Saytimiz orqali qiziqarli "intervyu" sahifasida qaysi ijodkor bilan birgalikda suhbat uyushtirishimizni istaysiz?" deya savol e'lon qilgan edik. Buni qarangki, juda ko'plab ovoz to'plashga muyassar bo'lgan Ummon guruhini biz navbatdagi intervyuga taklif etdik. Taklifimizga binoan ofisimizga tashrif buyurgan Ummonchilar bilan suxbatimiz boshidan qiziqarli boshlandi. Marhamat, quyida ushbu suxbatni sizga havola etamiz.

-Avvalambor tashrifingiz uchun tashakkur. Ilk beradigan savolim sizga juda ko'p marotaba berilgan. Ko'p intervyularda buni takidlab o'tgansiz. Ammo bizning saytimizda bu ilk marotaba. Avvalambor san'atga kirib kelishingiz haqida gapirib o'tsangiz?

-Jasur: Biz avvalo san'atga 2007-yilda kirib kelganmiz. Faqat guruh sifatida emas balki alohida-alohida ijod qilganmiz. 2008-yilda esa birga yig'ilib guruh bo'lib emas, trio tarzida "Sevaveraman" nomli taronamizni chiqarganmiz. Shu taronamiz ommalashib ketganidan so'ng, asta-sekin xalqning e'tiboriga to'sha boshlaganimizdan keyin yaqinlar bilan maslahatlashgan holda guruh tuzishga qaror qilganmiz hamda guruh nomini dastlab "Jazo" deb nomlaganmiz. Shundan so'ng guruhimiz nomiga ko'plab tanqidlar bo'lganligi sababli, ko'pchilikning maslahati bilan uzoq o'ylab guruhimiz nomini "Ummon" deb nomladik va hozirgi kunda ham aynan ushbu nom ostida ijod qilib kelmoqdamiz?

-Nima uchun guruh nomi dastavval "Jazo" deb nomlangan?

-Jasur: To'g'risini aytadigan bo'lsak, "Jazo" nomi mening va Zohidning ismimiz bosh harflaridan olingan so'z hisoblanadi.

-Bolaligingizda san'atkor bo'laman deb o'ylaganmisiz?

-Jasur: Shaxsan men bolaligimdan san'atga qiziqqanman. Qo'shiq kuylashni orzu qilganman. Xudoga ming bora shukur, mana Allox bizni shu kunlarga yetkazdi.

-Shohruh: Men ham aynan shu kasbni orzu qilganman.

-Zohid:  Menda ham bu qiziqishlarim bolaligimdan paydo bo'lgan.

-San'atni tanlashingizda oila a'zolaringiz tomonidan qarshiliklar bo'lganmi?

-Zohid: Xa, albatta ijodimiz boshida qarshiliklar bo'lgan.

-Ilk sahnaga chiqqan vaqtingiz??

-Zohid: 2009-yil 14-yanvar kuni Hamza Hakimzoda Niyoziy nomidagi Respublika Musiqa kollejida ilk marta sahnaga chiqqanmiz.

-O'sha vaqtdagi hayajoningiz....

-(kulishadi) Jasur: O'ho bilasizmi? Hayajon kuchli ekanligidan sahnada qimir etmay qotib turganmiz.

-Zohid: Titrab ketganmiz hayajondan.

-Ilk ijodingizni boshlagan paytingizda juda ham ko'plab tanqidlarga uchragansiz. Umuman tanqidga munosabatingiz? Undan qanday qutulish mumkin?

-Shohruh: Eng zo'r yo'li unga ahamiyat bermaslik.

-Jasur: Biz hech narsaga ahamiyat bermagan holda o'zimizning yo'lda davom etaverdik. Har xil gap-so'zlarga umuman ahamiyat bermadik.

-Asosan qo'shiqlaringiz sevgi-muhabbat, ayriliq haqida. Hayotingizdan olib kuylaysizmi?

-Zohid: Yo'q also, hayotimizga bog'liq joyi yo'q.

-Jasur: Buni biz shunchaki o'z yo'nalishimiz qilib tanlab olganmiz va o'ylaymizki, bu yo'nalishimiz ham o'zimizga yoqadi ham muxlislarga ham manzur kelyapti.

-Aksariyat taronalaringiz sevgi-muhabbat haqida. Ammo bir xillik odamni zeriktirmaydimi?

