2013-yil 1-aprel soat 20:00 da Forum TV telekanali orqali birinchi Zo'r-Zo'r STARning ilk konsert dasturi namoyish etildi. Millionlab teletomoshabinlar nafaqat kastingdan o'tgan 11 nafar ishtirokchi bilan tanishish, balki ularning ovozlarini jonli ijroda tinglashga ham musharraf bo'lishdi. Demak 11 nafar ishtirokchi bilan tanishing.
Ishtirokchilar: Akbar Tolipov, Ulug;bek Holiqov, Rasulxo'ja Tursunqulov, Vasilina Doniyorova, Feruza Jumayeva, Roman Vetrov, Madina Rashidova, Yana Bahtiyeva, Shahlo Ahmedova, Asqar Jalilov va Nurali Shukurullayev.
Konsertga tushish baxtiga sazovor bo'lgan tomoshabinlar, birinchi navbatda, ishtirokchilarning qarindoshlari va yaqinlari edi. Ularning hammasi konsertga tayyorgarlik ko'rib kelgan, ya'ni qo'llarida ishtirokchilarni ruhlantirib turuvchi plakatlar va transparantlarni ko'rish mumkin edi.
Qoidaga ko'ra konsert kechasi loyiha hay'ati a'zolarini tanishtirishdan boshlandi. Ular quyidagilardan iborat bo'ldi:
Rustam Hamroqulov - estrada vokali bo'yicha pedagog;
Nabi Abdurahmonov - aktyorlik mahorati va sahna nutqi bo'yicha pedagog;
Elvira Mulyukova - xoreografiya bo'yicha pedagog;
Alisher Uzoqov - o'zbek kinosining taniqli aktyori;
Gulnora Karimova - Zo'r-Zo'r STAR loyihasi hay'atining faxrli a'zosi, Fond Forum Vasiylik kengashining raisi.
Konsert davomida ishtirokchilar 11 ta jahon xitini ijro etdi. Ularning har bir chiqishi tegishli tarzda roliklar va boshqa effektlar bilan bezaldi.
Tomoshabinlar zalini alohida qayd etish joiz, ular har bir ijrochini gulduros qarsaklar bilan qo'llab-quvvatlab turdi.
Sal keyinroq Zo'r-Zo'r STAR loyihasi hay'atining faxrli a'zosi, Fond Forum Vasiylik kengashining raisi Gulnora Karimova sahnaga ko'tarildi. U har bir ishtirokchining kuchli va zaif tomonlarini alohida qayd etgan holda, o'z taassurotlari bilan o'rtoqlashdi.
Loyiha gimnining o'zbek va rus tillarida ijro etilishi esa kechaga nuqta yasadi.
Eslatib o'tamiz, ushbu loyiha Fond Forum hamda Beeline savdo belgisi bilan hamkorlikda tayyorlanmoqda. Keyingi konsert dasturida ishtirokchilar o'zlarining ijodlariga oid taronalarni ham albatta taqdim etishlari ko'zda tutilgan. Quyida konsert dasturidan ba'zi fotolavhalarni taqdim etamiz.
