi. Miyyasi butun bo'lsa bo'ldi.

 

-Aytaylik debyutant rejissyor olayotgan filmidagi bosh rolga sizni taklif qilyabdi. Rol sizga ma'qul keldi. Ammo, bu rejissyorni ishlagan filmi muvaffaqqiyatli chiqadimi yoki yo'qmi bunga shubxa bor. Shu holatda qanday javob bergan bo'lar edingiz?

Albatta ishlar edim. Ayniqsa ssenariysini o'zi yozgan bo'lsa va menga yoqqan bo'lsa albatta ishlayman. Chunki hammamiz ham qachondir birinchi marta boshlaganmiz. Bunday insonlarga imkoniyat berish kerak. Agar bu ssenariyni yozayotganida sizni ko'rib yozganman, siz o'ynab berishingizni hohlayman deb niyat qilgan bo'lsa, albatta ishlagan bo'lar edim. To'g'ri filmlar ham xuddi lotoreyaga o'xshaydi. Meni o'zimni ham hamma o'ynagan filmlarim zo'r deb maqtana olmayman. Ammo, yaratganga shukur xalqdan faqatgina yaxshi gaplar eshitib kelyabman.

 

-Tanqidlar ham eshitib turasizmi?

To'g'risini aytsam hali deyarli bir aniq bo'lgan tanqidlarni eshitmadim. Mana bu rolingiz ozgina yarashmabdi kabi yengil tanqidlar bor. O'zim ham bilaman ana o'sha rolim ozgina yarashmaganligini. Men bitta qolipga tushib qolishdan qo'rqaman. Meni faqatgina intelegent, boyvachcha, tadbirkor yigit obrazida tasavvur qilishadi ko'proq. Ana shu narsani sindiraman deb "Super qaynona" filmida komediya yo'nalishida ishlaganman.

-Siz uchun ushbu film qanday samara berdi?

 Meni o'zimga yoqdi.

 

-Aynan shu filmdagi qahramoningizga o'zingiz ovoz bergansiz to'g'rimi?

Xa. Dublyajda ham o'zim ovoz berganman.

 

-Hozirda ovoz berish jarayonlarini ham o'rganyabsiz shundaymi?

Hozirda oxirgi beshta filmimdan to'rttasiga o'zim ovoz berdim.

 

-Qiyin bo'lmayabdimi?

Qiyin bo'lyabdi. Misol uchun professional aktyor, aktrisalar uch-to'rt soatda ovoz berib, ishlarini bitirib ketishsa, men ertalabdan kechgacha, gohida qiyin bo'lib qolsa, ikki kunga ham boradi. Rejissyorlarimiz o'zingizni ovozingiz shirali, o'z holatingizni o'zingiz yaxshi tushunasiz deb ovoz berish taklifini bildirishgan. Shuning uchun qiyin bo'lsa ham harakat qilyabman. Ukam Muhammadali yaqindagina "Layloyimsan" filmida ishlaganda uning obraziga ovoz berib ko'rdim.

 

-El ardog'ida bo'lgan insonlar haqidagi gap-so'zlar juda tez tarqaladi. Sizlar ham o'zingiz haqingizda biron-bir nohush mish-mishlarni eshitganmisiz?