-Jasur: To'g'ri. Bunday mavzuda taronalarimiz ko'p. Ammo ora-orada boshqa mavzularda, masalan: Vatan, do'st va Paxtakor futbol klubi to'g'risida va boshqa mavzularda ham qo'shiqlarimiz bor.

-Hozirda sho'x taronalar ham yaratib kelmoqdasiz. Ya'ni ko'pchilikni tili bilan aytganda to'ybop taronalar. Bunday taronalar to'ylarda kuylash uchun yaratilmoqdami yoki?

-Shohruh: Yo'q, avvalo bu muxlislarning talabi.

-Jasur: To'yda kuylash uchun maqsad qilib bunday taronalarni yaratmaganmiz. Ijodimizda shunday bir yo'nalish borki, har bir yo'nalishda hech bo'lmaganda bitta yoki ikkita tarona yaratish. Sababi, har bir yo'nalishni o'zining tinglovchisi bo'ladi. Masalan: biz rep kuylasak, repni ham hamma eshitavermaydi. Rok kuylasak, uni ham hamma eshitavermaydi. Lekin bu yo'nalishni ham o'ziga yarasha muxlislari bor. Biz bitta odam bo'lsa ham o'zimizni muxlislarimiz orasiga qo'shilishi uchun ham sokin, ham sho'x tarona kuylab, har xil yo'nalishlarda ijod qilib kelmoqdamiz.

-Haqiqiy ijodkor yettidan-yetmish yoshgacha bo'lgan muxlislarni o'ziga jalb eta olishi kerak. Balki endi yoshi katta tinglovchilarga ham to'g'ri keladigan qo'shiqlar kuylarsiz? Nima bo'lganda ham muxlislar auditoriyasini kengaytirish kerak.

-Jasur: Harakat qilmoqdamiz. Yoshi katta tinglovchilarga ham atab tarona yaratganmiz. U yerda ham muhabbat haqida, ammo qo'shiq yo'nalishi o'zimizning o'zbek, milliy yo'nalishga ovoz yo'llari yaqinroq va ko'p yoshi katta insonlarga ma'qul kelmoqda hozirgi kunda.

-Nima deb o'ylaysiz? Ijodingizga san'at darajasida qaraysizmi yoki shou-biznes sifatidami?

-Zohid: Bilasizmi, biz o'z kasbimizni juda ham yaxshi ko'ramiz. Shu sababli biz ijodimizga haqiqiy ijod deb qaraymiz va shu ulug' nomga loyiq bo'lishga harakat qilamiz.

-Jasur: Biz agar shou-biznes sifatida qarasak, u holda bularning barchasi pulga borib taqaladi. Biz esa kasbimizga faqat pul uchun emas, ijodni sevganimiz uchungina ijod qilamiz. Insonlarga yaxshi kayfiyat ulashish uchun harakat qilamiz.

-Shohruh: Bizda san'atdan kelgan pul o'zimizning ijodimizga sarf bo'ladi. Shu yo'l bilan topgan mablag'imiz faqat ijodimiz uchungina xolos. Biz biznes uchun ijod qilayotganimiz yo'q.

-Yaqinda navbatdagi yakkaxon konsert dasturingiz. Tayorgarchiliklar, hayajonlar qay darajada?

-Jasur: To'g'risini aytsak, tayyorgarchiliklarni endigina boshladik. Sababi, ishlar ko'payib ulgurolmay qoldik. Mana ikki kundan beri harakatlarni boshlab yuborganmiz. Xudo hohlasa konsert kunigacha hammasiga ulguramiz.

-Ushbu konsert dasturidan nechta yangi taronalar o'rin olgan?

-Zohid: Barcha so'nggi paytlarda kuylagan taronalarimizni ijro etamiz.

-Jasur: Yangi taronalarimiz ham bor. Ularni hali hech qaysi konsert dasturida kuylamaganmiz. To'g'ri viloyatga gastrol safarlariga borganimizda kuylaganmiz, ammo Toshkent shahrida hali kuylamadik. Shu taronalarimizni barchasi konsert dasturimizdan o'rin egallaydi.

-Konsert dasturida muxlislaringizga atalgan syurprizlar ham bormi?

-Jasur: Syurprizlar bo'ladimi yo'qmi bilmadik-ku, ammo o'zimizning qo'shiq kuylash qirralarimizni va boshqa taraflama qirralarimizni ko'rsatishga harakat qilmoqdamiz. Syurprizlardan yana biri bu jonli ijro.

