Bu safargi shanba oqshomi yanada yorqin va kutilganiday ajoyib bo'ldi. Aynan shu kuni soat 20:00 da teletomoshabinlar Forum TV kanali orqali har haftalik Zo'r-Zo'r Star hisobot konsertlarini tomosha qilishlari mumkin. 6-aprel oqshomi ham bundan mustasno bo'lmadi. U pedagoglar faoliyatining natijasini hamda ishtirokchilarning sa'y-harakatlarini to'liq namoyish etdi, desak adashmaymiz. Bir hafta davomida ishtirokchilar hamma sevib tinglaydigan 11 ta qo'shiqni repetitsiya qildi. Qayd etib o'tamiz, ikkinchi konsert uchun mashhur xorij va o'zbek kinofilmlariga yozilgan saundtreklar tanlandi.
Har bir chiqish puxta o'ylangani bois barcha ishtirokchilarning chiqishlari lol qoldiradigan darajada tomoshabop o'tdi. Qo'shiq kayfiyati va ekranda namoyish etilayotgan filmdagi kadrlarga qarab tomosha zali ba'zida gulduros qarsaklar chaldi, ba'zida esa zalda sukunat hukm surdi. "Hijron" kinofilmiga yozilgan saundtrek katta hayajon bilan kutib olindi, chunki uning postanovkasida kartina bosh qahramonlaridan birining rolini ijro etgan taniqli aktrisa Dilnoza Kubayeva ham ishtirok etdi.
Undan tashqari zalda anchagina artistlar, ikkinchi Zo'r-Zo'r Star hisobot konsertining yulduzli hay'ati tarkibiga kirgan O'zbekiston madaniyati va san'ati arboblari ham bor edi, bular:
Murod Rajabov - O'zbekiston xalq artisti;
Abduhoshim Ismoilov - O'zbekiston xalq artisti;
Adiz Rajabov - o'zbek kinematogrfiyasining taniqli aktyori;
Jahongir Poziljonov - o'zbek estradasi xonandasi, "Bojalar" guruhining ishtirokchisi;
Rustam Hamroqulov - estrada vokali bo'yicha pedagog.
Aynan ular ishtirokchilarning chiqishlarini o'n balli shkala bo'yicha baholab bordi. Bunda ular ishtirokchilarning nafaqat vokal ko'rsatkichlariga, balki aktyorlik mahoratiga hamda har bir qatnashchining plastikasini ham hisobga oldi. Qo'yilgan ballar pedagoglarning hafta davomida qo'ygan baholariga qo'shildi - barcha ishtirokchilarning natijasi aynan shu tarzda aniqlandi.
Biroz oldinga nazar solgan holda, kichik bir sirni ochmoqchimiz: uchinchi Zo'r-Zo'r Star-konsertda ishtirokchilar musiqiy kompozitsiyalarni o'zbek estradasi yulduzlari bilan duetda kuylaydi. Ularning nomlarini keyingi shanba kuni bilib olasiz.
Quyida esa "Zo'r-zo'r Star" loyihasi haqida hozirgi kundagi ko'zga ko'ringan yulduzlarimiz o'zlarining fikrlari bilan o'rtoqlashishgan.
Adiz Rajabov: Konsert menga juda yoqdi. Eng asosiysi - har bir ishtirokchining o'z ovozi, o'z ijro uslubi bor. ular qo'shiqlarini ijro etayotgan artistlarga taqlid qilishmayapti, o'ziga xos ravishda kuylashyapti. Albatta, ishtirokchilar hayajonlangani sezildi. Ularga hakamlik qilish oson bo'lmadi, chunki hech kimni xafa qilishni istamaysan kishi. Chiqishlar individual bo'lganini yana bir bor ta'kidlayman.
Men ishtirokchilarni diqqat bilan kuzatdim, ularning hammasi ijrolari kabi turlicha. Kimdir tomoshabinlarni "ushlab turib", ajoyib vokalni ko'rsatgan holda qo'shimcha rekvizitsiz ham uddalay oldi. Kimdir esa, nazarimda, buni uddalay olmadi. Umuman olganda, konsert ajoyib bo'ldi! Men lolman, his-tuyg'ularimning cheki yo'q!
Hakamlikka kelsak, u xolis bo'ldi. Kattaroq tajribaga ega hay'at a'zolari talabchanroq baholashdi. Ballarni faol muhokama qildik. Bahsli vaziyatlar yuzaga kelganida, bir-birimiz bilan maslahatlashib, bir qarorga keldik.
Studiyaning jihozlanishiga alohida to'xtalish kerak. Tashkilotchilar bu ishga ijodiy va professional tarzda yondashgani darrov ko'zga tashlanadi. Bu texnik jihatdan qanday qilinganini bilmayman, ammo ko'rinishi qoyilmaqom! Hammasi rang-barang va yorqin. Yuz berayotgan voqealarning qoq markazida bo'lganingda, qalbingni ifodalab bo'lmaydigan his-tuyg'ular chulg'ab olar ekan.