Men o'zim haqimda ichkilikka berilib ketibdi degan juda noto'g'ri bo'lgan mish-mishni eshitib qoldim. Shou-biznes saytlaridan birida bu mish-mishni eshitgan edim. Ammo, men ularga bu yolg'on ekanligini aytib, shu saytda faoliyat yurituvchi yigit bilan ham gaplashdim. U esa aka biz buni o'zimizdan to'qib yozmadik, bir odam bizga shunday ma'lumot berdi. Uni kimligini esa aytmay qo'ya qolaman dedi. Bu holatni ikkinchi takrorlamayman. Chunki bizni aldab yuboribdi dedi. O'sha vaqtda biz to'rt-besh kishi bilan bir banketda bo'lganmiz. Yangi chiqqan filmning banketiga meni ham mehmon bo'ling deb chaqirishgan edi. O'zi umuman ichmayman deb aldamaymanku. Ammo, erkak kishida ikki-uch oylarda bir bo'ladi. Ammo, aynan o'sha kuni men bu ishni qilmaganman. Men bilan birgalikda san'at olamidagi ko'pgina do'stlarimiz ham bor edi. Bu mish-mishni o'qiganimizda do'stlarim biz sen bilan edikku, bunday bo'lgani yo'qku deb borib ham aytib kelishgan ekan va bu yolg'on ekanligini bilganlaridan so'ng, u saytdagilar boshqa bunday holat takrorlanmasligini aytishdi. Qandaydir bir ichi qora odam qo'ng'iroq qilib, Umid Iskandarov mast bo'lib qolib, bir narsalar qilyabdi deb noto'g'ri ma'lumot bergan. Men o'zim uchun bildimki, ichi qora insonlar bor ekan. Yana ortimdan gapirganlar ham bo'ldi. Bir rejissyorga borib, meni rossa yomonlagan. Oxirida esa uning maqsadi aniq bo'lgan. Ya'ni mana shu rolni menga berganingizda men qoyilmaqom qilib o'ynab berar edim deb aytgan. Mana maqsadi aslida shu ekanligini rejisyor payqab, shunday inson ham bor ekanligini menga ma'lum qildi. Men uni kimligini ham bilaman. Ammo, yoniga borib, nimaga unday deding deb gapirganim ham yo'q. Befoyda ekanligini ham bilaman. Unday ichi qora insonlar o'zini-o'zi jarlikka itaradi. San'at olamidami yoki boshqa sohada bo'lmasin, qanchalik ko'zga ko'rinsangiz, shunchalik dushmanlar ham o'z-o'zidan ko'payib boraverar ekan.

 

-San'atdan bo'sh bo'lgan vaqtingiz bo'lsa, nimalar bilan band bo'lasizlar?

Umid Iskandarov: Hozirda bo'sh vaqt biz uchun muammo. Avvallari ukam Muhammadali bilan birgalikda har kuni uch-to'rt soat bo'lsa ham suhbatlashar edik. Uyda oshxonada o'tirib, qahva ichib, bir g'oya ustida bir-birimiz bilan fikr almashar edik. Oxirgi vaqtlarda esa o'n-o'n besh kunlab bir- birimizni ko'rmayabmiz. Men o'z ishlarim bilan, Muhammadali o'zini ishlari bilan bo'lib, vaqtimiz kam bo'lyabdi. Ammo, shunday bo'lsa ham qo'ng'iroqlashib, ko'rishib turishga harakat qilyabmiz. Sog'inib ketyabman hozirgi vaqtda ukamni. (Kuladi)

 

-Oshxona ishlarida qandaysiz?

Umid Iskandarov: Oshxona ishlarida qo'limiz gul. Ko'p ovqat qilmasam ham, ovqat qilishni juda ham yaxshi ko'raman. Taomlar borasida fantaziyalar qilsam dam olaman.

Muhammadali Iskandarov: Akamni taom tayyorlashi haqida bastakor Jasur Badalboyevdan, Shod guruhi yigitlaridan va qolaversa ko'p-ko'p ijodkorlardan so'rasangiz bari bilishadi. Akamni qo'llari haqiqatdan gul.

Umid Iskandarov: Taomni mehr bilan tayyorlayman. Oilamdagilar ham taomlarimni yaxshi ko'rishadi. Vaqtim bo'lganida oilamdagilarga taom tayyorlab turaman.

 

-Muhammadali siz ham akangizdek taomlar tayyorlash borasida ustamisiz?

Muhammadali Iskandarov: Yo'q men taom tayyorlashdan ozgina yiroqdaman.

 

-Fe'l-atvor jihatidan bir-biringizga o'xshash taraflaringiz ham bormi?

Umid Iskandarov: Fe'l-atvorimiz o'xshaydi. Faqatgina o'z maqsadlarimiz sari yo'l tanlab ketishimiz biroz har xilroq. Didimiz esa bir xil.

Muhammadali Iskandarov: Fikrlashlarimiz ham bir xil.

Umid Iskandarov: Baribir bir-birimizdan farq qiladigan jihatlarimiz ham bor. Misol uchun Muhammadali og'ir-bosiqroq, men esa biroz harakatchanroqman desam ham bo'ladi. Muhammadali bir narsani yetti o'lchab bir kesadi, men esa o'ylamay ham qilib qo'yishim mumkin va Muhammadali meni ko'p urishib beradi. (Kuladi) Xatolarimni to'g'irlab turadi.

 

-Muhammadali akangizni qaysi jihatlarini ko'proq yaxshi ko'rasiz?