-Aynan xuddi shu savolni bermoqchi edim. Nechta taronani jonli ijroda kuylaysiz?

-Zohid: Xudo hohlasa jonli ijro bo'ladi. Buni muxlislarimiz konsert dasturimizda tashrif buyurishganida ko'rib o'zlari guvohi bo'ladilar.

-Demak jonli ijroni ham kutsak bo'lar ekanda?

-Zohid: Xa

-Bilamizki, hozirgi kunda jonli ijroga talab kuchli. Hali sizning guruhingiz kelajakda ko'plab konsert dasturlarni taqdim etadi. Keyinchalik mayli 100% bo'lmasada, 50% jonli ijro etish rejada bormi?

-Jasur: Rejada hali 100% jonli ijroda konsert qo'yish niyatimiz bor. Shunga tayyorgarchilik ko'rib kelmoqdamiz. Buning uchun kuchli tayyorgarlik va vaqt kerak. Lekin albatta niyatimiz bor.

-Hozirgi kunda guruhingizni muxlislari juda ham ko'p. Mana shunday vaqtlarda xonandalarda yulduzlik kasalligi paydo bo'la boshlaydi. Sizda-chi? Ushbu kasallik alomatlari sezilmayaptimi?

-Zohid: (kuladi) Siz nima deb o'ylaysiz?

-Men sezganim yo'q.

-Jasur: Bu kasallik uyg'onib qolishi mumkin inson o'zi sezmagan holda. Ammo biz bir narsaga xursandmiz. Biz uch kishimiz. Agar oramizdan biror kishida shunday holat sezilsa, bir-birimizni darhol ogohlantiramiz. Shunday qilib bu narsani yo'qotishga kurashamiz. O'ylaymizki, xudo hohlasa yulduzlik kasalligiga umuman chalinmaymiz.

-Ayni kunda muxlislaringiz uchun yangi bo'lgan qanday ijodiy ishlar bilan bandsiz?

-Jasur: Yaqinda yangi "Boylik" deb nomlangan klip sur'atga oldik. Nasib etsa shu oyning oxirida omma e'tiboriga taqdim etamiz. Shu bilan birgalikda Munisa Rizayeva bilan "Vo ajab" deb nomlangan duet tarona kuyladik. Tez kunda ushbu taronaga klip suratga olinishi ham rejalashtirilgan.

-Yana qaysi xonandalar bilan duet kuylagan bo'lar edingiz?

-Jasur: Biz o'zimiz uchun ideal xonanda bilan duet kuyladik. Munisa Rizayeva estrada olamiga yangilik olib kirdi. O'zining imidjiga, uslubiga ega xonanda. San'at olamiga kirib kelganidan buyon biz bu xonanda bilan duet kuylashni orzu qilgan edik. Munisa Rizayeva ham o'z oldilariga Ummon bilan birga duet kuylayman deb maqsad qilib qo'ygan ekanlar.

-Duet taklifi kimdan chiqdi?

-Shohruh: Har ikkimizdan bu taklif tushdi. Biz esa bundan juda xursand bo'ldik.

-Ijodingizda guruhingiz a'zosi Zohid ham she'r ham musiqa bastalaydi shundaymi?

 -Jasur: Deyarli taronalarimizning 98% Zohid tomonidan yaratilgan. Ammo Munisa Rizayeva bilan kuylagan taronamizning she'ri va musiqasi bizga tegishli emas. Ushbu tarona matni: Eldor Qayumovga, musiqasi Jasur Badalboyevga tegishli.

-Hozirgi kunda ko'p xonandalar xorij kuylaridan ko'chirma ya'ni andoza olishayotgani barchamizga ma'lum. Bunday hollarga munosabatingiz? Yoki o'zimizda kuy bastalovchilar qolmadimi? Sizni ham ijodingizda ko'chirma kuylar bor degan fikrlar yo'q emas.

-Zohid: Buni biz muhokama qila olmaymiz.

-Nima uchun axir qo'shiqni siz kuylaysizku?

-Shohruh: Biz hech qanday chet el qo'shig'ini o'g'irlab ijro etmaganmiz.

-Jasur: Masalan biz buni aytganimiz bilan baribir ishonishmaydi. Ko'p joyda buni takidlab o'tganmiz. Aynan mana shu mavzudan biz charchadik.

-Masalan bunga misol qilib "Qanday unutding" taronangizni olishimiz mumkin.

