Beeline savdo belgisi hamda Fond Forum tomonidan tashkillashtirilgan "Zo'r-zo'r Star" loyihasi davom etib kelmoqda. Ushbu loyiha haqida ko'plab turli qarashlarni eshitishingiz yohud ko'rishingiz mumkin. Bugun biz doimgidek ushbu loyiha haqida estradamizning yulduzlari qanday fikrlashayotganliklari haqida sizni bohabar qilishda davom etamiz. Demak qarshi oling.
Nasiba Abdullayeva:
Bu yerda ekanligimdan juda mamnunman, bugun sevimli qo'shiqlarimni tinglashga muvaffaq bo'ldim. Duetlar katta taassurot qoldirdi, ular juda mos tushibdi. Ko'pchilik Zo'r-Zo'r STAR loyihasi tufayli artistlarning o'zini tutishi, tashqi ko'rinishi va sahnadagi hissiyotlarining eng yaxshi namunasi sifatida Zo'r-Zo'r STAR mahsuloti bo'lib qolishga munosib bir nechta chiroyli estrada nomerlari tug'ilganini qayd etmoqda.
Yana bir hayron qoldirgan tomoni, kasting davomida menga shubhasiz lider bo'lib ko'ringan ba'zi bir ishtirokchilar bugun yaxshi ijroni ko'rsatolmadi. Ammo men kutmagan yigit-qizlar, bu safargi konsertda meni hayratda qoldirishdi. Bundan mamnunman, albatta. Bundan buyon ham ularni kuzatib boraman!
Hammamiz ko'rganimizday, konsert yakunida qattiq kurash ketdi, ammo biz, hay'at a'zolari, yaxshi, umidli ijrochimiz loyihadan birinchi bo'lib chiqib ketmasligi uchun zimmamizga shunday irodali qarorni olib, o'z fikrimizni o'tkazishga muvaffaq bo'ldik. Hay'at a'zolari bir ovozdan uni loyihada olib qolishga kelishdi. Akbar bizning umidlarimizni oqlashiga va bu imkoniyat unga qanday berilganini, bu nimani anglatishini va endi unga qay darajada jiddiy qarash kerakligini anglab yetishiga umid qilaman. Endi hay'at a'zolarida boshqa bunday huquq bo'lmaydi. Bu birinchi va oxirgi marta bo'ldi.
Shahzoda:
Loyihani anchadan buyon ichidan kuzatib kelyapman, yigit-qizlar ham meni dastlabki kundanoq hayratda qoldirishyapti. Ular baxtli avlod vakillari, chunki ularga o'z iste'dodini namoyon etish kabi imkoniyat berildi. Bu iste'dodli yoshlarni "Beeline" va "Fund Forum" juda yaxshi qo'llab-quvvatlamoqda. Ishtirokchilar uchun bu darrov mashhur bo'lish tomonga bo'lmasayam, unga erishish ustida ishlash tomonga qaratilgan birinchi qadam. Ular bu hali boshlanishi ekanini anglab yetishlari kerak.
Biz Asqar Jalilov bilan "Qo'llar tepaga" qo'shig'ini kuyladik. Kompozitsiyaning o'zi raqsbop, Asqar bo'lsa uni yanada "o'yinbop" qildi. Asqar — roker, buning ustiga ovozlarimiz tembri ham turlicha. Ammo, menimcha, natija juda zo'r chiqdi. Biz tez do'stlashib oldik. Umuman olganda, u juda dilkash, o'ziga ishongan yigit ekan, u bilan sahnada kuylash men uchun ancha qulay bo'ldi. Yigit-qizlarning bunday loyihaga tushgani omad, deb hisoblayman. Bu yerda hammasi ideal tarzda o'ylangan, artist uchun, o'z iste'dodining qirralarini rivojlantirish va ochish uchun hamma sharoit yaratilgan.
To'g'risini aytsam, meni kastingga saralash komissiyasining a'zosi sifatida taklif qilishganida, shuncha vaqtni hakamlikka sarflash juda qiyin bo'ladi, deb o'ylagandim, biroq bu yerda bir sutka bo'lib, vaqt qanday o'tib ketganini bilmay qolganimni sezib hayron qoldim. Bu yerdagi muhit meni haqiqatan ham qamrab oldi, juda qiziqarli bo'ldi. Men bu yerga yana va yana kelib, ushbu ajoyib loyihada qatnashgan bo'lardim!