Barcha ishtirokchilarga sahnada o'zlarini yanada erkinroq tutishlarini tilayman. Bu yaxshimi yoki yomonmi, ammo universal sir yo'q, buni har kim o'zi uchun vaqt o'tishi bilan kashf qiladi. Faqat bir narsani aytishim mumkin: sahnada ham, hayotda ham eng asosiysi - ko'zlar. Inson, ayniqsa artist, "ko'zlari bilan gapirishi" kerak. Agar u kuylasa, his-tuyg'ularni berish uchun birgina ovozning o'zi kamlik qiladi. Nominantlarga esa tilagim - hafta davomida sabrli bo'lishsin. Shunday loyihada qatnashishning o'zi barcha ishtirokchilar uchun katta piar. Ularni butun mamlakat bilib oldi, ekranlarda - ularning chehralari. Ijodiy faoliyatda yaxshi start doim muhim ahamiyat kasb etadi. Zo'r-Zo'r Star - bu yosh iste'dodlar uchun tramplin. Shunday loyihada qatnashishning o'zi g'alaba!
Dilnoza Kubayeva: Ushbu chiqishni sahnalashtirishda yordam bera olganimdan juda mamnunman. Bu haqiqatan ham qiziqarli va chiroyli bo'ldi. Ishtirokchi kuylayotgan paytda, rejissyorning rejasiga ko'ra, ekranlarda mening ishtirokimdagi film epizodlari namoyish etildi, qo'shiq oxirida esa sahnaga o'zim chiqdim. Tomoshabinlar aloqani ko'rishlari va kartina qanday qilib "jonlanayotganini" kuzatishlari mumkin edi.
Tanlovda qo'shiqlarning jonli ijro etilayotgani juda quvontirdi, men eshitgan ovozlar o'zining kuchi va go'zalligi bilan meni lol qoldirdi!
Loyiha g'oyasining o'zi, shubhasiz, kishini qoyil qoldiradi, ammo hammasidan ham menga ishtirokchilarning o'zlari yoqdi. Ular juda samimiy yoshlar. Yigit-qizlar bir-birini hurmat qilishi va qo'llab-quvvatlashi ko'zga tashlandi. Hech qanday raqobat yo'q. Sahna ortida o'zlarini bir jamoaday tutishyapti.
Bu chiqishni sahnalashtirishda bajonidil qatnashdim, agar yana takliflar bo'lsa, ularga ham jonim bilan rozi bo'laman, chunki yoshlarni har tomonlama qo'llab-quvvatlash kerak, deb hisoblayman. Tashkilotchilarga ham alohida tashakkur! Tanlov an'anaviyga aylansa, juda ajoyib ish bo'lardi.
Murod Rajabov: Aktyorlik faoliyatimda yuzlab rollarim bor, ammo ilk bor vokal tanlovi hay'atining a'zosi sifatida qatnashyapman. To'g'risini aytsam, bunday iste'dodlarni ko'raman deb kutmagandim. 11 nafar ishtirokchining hammasi, nazarimda, bu loyihada qatnashish uchun bir xil munosib. Yigit-qizlarga barakalla deyishim mumkin! Ularning hammasi salmoqli vokal ko'rsatkichlariga, artistlik mahoratiga va sahnaga bo'lgan muhabbatga ega. Bu darrov seziladi. Albatta, ularga biroz professionalizm yetishmayapti. Biroq biz hozircha ulardan kuchli mahoratni talab qilishga haqli emasmiz, yulduz bo'lish uchun hali ancha ishlash kerak. Shunday iste'dodli yoshlarimiz borligidan samimiy mamnun bo'ldim. Ular men kutgandan ham yaxshiroq bo'lib chiqdi - hammasi yosh, istiqbolli! Ishtirokchilarga borgan sayin qiyinroq bo'ladi, shuning uchun ular bo'shashmasligi kerak, o'z kuchlarini chiqishlar paytidagi hayajonlarini yengib o'tishga jamlashlari zarur. Aytganday, hayajonni o'z foydasiga ishlatish bo'yicha har bir artistning o'z siri bo'ladi. Hayajon qo'shiq mavzusini ochishga yordam beradigan his-tuyg'ularga o'tishi zarur. "Omma orasida yolg'izlik" tushunchasi bor. Artist kompozitsiyani oxirigacha tushunishi, undagi og'riqni his qilishi, mavzusiga chuqurroq kirib borishi kerak. U faqat qo'shiq haqida o'ylashi, yaratgan obrazida sahnada u bilan birga yashashi lozim. Faqat shundagina u o'zini chalg'itishi mumkin bo'lgan hamma narsa haqida unutadi. Zo'r-Zo'r Star - juda muhim loyiha, deb o'ylayman. Unda shubhasiz yangi, g'aroyib yulduzlar paydo bo'ladi. Hozircha estradamizda bo'lmagan artistlar, haqiqiy avangardistlar tug'ilyapti. Men haqiqatan ham kuchli, klassik ovozlarni eshitdim. Yigit-qizlar bo'sh kelmasliklari lozim, hech narsaga qaramasdan oxirigacha borish va optimist bo'lib qolgan holda, ruhan cho'kmaslik kerak. Barcha ishtirokchilarga omad tilayman!