-Jasur: Men sizga hozir bu taronaning tarixini gapirib beraman. Taronamiz chiqdi va bir oy davomida bu taronamiz vidioklipsiz mp3 holida aylantirildi. Lekin u vaqtda tarona xit darajasiga yetmadi. Xalq ham e'tibor bermadi. Taronaga klip suratga olinganidan so'ng, tarona biz kutgan natijani berdi. Vaqt o'tganidan keyin har xil gaplar tarqay boshladi. Ya'ni, bu tarona o'g'irlangan va shunga o'xshash gaplar. Ba'zi internet saytlarida o'sha tarona bilan aynan biz kuylagan taronani kesib, biz kuylagan joylarini bir-biriga ulab ovoz templarini solishtirib ko'rishgan.

-Zohid: Xullas, taronani kesishganda, uning tagidan men kuylagan joylarimni qo'yib chiqishgan. To'g'ri ovoz yo'li o'xshaydi. O'xshab qolganini o'zimiz ham bilamiz. Musiqasini men o'zim bastalaganman. Agar shu taronaning originalini eshitib ko'rsangiz umuman bizniki bilan farq qiladi.

-Demak ijodingizda ko'chirib olingan taronalar yo'q?
-Shohruh: Faqatgina biz hali u qadar tanilmaganimizdan oldin Zohidning bir ko'chirma olingan ruscha qo'shigi bor edi. Hozirgi ijodimizda esa umuman ko'chirilgan taronalar yo'q.

-Shon-shuhrat va yuqori martabaga erishdik deb o'ylaysizmi?

-Zohid: Yo'q biz hali hech narsaga erishmadik. Hali qiladigan ishlarimiz juda ham ko'p. 100% ishdan 1% ginasini bajardik xolos.

-Ustozlaringiz bormi?

-Jasur: Eng asosiy ustozimiz bu-hayot. Chunki ochig'i ustoz ko'rmaganmiz. Lekin hozirda san'at mavzusi haqida suhbatlashib qolsak, bizga o'z maslahatlarini ayamaydigan insonlar bor. Bulardan: Alisher Fayz, Jahongir Poziljonov, Ozodbek Nazarbekov, Ulug'bek Rahmatullayev. Mana shu insonlar bizga maslahat berib kelmoqdalar.

-Kino olamiga munosabatingiz? Hozirda ko'p xonandalar kinolarda suratga tushishi odatiy holga aylanib qolgan. Sizda ham filmlarda rol o'ynashga qiziqishingiz bormi?

-Zohid: Menda umuman qiziqish yo'q. Agar taklif tushsa ham rozi bo'lmayman. Men xonandalarni ko'plarida kuzatganman. Kinoda rol o'ynagandan so'ng, xonandalik ijodida anchayin sustlashib ketgan.  

-Jasur: Menda esa qiziqish bor. Agar taklif tushsa rozi bo'lar edim.

-Shohruh: Men ham bu sohaga qiziqaman. Bir-ikkita takliflar bo'ldi. Ammo bizda hozirgi paytda vaqt yo'q. Ko'p vaqtimiz ijod qilish bilan band.

-San'atkor uchun tashqi ko'rinish muhimmi?

-Jasur: Albatta muhim. Ammo odamgarchilikni men birinchi o'ringa qo'yaman. Undan so'ng tashqi ko'rinish.

-Shohruh: Baribir har bir odam avvalo ko'rinishingizga qaraydi. Ruslarda bir maqol borku: "Kiyimiga qarab kutib ol, muomilasiga qarab kuzatib yubor".

-Konsert dasturida imidjingiz borasida kim shug'ullanmoqda?

-Zohid: O'zimiz ishlamoqdamiz. O'zimiz bir-birimizga qarab kiyimlarimizga baho beramiz. Yuqorida takidlab o'tganimizdek, biz xursandmiz uch kishi bo'lganimizga. Sababi, bir-birimizni aybimizni o'zimiz to'g'irlaymiz.

-San'atda o'zizga raqobatchi deya qaraydigan xonandalaringiz bormi?

-Jasur: Yo'q. Biz san'atga raqobatlashish uchun kirmaganmiz. Biz hech kimga raqobatchi sifatida qaramaymiz ham. Har kimni rizqi o'ziga yarasha bo'ladi. Har bir xonandaning o'ziga yarasha muxlislari bor.

-Ijodingiz gullashiga va ko'pgina muxlislar orttirishingizda nimani asos deb bilasizlar?