Ulug'bek rahmatullayev:
Zo'r-Zo'r STAR - oldinlari bo'lmagan yangi loyiha. U tomoshabinlarga yana shunisi bilan qiziqarliki, tanlov ishtirokchilari qo'shiqlarni jonli ijro etishlari kerak, ana shundagina muxlislar o'zlari yoqtirgan ishtirokchining vokal qobiliyatlarini real baholay oladi. Meni Zo'r-Zo'r STAR loyihasiga o'zbek estradasining xonandasi sifatida taklif qilishganida xursand bo'ldim. U haqiqatan ham hozirgi yoshlarga biznikiga qaraganda ko'proq imkoniyat beradi. Men doim shunday tanlovlarda qatnashishni orzu qilardim.
Birinchi repetitsiyaga kelganimda, meni ishtirokchilar yashayotgan sharoit o'ziga jalb etdi. Hamma joyda yoqimli muhit, ular mehribon va hozirjavob insonlar bilan muloqot qilishyapti, ular uchun juda qulay sharoitlar yaratilgan.
Menga Madina bilan kuylashimni aytishganida, bundan juda xursand bo'ldim, chunki u bilan loyihagacha tanishishga muvaffaq bo'lgandim. U yaxshi qiz, vazmin, tartibli. Dastlab mos keladigan qo'shiqni tanlash qiyin bo'ldi, chunki erkak va ayollarning tonalligi farq qiladi. Yaqinda biz Rayhon bilan "O'qilmagan kitob" qo'shig'ini yozgandik, men uni Madina bilan ijro etishga urinib ko'rdim, yaxshi chiqdi. Bu ijroni eshitib, pedagoglar qo'shiqni ma'qullashdi. Madina bilan bir-birimizni yaxshi qo'llab-quvvatlayapmiz. Unga omad va ijodiy yutuqlar tilayman.
Konsert katta imtihon hisoblanadi. Ishtirokchilar qanday repetitsiya qilayotgani, ularning sa'y-harakatlari va buni qay darajada yaxshi bajarayotganliklarini esa hay'at a'zolari va tomoshabinlar baholashadi. Loyihada eng asosiysi – qatnashish va qo'shiqni jonli kuylash. Hamma yulduzlar jonli ijroga o'tishlari kerak, deb o'ylayman, chunki bu butun dunyoda qabul qilingan amaliyot.
Studiyaning jihozlanishi meni lol qoldirdi. Men xuddi Yevropadagi konsertga tushib qolganday bo'ldim. Yevropacha usul darrov seziladi. Yoshlarga yordam berayotgani uchun men "Fund Forum" va "Beeline"dan minnatdorman. Bu juda yoqimli. Tashkilotchilarning hammasiga rahmat.
Ziyoda:
Loyihada qatnashayotganimdan juda mamnunman. Konsertda biz estradamizning bo'lg'usi yosh yulduzlari bilan birgalikda kuyladik – bu juda ajoyib bo'ldi! Masalan, men Ulug'bek bilan kuyladim, uning qobiliyatlari ko'pligini ko'rdim, Ulug'bek ularni asta-sekin rivojlantirib borishi mumkin. Men bu ishtirokchini loyihadan oldin ham bilardim, uning ijrosidagi qo'shiqlarni eshitganman. Taqdir ekan, biz yana u bilan uchrashdik. Men unga va tanlovdagi barcha ishtirokchilarga faqat omad tilayman.
Repetitsiyalarda biz fonogrammasiz, faqat jonli tarzda ishladik. Oldinlari jonli ijro bilan konsert beradigan yulduzlar kam edi, hozir ularning safi sezilarli darajada ko'payib qoldi. Ko'pgina estrada xonandalari uchun bu o'zining vokal qobiliyatini namoyish etish bo'yicha katta imkoniyat hisoblanadi. Zo'r-Zo'r STAR loyihasi aynan jonli ijroni qo'llayotganidan mamnunman. Bunday tadbirlar bizda iloji boricha ko'proq bo'lishini istardim. Dekoratsiyalarga to'xtaladigan bo'lsak, menga "Beeline" kompaniyasining "fishkasi" – asalariga o'xshab qora va sariq ranglarning birga kelishi yoqdi. Ko'nglimdagiday bo'libdi.
Eslatib o'tamiz, ushbu loyihani har hafta so'ngida Forum TV orqali tomosha qilib, ishtirokchilarning chiqishlariga guvox bo'lishingiz mumkin.