Muhammadali Iskandarov: Aslida akamni o'zini juda ham yaxshi ko'raman. To'g'risini aytsam bizdek aka-ukalar bordir. Ammo, men hali uchratmaganman bunday o'ta yaqin aka-ukalarni. Birinchidan aka deb gapirishim kam aslida. Intervyularda aka deb gapiraman. Aslida esa ham akam va eng yaqin do'stim. Oramizda hech qanday sir yo'q. Ba'zi bir ukalar akasidan qo'rqib, biron-narsalarni berkitib gapirmaydi. Bizda esa akaga nisbatan juda kuchli xurmat bor. Ammo, har qanday mavzuda bemalol ochiq-oydin suhbatlasha olamiz.

Umid Iskandarov: Ko'pchilik ukalar ham akasini urishib bera olmaydi. Muhammadali esa meni urishib beradi.

Muhammadali Iskandarov: Hayotimizdagi eng quvonarli kunlarni ham, eng qiyin kunlarni ham hammasini birga o'tkazganmiz. Biz aslida uchta aka-ukalarmiz. Ukamiz ham bor. U ham xuddi bizdek. Ismi Anvar Iskandarov.

 

-Ukangiz Anvar ham ekranlarda ko'ringanmi?

Muhammadali Iskandarov: Anvar kichkinaligida san'atga juda qiziqadigan bola edi. Oramizda eng san'atga ko'p qiziqadigan, eng qobilyatli va bo'lsa mana shunisi san'atkor bo'lsa kerak degan fikrga kelishar edi. Endilikda yana o'sha qiziqishlari uyg'ondi. Hozirda menga yordam berib yuribdi. Ijodim jarayonida menga katta yordami tegyabdi. Ammo, avvallari umuman qiziqishi yo'q edi.

Umid Iskandarov: Ukamiz Anvar jiddiy sohaga juda mos inson. Hayoti tartibli va qiladigan ishlarini reja asosida qiladigan inson. Erta tongda turib, soat sakkizda ishga ketib, kechki vaqt olti, yettida uyga keladigan tartibli bola. Haligacha fe'l-atvori shunday. Aytgan joyiga vaqtida boradigan, umuman har bir ishni vaqtida bajaradigan yigit. Bizda esa ya'ni shou-biznesda esa aytilgan joydan kechikish deganlaridek bunday holat juda ko'p bo'ladi. Bu narsa o'zingizga ma'lum. Reja asosida ish qilish san'atkorlarga qiyinroq. Xattoki ovqatlanishingizni ham tayini bo'lmay qoladi ba'zi vaqtlarda.

Muhammadali Iskandarov: Ukamiz Anvar bizni ijodimizga ham juda ko'p kuyinib, maslahatlar beradi. Eng yaxshi tanqidchimiz ham u. Men sizlarga oddiy xalqni ko'zi bilan qarab aytyabman deydi. Mana bu yerda mana bu joyi yaxshi emas yoki yaxshi deb o'z fikrlarini bildiradi. Yangi bir ssenariy olib kelib bersam, uni o'qib chiqib, o'tirib to'g'irlab ham chiqdi. Yozuvi ham juda chiroyli. Menimcha ichimizda eng savodlisi Anvar bo'lsa kerak. Imlo xatolariga ahamiyat bergan holda yozadi. Nuqta, vergullarigacha to'g'ri yozadi. Yuqorida aytganimdek haligi men bergan ssenariyni shunday to'g'irlab chiqibdiki, yaxshigina ssenarist bo'lsa bo'ladi. O'zi yaxshigina ssenariy ham yozgan. O'zini sinash uchun yozgan edi. Menga esa juda yoqdi. Anvar ukamizning yana bir jihati borki, bir narsani oxiriga yetkazmagunicha qo'ymaydi va u shunday insonki, istagan kasbini mutaxxasisi bo'la oladi. Har tomonlama inson. Bolaligida ham dadamizga dada menga doira olib bering deb aytgan edi. Nima qilasan doirani desalar, doirachi bo'laman derdida, doira mashg'ulotiga borib, doira chalishni mukammal o'rganib oldi. So'ng ot hayvoniga qiziqib ketdi. Undagi sir-asrorlarni bilib bo'lganidan so'ng boshqa narsaga qiziqishni boshlaydi.

 

-Muhamnmadali akangizni sizga yoqmaydigan taraflari ham bormi?