-Jasur: Avvalo bu mehnatimiz orqali va omadda deb bilamiz. Sababi, qayerga bormaylik, bizni xuddi o'zlarini oila a'zolari sifatida shu qadar iliq kutib olishadi. Biz bundan juda xursand bo'lamiz va ularga minnatdorchilik bildiramiz.

-Ko'p guruhlarni bilamizki, ular ijodni avvalo birga boshlab so'ng alohida-alohida ijod qilishadi.

-Jasur: Bizda bunday holat also bo'lmaydi. Bu haqida xatto o'ylab ham ko'rmaganmiz. Xudo hohlasa biz oxirigacha ijod qilamiz.

-Ijodingiz boshlangandan beri viloyatlar bo'ylab konsert dasturlarini taqdim etdingiz?

-Jasur: O'zbekiston bo'ylab konsert dasturlarini qo'yib kelayotganimizga uch yil bo'ldi. Shu yil mobaynida uch yuzga yaqin konsert dasturlarini qo'yishga muvvaffaq bo'ldik.

-Sentyabr oyidagi konsert dasturingizda butun saroy to'ladi deb o'ylaysizmi?

-Jasur: To'g'risini aytganda hovotirdamiz. Xudo hohlasa biz kutgan yaxshi natija bo'ladi.

-Hozirda agar ahamiyat berib qaraydigan bo'lsak, musiqadan ma'lumoti yo'q yosh yigitlarni qo'shiq kuylab internetlarda taronalarini tarqatayotganligiga guvoh bo'lyapmiz. Eng qiziqarli tomoni shundaki, ular xuddi Ummon guruhining yo'nalishida kuylashmoqda. Bunisi ham yetmagandek, biz Ummon guruhining shogirtlarimiz deya ijod qilishmoqda. Bu gap qanchalik to'g'ri? Rostdan ham shogirtlaringiz bormi?

-Jasur: Yo'q. Bilasizmi, bu gaplar bizga ham yetib kelgan. Bir tomondan xursand bo'lamiz, ammo bir tarafdan hafa ham bo'lamiz. Hech qanday shogirtimiz yo'q. Ular ijod qilayotgan bo'lsa, bizning yo'nalishda aytib, bizga o'xshab qolayotganidan hafa bo'lmaymiz. Bir narsadan qattiq ranjiymiz ya'ni bizni nomimizdan ko'p ishlar qilishadi. Orasida bo'lar-bo'lmas gaplar ham bo'ladi. Natijada odamlarni ko'nglini bizdan qoldirshadi. Ko'p joylarda konsertlar uyushtirishadi Ummon guruhi keladi deb. Vaholangki, bundan bizning habarimiz yo'q bo'ladi. Bu menimcha konsertga odam chaqirib olish maqsadida qilinadi deb o'ylaymiz. Bu ham yetmagandek, o'sha konsertga odamlar to'planib konsert boshlanganidan so'ng, Ummon guruhi kela olmabdi va o'rnilariga shogirtlarini yuborishibdi deb sahnaga uch nafar yigitni chiqarib qo'yishadi. Bu viloyat konsertlarida bo'lgan holat. Bir kuni Qashqadaryo viloyatining Kitob tumanida yursak, yo'llarda bizning katta afishamiz osilib qo'yilgan va u yerda biz gala konsertda qatnashishimiz yozilib qo'yilgan. O'sha kundan ikki kun oldin o'zimizning konsertimiz qo'yilishi kerak edi. Ikki kun keyin gala konsertda ham ishtirok etar ekanmiz. Odamlar ishonishmagan. Qaysi biriga kelar ekan Ummon degan fikrlar tug'ilgan. Chiptalar sotilmagan. Sababi, odamlar ishonmagan. Son'g, konsert kunida biz o'zimiz stadionga kirib kelganimizni ko'rgan muxlislar o'shandagina chiptalarni sotib olishgan. Bu odamlarda ishonch qolmaganidan dalolat edi.

-Endi esa birozgina shaxsiy hayotingizga yondoshsak. Menimcha muxlislarga shaxsiy hayotingiz juda ham qiziq. Fe'lingizga keladigan bo'lsak, o'zingizda xurmat qiladigan jihatlaringiz? Yohud buning aksi?

-Jasur: Endi men o'zimga o'zim baho bera olmayman. Ammo yomon ko'radigan fe'lim bor. Juda tez jaxlim chiqadi. Jaxlim chiqganida ko'zimga hech narsa ko'rinmaydi va u inson kimligiga qarab o'tirmay qattiq gapirib yuboraman. Shu fe'limni juda-juda yomon ko'raman.

