Bir necha kun davom etgan puxta saralash ishlari natijasida bir necha ming da'vogar orasidan 11 nafar eng yorqin va shubhasiz, iste'dodli ishtirokchi tanlab olindi. Endi butun loyiha davomida millionlab teletomoshabinlar ana shu yosh iste'dodlarning ijodiy kamolini Forum TV kanali va bizning saytimiz orqali kuzatib borishlari mumkin. Har hafta o'tkaziladigan va faqat jonli ijroni nazarda tutadigan Zo'r-Zo'r Star-konsertlar o'zbek shou-biznesining rivojiga o'z hissasini qo'shishi tayin. Axir har bir konsert o'ziga xos yorqin va qiziqarli shouga aylanadi-da.

O'tkazilgan saralash davomida ishtirokchilarni bir nechta estradamiz yulduzlari kuzatib, ishlariga baho berib borishdi. Jumladan estradamiz yorqin yulduzi Shahzoda ham ushbu loyiha haqida quyidagilarni bildirib o'tdi:

Shahzoda: - Meni kastingda qatnashish va yosh iste’dodlarni aniqlashga yordamlashish uchun taklif qilishganida juda xursand bo‘ldim, bu men uchun katta sharaf.
Bu yerga, Zo‘r-Zo‘r Star-akademiyaga yaqinlashar ekanman, uni qanday zo‘r, yorqin bezashganini ko‘rib hayratda qoldim. Juda ajoyib! Saralash komissiyasiga qo‘shilganimdan keyin esa, meni qo‘rquv chulg‘ab oldi – men sahnani, mikrofonni, eng asosiysi esa, katta hayajonda turgan ishtirokchilarning ko‘zlarini ko‘rdim.
Hozirgina artistlar bilan, sahnada necha yil – 15-20 yilmi – ijod qilsang ham baribir hayajon bosishi haqida gaplashayotgandik. Mening nazarimda ham bu to'g'ri. Chunki artistning yelkasida tomoshabin oldidagi, uni tomosha qilayotgan va tinglayotgan insonlar oldidagi ulkan mas’uliyat turadi.
Bu yerda bo‘lish men uchun qiziqarli. Bu yerga tez-tez kelgan bo'lardim, chunki biz artistlar ham doimiy tarzda tajriba orttirib turishimiz kerak. Ishtirokchilarni tinglash, ularga maslahat berish juda qiziqarli. Biz ularga o‘zimiz bir paytlar yo'l qo'ygan xatolar haqida gapiramiz, ular esa o‘sha xatoni boshqa takrorlashmaydi. Nima bo‘lgan taqdirda ham, ular uchun bu qimmatli tajriba. "Beeline" va "Fund Forum" aynan shu yoshdagi iste'dodlarni kashf qiladigan tanlovni tashkil etgani juda ajoyib, chunki bizga, artistlarga, juda ko‘plab yoshlar murojaat qilib, yordam so‘raydi. Ularning hammasiga yordam bera olmaymiz, buning uchun vaqt va mablag‘ kerak bo‘ladi. Shu bois yosh va iste’dodlilar to‘ppa-to‘g‘ri Zo‘r-Zo‘r Star loyihasiga kelishlari kerak! Bu haqiqatan ham, ular uchun juda katta ko‘mak, buning ustiga bizning yoshlar aql bovar qilmas darajada ijodkor.
Kasting ishtirokchilarining energetikasini juda kuchli sezyapmiz, chunki ular qattiq hayajonlanayotgani ko‘rinib turibdi. Keyingi bosqichga kim o‘tish-o‘tmasligini hal qilish – bu juda mas’uliyatli va murakkab ish. Buning ustiga ishtirokchiga nimadir ozgina yetmay qoladigan vaziyatlar ham bo‘ladi, hammani esa o‘tkazolmaymiz, ana shunday paytda xafa bo‘lib ketasan. Bilasizmi, bir ishtirokchi bor edi, ko‘zlari doim katta umid bilan qarab turardi, u juda harakat qildi, qo‘lidan kelganicha urindi, ammo... Biz unga kelajakda ham shug‘ullanishni, o‘z ustida ishlashini maslahat berdik. Xudo xohlasa, kelasi yili yaxshiroq tayyorlanib keladi, ana shunda vaziyat mutlaqo boshqacha bo‘ladi. Aytganday, bunaqalar juda ko‘p, agar kuylashni tashlab qo‘ymasdan, vokal bilan shug‘ullanishda davom etishsa, komissiyaning maslahatlariga quloq tutishsa, albatta, bu sohada muvaffaqiyatlarga erishishadi.
Shuningdek, menda o‘chmas taassurot qoldirgan ishtirokchilar ham talaygina bo‘ldi. Ularga muxlislik qilmoqchiman, ular loyihaga tushadi, deb umid qilaman.

30-mart sanasida aynan ushbu 11 nafar ishtirokchi ijrosida jonli ijrodagi ilk konsert bo'lib o'tadi. Aynan shu kuni eng omadlilar kim ekanligi barchaga oshkor bo'ladi va ular o'z ijodlari bilan sizlarni lol qoldirishga urinishadi. Hozirda ijodkorlarning imijlari ustida stilistlar ish olib borishmoqda.

Eslatib o'tamiz, "Zo'r-zo'r Star" loyihasi Beeline savdo belgisi hamda Fond Forum bilan hamkorlikda tashkil etilgan bo'lib, uning maqsadi iste'dodli yoshlarga ko'maklashish hamda ularni ijod olamida porlashiga katta hissa qo'shishdir. Bizni kuzatib borsangiz, endilikda har bir konsert dasturidan doimiy tarzda eng sara ma'lumotlarni yetkazishga harakat qilamiz.