Umid Iskandarov: Bor. mug'ombirligimni yomon ko'radi. (Kuladi) Biron-narsaga hop deya turib, o'zimni ishimni qilishimni yomon ko'radi. Urib tashlagilari kelib ketadi bilaman. (Kuladi)

 

-Qo'l ko'tarib mushtlashishlar ham bo'ladimi hech?

Umid Iskandarov: Bo'lgan. Yoshligimizda bo'lgan unday vaqtlar. Hozir esa uyat bo'ladi kab-katta bolalar shunday janjallashishsa.

Muhammadali Iskandarov: Biz hozir bir-birimizni shunday o'rganib olganmizki, u darajagacha yetib kelmaymiz.

-Sizdachi ukangizni qaysi jihatlarini aytib o'ta olasiz?

Umid Iskandarov: Ukamni hamma jihatlari yoqadi. Meni havasim keladigan jihatlari ham bor. Misol uchun og'ir-bosiqligi juda ham yoqadi.

Muhammadali Iskandarov: Bilaman akamga meni qaysi tarafim yoqmasligini. (Kuladi) Bir narsani uzoq o'ylashim akamni xunob qiladi.

Umid Iskandarov: Muhammadali bir narsani shunaqanggi tushuntirib beradiki, agar mana bu ishni qilmaganingizda mana bunday bo'lmas edi, anavi mana bunaqa qilmaganda bunisi bunday bo'lib qolmasdi deb, har bir narsani uzoqdan olib kelib tushuntiradi. (Kuladi) Va yana meni havasim keladigan tarafi odamlarni bittada biladi. Menda esa shu narsa yo'qroq. Ukam esa bir insonni bitta ko'rishidayoq qandayligini bilib beradi va menga kamroq yuring mana bu odam bilan deb aytadi. Nima uchun desam, hammasini aytib beradi. Men esa bitta ko'rishda unday dema derdim va bilasizmi, vaqt o'tib o'sha inson haqiqatdan ham shunday bo'lib chiqadi. Yana bir odati borki, hayotingizda o'tib ketgan narsalarni, sizga foydasi ham, zarari ham tegmaydigan narsalarni ushlab olib sinchliklab, o'sha narsaga oydinlik kiritib beradi.

Muhammadali Iskandarov: (Kuladi) To'g'risini aytsam mana shu odatim o'zimga ham yoqmaydi. Akamni esa menga ko'p narsani o'ziga olmasligi yoqadi. Mana shu narsani men ham o'rganishga harakat qilyabman.

 

-Maktab davrida qanday baholarga o'qigansizlar?

Muhammadali Iskandarov: Juda sho'x bo'lganmiz.

Umid Iskandarov: Muhammadali a'lochi bo'lgan.

 

-Bejizga bu savolni bermadim. Hozir sizlarga mantiqiy savollar bermoqchiman. Shunchaki siz ham o'zingizni sinab ko'rishingiz uchun. Bu savollarni balki siz eshitgandirsiz. Ko'ramiz natijani savol-jvobdan so'ng chiqaramiz. Mantiqiy savollarni yoqtirasizlarmi?

Umid Iskandarov: Mantiqiy savollarni Muhammadali yoqtiradi.

Muhammadali Iskandarov: (Kualdi) Yo'q menga mantiqiy savollar unachalik yoqmaydi. Meni "botanik" bola qilib ko'rsatyabsiz. (Kuladi)

Umid Iskandarov: Mantiqiy narsalarni yaxshi ko'rasanku.

 

-Demak boshlaymiz. Eng birinchi bo'lib uning yorug'ligi ko'rinadi, so'ng ovozi eshitiladi keyin esa mayin shamolni xis qilasiz. Bu nima?

Muhammadali Iskandarov: (Kuladi) Men bunday savollarni yomon ko'raman lekin.

 

-Bu savol mantiqiy savol. Juda ham oddiy va oson savol.

Umid Iskandarov: Men bu savolingizni eshitib bir voqeani ko'rgandek bo'ldim. Birinchi yorug'ligini ko'radigan bo'lsak, bu quyosh. Uning yorug'ligi ko'zga tushadi. Bilmadim men shunday tasavvur qildim. Endi savol mantiqiy bo'lganligi uchun javob bu emas.

 

-Muhammadali sizda ham javob bormi?

Muhammadal Iskandarov: Bilmadim to'g'risi. Nima u? (Kuladi)

Umid Iskandarov: Javobini bilgim kelyabdi. O'zingiz ayta qoling javobini.