-Shohruh: Meni fe'limga kelsak, tez hafa bo'laman va tez xursand ham bo'lib ketaveraman.

-Zohid: Men u qadar hafa ham bo'lavermayman. (kuladi)

-Hayotingizda sevgi-muhabbatning o'rni?

-Jasur: Sevgi-muhabbat ham har xil. Vatanga, oilaga, kasbiga bo'lgan muhabbat. Avvalo muhabbat bo'lsa, butun borliq go'zal ko'rinadi.

-Zohid: Bizni kasbimizga bo'lgan muhabbatimiz juda ham kuchli.

-Besh yoki o'n yildan so'ng Ummon guruhini qanday tasavvur qilasiz?

-Zohid: (kuladi) Sal qariroq, uylangan, bola-chaqalik holatida tasavvur qilamiz. Ijodimiz ham anchayin o'sgan holatda bo'ladi. Bora-bora ijodingiz o'saverar ekan. Masalan: Biz oldin kuylagan taronalarimiz ko'p tanqidga uchragan. Ko'pchilik taronalarimizning saviyasi pas deyishar edi. O'sha vaqtlar bizga juda tegib ketar edi bu gaplar. Ammo hozir o'zimiz eshitib, haqiqatdan ham shunday ekan degan fikrdamiz. Yoshimiz o'sgani sari taronalarimiz ham o'saverar ekan.

-Jasur: Hozirgi hamda oldingi taronalarimizni solishtirsak, ba'zida kulib yuboramiz. Hozirda taronalarimiz yaxshi tarafga ozgina bo'lsada o'zgarganiga xursandmiz.

-Ijoddan tashqari yana nimalar qila olasiz?

-Jasur: Masalan: Uy qurish ishlarini barchamiz bemalol uddalay olamiz. Bu sohada shaxsan ozim ishlab ham ko'rganman. Dilerlik ya'ni operatorlik sohasida ham ishlay olishim mumkin.

-Qachon oila qurish niyatingiz bor?

-Shohruh: Hali bu haqida o'ylab ham ko'rganimiz yo'q. Xudo hohlasa vaqti kelaganida uylanamiz.

-Umr yo'ldoshingizni kim tanlashini hohlardingiz? O'zingiz yoki ota-onangiz?

-Shohruh: To'g'ri ota-onaning ham fikri muhim. Ammo o'zimizga ko'proq ma'qul kelishi kerak. Sababi, yashaydigan biz.

-Jasur: Masalan: O'zingiz tanlab, ota- onangizga ko'rsatsangiz ham bo'ladi. Balki ularga ham ma'qul kelib qolishi mumkin.

-Siz uchun umr yo'ldoshingiz qanday bo'lishini hohlaysiz?

-Jasur: Har tomonlama yetuk. Axloq-odob, uyat bularni barchasi unda mujassam bo'lishi kerak. Ota-onangizni xizmatini qiladigan bo'lishi kerak.

-Zohid: Samimiy, istarasi issiq inson bo'lsa yaxshida. (kuladi)

-Shohruh: Qo'shimcha qilmoqchiman. Sizni tushunadigan bo'lishi kerak.

-Suhbatimiz so'ngida tilaklaringiz

-Jasur: Ummon guruhi nomidan MUZ.UZ sayti hodimlariga, shu qatorda barcha o'zbek xalqiga, muxlislarimizga umondek cheksiz baxt tilab qolamiz. Har bir o'ylagan niyat va maqsadlariga yetishishlarini, ulkan zafarlarni chin dildan tilab qolamiz va shu fursatdan foydalanib barcha yurtdoshlarimizni mustaqilligimizning 21 yillik bayram, shodiyonasi bilan chin dildan muborakbod etamiz.

Biz ham Ummon guruhining samimiy yigitlariga ijodlari hamda hayotlarida yuqori cho'qqilarni zabt etishlarini tilab qolamiz. O'z vaqtlarini ayamagan holda tashrif buyurganliklari uchun ijodiy guruhimiz nomidan o'z minnatdorchiliklarimizni bildiramiz!

P.S.: Ushbu intervyudan ko'chirma olish va undan foydalanish qat'iyan man etiladi. Barcha huquqlar qonun tomonidan himoyalangan va qoidabuzarlar qonun oldida javobgardir.