 

-Javob: Metro.

Umid Iskandarov: Vay (Kuladi) To'g'ri lekin.

Muhammadali Iskandarov: (Kuladi) Xa haqiqatdan ham to'g'ri.

 

-Ikkinchi savolimiz quyudagicha. Yoshlarbop va qiziqarli savol. Bir yigit avtobusda bir qizni ko'rib yoqtirib qolibdi va qizni yoniga borib, yaxshi qiz sevganingiz bormi deb so'rabdi. Qiz g'alati javob beribdi ya'ni u "Yigirma, O'ttiz, Qirq" (20, 30, 40) deb javob berib avtobusdan tushib ketibdi. Sizningcha qiz nima demoqchi bo'lgan?

Muhamadali Iskandarov: G'alati qiz ekanu. (kuladi) Nechchi yoshli qiz ekan?

 

-Yoshini ahamiyati yo'q.

Muhammadali Iskandarov: Yigirma yoshimda bo'lgan, o'ttiz yoshimda bo'lgan va sen qirq yoshimda uchragan yigitsan demoqchi bo'lgandir. Juda ajoyib savol ekan.

 

-Taxminan jaobingizni aytavering. Nima demoqchi bo'lgan deb o'ylaysiz?

Umid Iskandarov: Taxminan ham men tushunmadim.(Kuladi) Men tassavvur qilyabman bir bola haqiqatdan ham ko'chada bir qizni ko'rib, sevib qolib, to'g'ri ma'noda turmushga chiqmaganmizsiz yoki yigitingiz yo'qmi deb savol bersayu, qiz yigirma, o'ttiz, qirq deb javob bersa (kuladi) bilmadim men u qizni o'sha zahotiyoq sevmay qo'ygan bo'lar edim. U jinni ekan shekili der edim. (Kuladi)

 

-Bu savol mantiqiy shuning uchun ham biroz qiziqarli va juda onson. Javobni yana o'zim aytishga majburman. Javob: Yo'q edi. Sonlarni bosh harfiga ahamiyat qilsangiz, qiz yo'q demoqchi bo'lgan va u fikrini ochiq-oydin ayta olmay, mana shu javobni aytgan.

Umid Iskandarov: (Kuladi) Juda qiyin savol ekan. Bu topishmoq ekanda.

Muhammadali Iskandarov: Bu savolni javobi bilan eslab qolish kerak ekan. Qiziqarli savol ekan.

 

-Uchinchi savolimiz quyidagicha. O'zini o'zi tugatadi. Bu nima?

Muhammadali Iskandarov: Telefon.

Umid iskandarov: Men hozir savolni ikki xil tushunyabman ya'ni yemirilib yo'q bo'lib ketadigan narsalar bor. Menimcha texnikalar bo'lsa kerak. Quvvat orqali ishlaydigan barcha texnika jihozlari.

 

-Demak javobingiz texnika shundaymi? Afsuski noto'gri. Javob: Sham edi.

Umid iskandarov: Qoyil. Savollarni juda qiyini va juda qiziqarlisini topibsiz.

 

-Qiziqarli suhbatingiz uchun sizlarga juda katta rahmat. Suhbatimiz ko'tarinki kayfiyat ila o'tdi. Endi esa suhbatimiz so'nggida muxlislaringizga chiroyli tilaklaringiz bo'lsa marhamat.

Muhammadali Iskandarov: Muxlislarga meni tilagim, sa'natkorlarga muxlis bo'lishdan oldin, haqiqatdan ham yaxshi ijodkorlarga muxlis bo'lishsin. Bir ikki yillik san'atkorlarga emas, bir umrga esda qoladigan ijodkorlarga muxlis bo'lish kerak. Mana shunday ijodkorlar va ularning muxlislari ko'p bo'lishini chin dildan tilab qolaman.

Umid Iskandarov: Fikringga qo'shilgan holatda barchaga sog'lik-salomatlik, tinchlik-hotirjamlik tilayman. Muxlislar bizni qachon ko'rishadi, qachonki xonadoni tinch bo'lsa, sog'-salomat bo'lishsa, qorni to'q va sharoti yetarli bo'lsagina muxlislar filmlar tamosha qilgani, konsertlarga dam olgani borishadi. Shuning uchun yuqorida so'zlarim barchangizda bor bo'lishini chin dildan tilab qolaman.